ساہیوال میں بھی الیکٹروبس سروس شروع
اشاعت کی تاریخ: 23rd, September 2025 GMT
لاہور + ساہیوال (نیوز رپورٹر+نوائے وقت رپورٹ + نمائندہ نوائے وقت) وزیراعلیٰ مریم نواز نے ساہیوال میں الیکٹرک بس پراجیکٹ کی افتتاحی تقریب سے خطاب کیا اور اہم اعلانات کیے۔ مریم نواز نے ساہیوال ڈویژن کے لئے 62 اور ساہیوال شہر کو 30 الیکٹرک بسیں دینے کا اعلان کیا۔ خواتین، طلبہ، بزرگوں اور سپیشل افراد کے لئے مفت سفر، ساہیوال میں انٹروینشنل کارڈیک سرجری کے آغاز کا اعلان کیا۔ وزیراعلیٰ نے خطاب میں کہا کہ ڈسٹرکٹ ہیڈکوارٹر ہسپتال ساہیوال میں کیتھ لیب، انجیو گرافی اور انجیو پلاسٹی کا پروسیجر شروع ہورہا ہے۔ ساہیوال میں موجود دل کے مریضوں کو علاج کے لئے اب کہیں باہر نہیں جانا پڑے گا۔ نواز شریف اور عوام کا رشتہ اٹوٹ ہے اور دن بدن مزید مضبوط ہو رہا ہے۔ پاکستان سے نواز شریف کی خدمات نکال دیں تو کھنڈرات ہی بچتے ہیں۔ بھارت کو دھول چٹانے پر نواز شریف، شہباز شریف اور عسکری قیادت کا شکریہ ادا کرتے ہیں۔ سعودی عرب ہمارا دوست ملک ہے، حرمین شریفین اور مسجد نبوی ہمارے لئے مقدس مقامات ہیں۔ پاکستان اللہ تعالی کے فضل و کرم سے محافظ حرمین شریفین کا درجہ حاصل کر چکا ہے۔ آپریشن بنیان مرصوص کے بعد پوری دنیا میں پاکستان کی عزت بڑھ گئی۔ سعودی عرب کی پاک دھرتی پر محمد شہباز شریف کو اللہ تعالیٰ نے عزت سے نوازا۔ عوام کے خادم کا مطلب عوام کا حقیقی خدمت گزار ہوتا ہے۔ عہدے ملنے کا مطلب دفاتر میں بیٹھنا اور پروٹوکول انجوائے کرنا نہیں بلکہ عوام کے ساتھ کھڑے ہونا ہے۔ عوام میں جائیں گے تو ان کے دکھ سکھ کا اندازہ ہو گا۔ مریم نواز شریف ہر شہر کی یکساں ترقی تک آرام سے نہیں بیٹھے گی۔ ساہیوال کے بہن بھائیوں، بیٹوں، بزرگوں کو محمد نواز شریف کی طرف سلام پیش کرتی ہوں۔ چھوٹے شہر میں الیکٹرک بسیں ملنے پر عوام عید کی طرح خوشیاں منارہے ہیں۔ ساہیوال ڈی ایچ کیو بچوں کی ہلاکت کے افسوسناک واقعہ پر آئی تو پتہ چلا کہ امراض دل کے علاج کی سہولت ہی نہیں۔ بہاولنگر میں فلڈ ریلیف کیمپ کے دورہ کے دوران ریلیف کیمپ میں نومولود بچہ کا نام نواز شریف رکھا گیا ہے۔ ریلیف کیمپ میں بیٹی کی پیدائش ہوئی جس کا نام مریم نواز رکھا۔ نواز شریف نے پورے پنجاب میں موٹرویز اور ایکسپریس وے کے جال بچھائے۔ پنجاب حکومت نے راشن کارڈ کا پروگرام شروع کیا ہے۔ راشن کارڈ پروگرام سے 15 لاکھ افراد کو ماہانہ تین ہزار روپے دیئے جائیں گے۔ سرکاری سکولوں میں ٹیچرز کی کمی پورا کررہے ہیں۔ سکولوں میں کمرے، باتھ روم، کلاس رومز کی کمی کو تین ماہ کے اندر پورا کریں گے۔ پاکستان کی تاریخ کے بد ترین سیلاب کا سامنا کررہے ہیں۔ سیلاب آنے سے پہلے ہم تیار تھے۔ حکومت، ایڈمنسٹریشن، تمام وزراء اور آپ کی چیف منسٹر جاگ رہی تھی۔ سیلاب زدہ علاقوں سے 28 ملین افراد کو نکال کر محفوظ مقامات پر منتقل کیا۔ سیلاب زدہ علاقوں میں سروے شروع کرنے کے لئے2 ہزار سے زائد ٹیمیں تشکیل دی گئی ہیں۔ سیلاب میں پورا پکا گھر گرنے پر 10 لاکھ، کچا گھر گرنے پر پانچ لاکھ روپے دیئے جائیں گے۔ بڑے جانور کے ہلاک ہونے پر پانچ لاکھ اور چھوٹے جانور پر 50ہزار روپے دیئے جائیں گے۔ کسانوں کی فصلوں کے نقصان پر 20 ہزار فی ایکڑ دیا جائے گا۔ حکومت کسی بھی سیلاب زدہ فرد کو تنہا نہیں چھوڑے گی۔ وزیراعلیٰ حکمران بعد میں پہلے عوام کا خادم ہوتا ہے۔ ایک حکمران کو عوام کے دکھ، تکلیف اور خوشی میں ان کے ساتھ ہونا چاہیے۔ عوام کے اندر جاؤگے تو پتہ چلے گا کہ عوام کس مصیبت سے گزر رہی ہے۔ دفتروں میں بیٹھے میٹنگ کرنے والے کس لحاظ سے عوام کے خدمتگار ہیں۔ علاوہ ازیں ماحول دوست اورگرین پاکستان کے تحت ’’ساہیوال میں الیکٹرو بس سروس شروع‘‘ کردی گئی۔ پہلے جدید ترین الیکٹرو بس پراجیکٹ کا افتتاح اور سروس پر سفر کیا۔ وزیراعلیٰ کی آمد پر ساہیوال میں جوش و خروش دیدنی تھا اور سڑک کے اطراف میں ہزاروں لوگوں کا مجمع امڈ آیا۔ عوام نے ساہیوال میں الیکٹروبس سروس کے آغاز پر زبردست مسرت کا اظہار کیا۔ ہزاروں نوجوان ساہیوال کی پہلی الیکٹرک بس کے ساتھ ساتھ چلتے رہے۔ علاوہ ازیں مریم نواز شریف نے پی ڈی ایم اے کے آفیسر عبدالرحمن کے دوران ڈیوٹی دل کا دورہ پڑنے سے جاں بحق ہونے پر گہرے دکھ و رنج کا اظہارکیا ہے اور عبدالرحمن کے ورثاء کیلئے ایک کروڑ روپے مالی امداد کا اعلان کیا ہے۔ مزید براں مریم نواز شریف بہاولنگر میں ٹیکنیکل ٹریننگ انسٹی ٹیوٹ فلڈ ریلیف کیمپ پہنچ گئیں۔ ریلیف کیمپ میں پیدا ہونے والے بچوں کے والدین سے ملاقات کی، مبارکباد اور بہت سی دعائیں دیں۔ وزیر اعلیٰ نے صنعت زار مرکزکا دورہ کیا۔ سلائی کڑھائی کرنے والی خواتین سے خوشگوار موڈ میں گفتگو کی۔ مریم نواز نے سلائی مشین پر کپڑے کی سلائی کی اور فریم میں لگے کپڑے پر سوئی سے کڑھائی بھی کی اور سلائی کڑھائی پر خوشی کا اظہارکیا۔ وزیراعلیٰ نے سیلاب متاثرین سے ملاقات کی اور سہولتوں کی فراہمی بارے دریافت کیا۔ خواتین کے ساتھ بیٹھ گئیں، بچوں سے اظہار شفقت کیا اور عارضی کلاسوں کے معصوم بچوں میں گھل مل گئیں۔ مریم نواز سے ملنے پر معصوم بچوں نے اظہار مسرت کیا اور پنسل سے بنے سکیچ پیش کئے۔ مریم نواز نے سیلاب متاثرہ خواتین اور بچوں‘ عارضی ہسپتال میں داخل مریضوں کی عیادت کی اور تحائف پیش کئے۔ بچوں اور خواتین کے ساتھ دستر خوان پر کھانا بھی کھایا۔
.
ذریعہ
ذریعہ: Nawaiwaqt
کلیدی لفظ: مریم نواز نے ساہیوال میں ریلیف کیمپ الیکٹرک بس نواز شریف جائیں گے عوام کے کے ساتھ کی اور کے لئے
پڑھیں:
ایران کے شہید سپریم لیڈر علی خامنہ ای کی تدفین مشہد میں ہوگی، تیاریاں شروع
ایران کے شہید سپریم لیڈر آیت اللہ سید علی خامنہ ای کی تدفین تین بڑے شہروں ایران، قم اور مشہد میں نماز جنازہ کے بعد مشہد میں امام رضا کے مزار میں ہوگی، جس کے لیے حکام کی جانب سے تیاریاں شروع کی گئی ہیں۔
ایرانی میڈیا کی رپورٹ کے مطابق ایران کے دارالحکومت تہران کے سماجی و ثقافتی امور کے نائب محمد امین توکلی زادہ نے بتایا کہ شہید سپریم لیڈر آیت اللہ علی خامنہ کی تدفین کے لیے تیاریاں جاری ہیں اور صرف دارالحکومت تہران میں ڈیڑھ سےدو کروڑ (15 سے 20 ملین) لوگوں کے لیے تیاریاں جاری ہیں۔
انہوں نے کہا کہ ہم دنیا کے انتہائی استکبار مخالف رہنما، امریکا اور اسرائیل کے خلاف جنگ کے عظیم کمانڈر اور ایران کے عظیم قابل تقلید رہنما کے جنازے میں شریک ہو رہے ہیں۔
امین توکلی زادہ نے کہا کہ مختلف صوبوں کی جانب سے جنازے کی میزبانی کے لیے درخواستیں کی گئی ہیں اور تدفین ممکنہ طور پر ذوالحج کے اختتام اور محرم کے شروع میں ہوگی۔
انہوں نے کہا کہ تہران میں نماز جنازے کا پروگرام تقریباً 24 گھنٹوں تک جاری رہے گا، ہم شیعہ مسلمانوں کا ایک بہت بڑا اجتماع دیکھیں گے اور یہاں تک کہ تمام مسلمانوں کا ایک عظیم اجتماع ہوگا۔
رپورٹ میں بتایا گیا کہ آیت اللہ علی خامنہ ای کی نماز جنازے میں ہمسایہ ممالک بشمول پاکستان، افغانستان، بھارت، بنگلہ دیش اور کشمیر سے بڑی تعداد میں سوگواروں کی شرکت کا امکان ہے۔
یاد رہے کہ ایران کے سابق سپریم لیڈر آیت اللہ علی خامنہ ای 28 فروری کو امریکا اور اسرائیل کے حملے میں شہید ہوگئے تھے جب ایران پر اچانک حملہ کیا گیا تھا اور بم باری کے نتیجے میں آیت اللہ علی خامنہ ای کے علاوہ ان کے خاندان کے چند انتہائی قریبی ارکان سمیت پاسداران انقلاب کے اعلیٰ کمانڈرز بھی شہید ہوگئے تھے۔
امریکا اور اسرائیل کے اس حملے میں مناب میں لڑکیوں کے ایک اسکول پربھی بم باری کی گئی تھی، جس کے نتیجے میں اسکول کی بچیوں سمیت 165 افراد شہید ہوگئے تھے، جبکہ ایران نے جواب میں اسرائیل اور خطے کے ممالک میں قائم امریکی اڈوں پر حملے شروع کیے تھے۔
پاکستان کی ثالثی میں اپریل میں امریکا اور ایران نے جنگ بندی پر اتفاق کیا اور دونوں اطراف سے حملے روک دیے گئے تاہم ایران نے آبنائے ہرمز کا کنٹرول اپنے پاس رکھا جبکہ امریکا نے ناکہ بندی کی جو تاحال جاری ہے لیکن مخصوص جہازوں کو گزرنے کی اجازت دی جاتی ہے۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ