جھوٹ پھیلانے پر بھارتی میڈیا پر عالمی سطح کی پابندی عائد کی جائے، شرجیل میمن
اشاعت کی تاریخ: 29th, May 2025 GMT
کراچی:
سینئر وزیر سندھ شرجیل میمن نے کہا ہے کہ پاک بھارت جنگ کے دوران جھوٹ پھیلانے پر بھارتی میڈیا پر عالمی سطح کی پابندی عائد ہونی چاہیے، میڈیا باڈیز برطانیہ اور امریکا میں بھارتی میڈیا کے خلاف ہتک عزت کے مقدمات دائر کریں۔
یہ بات انہوں نے ایف پی سی سی آئی میں منعقدہ تقریب میں شرکت کے دوران خطاب میں کہی۔ انہوں نے آپریشن بنیان مرصوص کی کامیابی پر اظہار تشکر کیا۔
اپنے خطاب میں انہوں ںے کہا کہ بھارت نے جنگ کی شروعات کی اختتام پاکستان نے کیا یہ اتنا تاریخی معرکہ ہے کہ یوم تشکر چلتے رہیں گے یہ ایسی فتح ہے جس کا جشن چلتا رہے گا کسی نے 65 تو کسی نے 71 کی جنگ دیکھی یہ میری زندگی کی پہلی جنگ جو میں نے دیکھی، اکیاون سال کی عمر میں کوئی پوچھے تاریخی خوشی کا لمحہ پاک فوج کے ہاتھوں بھارت کو دھونے پر ہوئی اس روز کی خوشی کو نہیں بھول سکتے۔
شرجیل میمن نے کہا کہ ہم جنگ کے خلاف ہیں ہماری جماعت بھی تشدد اور جنگ کے خلاف ہے، پاکستان پر حملے کی پوری پوری رات جاگتا رہا، حملے پر مذمت کی بات کی پھر بھارت کا طیارہ گرنے کی اطلاع آگئی، وقفے وقفے سے طیارے گرنے کی اطلاعات آتی رہیں، ڈی جی آئی ایس پی آر نے بھارت کو جواب ہماری مرضی ہمارے وقت اور مرضی کے مقام پر دینے کا کہا۔
انہوں نے کہا کہ سیزفائر کے اعلان پر مزہ نہیں آیا، بھارت کی ایسی دھلائی ہورہی تھی کہ مزہ آگیا، ایسی خوشی کسی تہوار پر نہیں ہوتی، جنگ کے بعد چین اور دبئی جانا ہوا اب پاکستانی پاسپورٹ پر دنیا گھومنے کا مزہ ہی الگ ہے کیوں کہ امیگریشن پر ہمارا گرین پاسپورٹ دیکھ کر کہا گیا ویلڈن پاکستان اور کسی جگہ پاکستانیوں کے ساتھ بھارتی ملے تو ان کے منہ دیکھنے والے تھے ان کو ایسا لگ رہا کہ پاکستانی ان کا منہ چڑا رہا ہے پاکستانیوں کو دیکھ کر ان کے منہ لٹک جاتے ہیں اب آپ کو پاکستانی پاسپورٹ پر سفر کرنے کا مزہ آئے گا۔
شرجیل میمن نے کہا کہ پاکستان کی تمام سیاسی قیادت اور پوری قوم نے اپنے اتحاد سے ملک کا دفاع کیا، مختصر وقت میں پاکستان نے بھارت کو دھویا، اگر یہ جنگ دو چار روز اور چلتی تو بھارت صفحہ ہستی سے مٹ جاتا، پوری قوم اپنے اپنے ہتھیاروں سے بھارت کے خلاف لڑ رہی تھی، قلم ہتھیار، سوشل میڈیا اور بزرگوں نے اپنی دعاؤں سے اس جنگ میں حصہ ڈالا۔
انہوں نے کہا کہ کل ہم نے یوم تکبیر منایا یہ پوری پاکستان کی فتح تھی، ایٹمی پروگرام کی بنیاد قائد عوام ذوالفقار علی بھٹو تھے ان پر بہت بین الاقوامی دباؤ تھا وہ وہ پوری مسلم امہ کہ کامن کرنسی بنانے جارہے تھے، ہم نے اپنے ہیرو کھوئے ہیں، ذوالفقار بھٹو ہمارے درمیان ہوتے تو پاکستان نہ جانے کہاں سے کہاں ہوتا، پاکستان نے جن ممالک کو تربیت دی وہ بھی آگے بڑھ گئے۔
انہوں ںے کہا کہ اسی طرح شہید بے نظیر بھٹو نے میزائل ٹیکنالوجی دی، خارجہ محاذ پر بلاول بھٹو نے مثالی جنگ لڑی انہوں نے بین الاقوامی پلیٹ فارم پر مودی کو گجرات کا قصاب کہا بی جے پی نے بلاول بھٹو کے سر کی قیمت مقرر کی بلاول بھٹو اس کے باوجود بھارت گئے اور کشمیر کا مقدمہ بہادری سے لڑا پاکستانیوں نے ثابت کیا سیاسی اختلافات ہوسکتے ہیں لیکن وطن پر بات آئے تو تمام اختلافات پس پشت رکھتے ہیں۔
انہوں ںے کہا کہ جنگ کے دوران جھوٹ پھیلانے کی وجہ سے عالمی سطح پر بھارتی میڈیا پر پابندی ہونی چاہیے، میڈیا باڈیز برطانیہ اور امریکا میں بھارتی میڈیا کے خلاف ہتک عزت کے مقدمات دائر کریں جہاں جہاں بھارتی چینلز دیکھے جاتے ہیں ان ملکوں میں مقدمات کیے جائیں تاکہ بھارتی چینلز پر جرمانے ہوں۔
.
ذریعہ
ذریعہ: Express News
کلیدی لفظ: بھارتی میڈیا شرجیل میمن نے کہا کہ انہوں نے کے خلاف جنگ کے
پڑھیں:
حکومت نے نیشنل امیگریشن اینڈ ویلفیئر پالیسی 2026 کا اجرا کر دیا
وفاقی وزیر اوورسیز پاکستانیز چوہدری سالک حسین نے نیشنل امیگریشن اینڈ ویلفیئر پالیسی 2026 کا اجرا کر دیا۔تقریب سے خطاب کرتے ہوئے انہوں نے کہا کہ آج کا دن پاکستان میں لیبر مائیگریشن کے نظم و نسق کو مضبوط بنانے کی جانب ایک اہم سنگ میل ہے۔ یہ پالیسی ہر اس پاکستانی سے کیے گئے قومی عزم کی عکاس ہے جو بہتر مواقع کی تلاش میں اپنا گھر چھوڑتا ہے۔انہوں نے کہا کہ محفوظ اور منظم نقل مکانی، مہارتوں کی ترقی، کارکنوں کا تحفظ، تارکینِ وطن کی شمولیت اور وطن واپس آنے والوں کی بحالی اس پالیسی کے بنیادی ستون ہیں۔ تکنیکی جدت، آبادیاتی تبدیلیاں اور لیبر مارکیٹ کے بدلتے ہوئے تقاضے دنیا بھر کی معیشتوں کو نئی شکل دے رہے ہیں. اس لیے پاکستان کو اپنی افرادی قوت کو آج اور مستقبل دونوں کے مواقع کے لیے تیار کرنا ہوگا۔ ان کا کہنا تھا کہ نیشنل امیگریشن اینڈ ویلفیئر پالیسی 2026 اس سمت میں ایک اہم قدم اور پاکستان کی افرادی قوت کو مستقبل کے تقاضوں سے ہم آہنگ کرنے میں سنگ میل ثابت ہوگی۔چوہدری سالک حسین نے کہا کہ ایک کروڑ 20 لاکھ پاکستانی دنیا بھر میں مقیم ہیں اور اپنی پیشہ ورانہ مہارت، دیانت داری اور محنت کی بدولت پاکستان کے سفیر بن چکے ہیں۔ گزشتہ مالی سال میں سمندر پار پاکستانیوں نے 41 ارب امریکی ڈالر سے زائد کی ترسیلاتِ زر وطن بھیجیں، جو ملکی تاریخ کی بلند ترین رقم ہے۔ انہوں نے کہا کہ بیرون ملک مقیم پاکستانیوں کی کامیابی پاکستان کی کامیابی ہے اور ان کی فلاح و بہبود ہماری قومی ذمہ داری ہے۔انہوں نے کہا کہ یہ پالیسی اداروں، تجربات اور شراکت داریوں کو ایک مشترکہ وژن کے تحت یکجا کرتی ہے تاکہ ہر پاکستانی کارکن نقل مکانی کے پورے سفر کے دوران بہتر طور پر تیار، محفوظ اور معاونت یافتہ ہو۔ اس پالیسی کا محور ہر اس پاکستانی کا سفر ہے جو مواقع کی تلاش میں اپنا گھر چھوڑتا ہے، جبکہ ذمہ داری روانگی سے پہلے ہی شروع ہو جاتی ہے، جہاں نوجوان کارکنوں کو متعلقہ مہارتیں، قابلِ اعتماد معلومات اور اخلاقی بھرتی تک رسائی فراہم کی جائے گی۔وفاقی وزیر نے کہا کہ اس پالیسی کی کامیابی وفاقی اور صوبائی حکومتوں، نفاذ کرنے والے اداروں، آجروں، تربیتی اداروں، ترقیاتی شراکت داروں، نجی شعبے اور سمندر پار پاکستانیوں کے باہمی تعاون سے مشروط ہے۔ انہوں نے صوبائی حکومتوں، آئی سی ایم پی ڈی (ICMPD)، دیگر ترقیاتی شراکت داروں اور تمام اسٹیک ہولڈرز کا مشاورتی عمل میں تعاون پر شکریہ ادا کیا، جبکہ اسپیشل انویسٹمنٹ فیسیلیٹیشن کونسل (SIFC) کی مسلسل معاونت کو بھی سراہا۔انہوں نے کہا کہ ہجرت یا نقل مکانی غیر یقینی کا سفر نہیں بلکہ مواقع، وقار اور قومی ترقی کا راستہ ہونا چاہیے۔ آئیں مل کر ایسا مستقبل بنائیں جہاں ہر پاکستانی اعتماد کے ساتھ بیرون ملک جائے، فخر کے ساتھ وطن واپس آئے اور ہمیشہ ایک ایسی قوم سے جڑا رہے جو اس کی خدمات کی قدر اور عزت کرتی ہو۔ انہوں نے دعا کی کہ اللہ تعالیٰ اس وژن کو عوام کے لیے بامعنی ترقی، پاکستان کے لیے دیرپا خوشحالی اور ہر سمندر پار پاکستانی اور اس کے خاندان کے روشن مستقبل کا ذریعہ بنائے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار