وزیراعلیٰ پنجاب کی زبان اور لہجہ بالکل مناسب نہیں، قمر زمان کائرہ
اشاعت کی تاریخ: 1st, October 2025 GMT
فوٹو: اسکرین گریب
پاکستان پیپلز پارٹی (پی پی پی) کے رہنما قمر زمان کائرہ کا کہنا ہے کہ وزیراعلیٰ پنجاب کی زبان، الفاظ اور لہجہ بالکل مناسب نہیں، ان کے مکالمے کے جواب میں سندھ سے بھی ایسا جواب آیا تو کیا ہوگا۔
لاہور میں پریس کانفرنس کرتے ہوئے قمر زمان کائرہ نے کہا کہ ن لیگ اور اپنے ساتھیوں سے گزارش ہے تنقید ضرور کریں لیکن وہ الفاظ استعمال نہ کریں جو ماضی میں کیے گئے۔
انہوں نے کہا کہ بلاول بھٹو نے بڑے تحمل سے چیزوں کو آگے لے جانے کی کوشش کی اور کررہے ہیں، ہم صورت حال کو نہ پہلے خراب کرنا چاہتے تھے نہ اب کرنا چاہتے ہیں، جہاں کہیں کوئی غلطی ہوگی ہم رائے دیں گے، رائے نہیں مانی گئی تو تنقید اور احتجاج کریں گے۔
پی پی رہنما نے کہا کہ کچھ دن پہلے جو مکالمہ شروع ہوا ہے اس کا کسی کو کوئی فائدہ نہیں ہوگا، ہم نے نیک نیتی سے حکومت کا ساتھ دینے کا فیصلہ کیا تھا، ہم نے وزارتیں لیے بغیر حکومت کا ساتھ دینے کا فیصلہ کیا۔
انہوں نے کہا کہ بد قسمتی سے حکومت کے ساتھ کیے گئے معاہدے کی تمام شقوں پر عملدرآمد نہیں ہوا، ہم نے حکومت کو ہر مقام پر سپورٹ کیا، کوئی احسان نہیں کیا، اس کا مطلب کوئی بلینک چیک دینا نہیں تھا کہ حکومت جو چاہے کرتی رہے گی۔
قمر زمان کائرہ نے کہا کہ ہم حکومت سے پاور شیئرنگ نہیں کر رہے لیکن ان کو سپورٹ کررہے ہیں، ہم پہلے جس طرح حکومت سے الگ ہوئے تھے وہ یاد ہے بھولے نہیں۔
پی پی رہنما نے کہا کہ ہم خود بھی تو پنجاب سے ہیں، ہماری تنقید پر آپ سیخ پا ہوتے ہیں اور کہتے ہیں میں چھوڑوں گی نہیں، ہماری رائے پر سندھ حکومت کو ٹارگٹ کیا گیا، این ایف سی کے پیسے پر بات کی گئی، سیلاب میں پیپلز پارٹی ہر قدم پر آپ کے ساتھ کھڑی رہی، بلاول بھٹو کے قصور میں سیلاب سے متاثرہ علاقوں کے دورے میں انتظامیہ کا رویہ مناسب نہیں تھا، بلاول نے اس کے باوجود وزیراعلیٰ پنجاب کا نام لے کر ان کے کام کی تعریف کی۔
انہوں نے کہا کہ بی آئی ایس پی پروگرام کے ذریعے تو ابتدائی امداد دی جاتی ہے، آپ کو سیلاب متاثرین کو لاکھوں روپے دینا ہیں تو آپ دیں، بی آئی ایس پی پروگرام صرف پیپلز پارٹی کا نہیں ہے، دنیا بھر میں بی آئی ایس پی غربت کی روک تھام کے پروگرامز میں نمبر ون ہے، اگر ہم تجویز دیتے ہیں تو آپ کہتے ہیں پنجاب پر کوئی انگلی اٹھی تو توڑ دیں گے، ہم آپ کے طریقہ کار پر اعتراض کررہے ہیں آپ اس کو پنجاب پر حملہ کہہ رہے ہیں۔
پی پی پی رہنما نے کہا کہ جو اختلاف جتنا ہو اسے اتنا ہی رکھنا چاہیے، آپ ہماری بہن اور بیٹی ہیں آپ اپنے لہجے پر غور کریں، آپ صرف سی ایم پنجاب نہیں، نواز شریف کی بیٹی اور شہباز شریف کی بھتیجی ہیں، آپ کے منہ سے نکلے الفاظ ن لیگ کا موقف ہے، آپ کی زبان، آپ کے الفاظ اور آپ کا لہجہ بالکل مناسب نہیں، آپ کے مکالمے کے جواب میں سندھ سے بھی ایسا جواب آیا تو کیا ہوگا، کیا ہم زبانیں بند کرکے بیٹھ جائیں، آپ حکومت کریں لیکن باقی لوگوں کا حق نہ ختم کریں۔
.ذریعہ: Jang News
کلیدی لفظ: قمر زمان کائرہ مناسب نہیں نے کہا کہ
پڑھیں:
دہشتگردی ہار گئی، کھیل اور امن جیت گیا، سازشیں ہمیشہ ناکام ہوں گی: مریم نواز
لاہور (نوائے وقت رپورٹ) وزیراعلی مریم نواز نے سری لنکا کیخلاف ون ڈے سیریز جیتنے پر قومی کرکٹ ٹیم کو مبارکباد دی ہے۔ وزیراعلیٰ نے سری لنکن ٹیم کی سپورٹس مین سپرٹ کو زبردست خراج تحسین پیش کیا اور کہاکہ مہمان ٹیم کا کرکٹ سے لگاؤ قابل تحسین ہے۔ مریم نواز نے کہاکہ دہشت گردی ہار گئی، کھیل اور امن جیت گیا۔ امن کو جیتنا ہی ہو گا، دہشتگردوں کی سازشیں ہمیشہ ناکام ہوں گی۔ ون ڈے کرکٹ سیریز میں پاکستانی ٹیم نے شاندار کھیل پیش کر کے شائقین کو محظوظ کیا۔ بابر اعظم کی شاندار سینچری کی جتنی تعریف کی جائے کم ہے۔ دعا ہے پاکستانی ٹیم فتوحات کا سلسلہ برقرار رکھے۔ علاوہ ازیں مریم نواز نے پنجاب بار کونسل کے انتخابات میں فاتح انڈیپنڈنٹ گروپ کو مبارکباد دی ہے۔ وزیراعلیٰ مریم نواز شریف نے نو منتخب ارکان پنجاب بار کونسل کے لئے نیک تمناؤں کا اظہارکیا اور کہا امید ہے کہ نو منتخب ارکان قانون کی سر بلندی کے لیے اپنا کردار ادا کرتے رہیں گے۔
90 کروڑ کا محض ایک سین جو فلم کا حصہ بھی نہ بن سکا، یہ فلم کونسی تھی؟