بلوچستان کابینہ کا 19واں اجلاس، متعدد اہم فیصلے
اشاعت کی تاریخ: 16th, October 2025 GMT
اجلاس میں دفعہ 144 میں ترمیم، انسداد جنسی جرائم یونٹس کے قیام اور بلوچستان کنٹرول آف نارکوٹکس سبسٹینس بل سمیت دیگر صوبائی امور پر بحث ہوئی۔ اسلام ٹائمز۔ بلوچستان کی صوبائی کابینہ نے حالیہ افغان جارحیت کی شدید مذمت کی گئی اور پاک فوج کی بروقت اور مؤثر کارروائی پر مکمل اطمینان کا اظہار کیا گیا۔ صوبائی کابینہ کا 19واں اجلاس وزیراعلیٰ بلوچستان سرفراز بگٹی کی زیر صدارت منعقد ہوا، جس میں اجلاس کے شرکاء نے ملک کے دفاع میں جان قربان کرنے والے شہداء کے لیے دعا بھی کی۔ وزیراعلیٰ سرفراز بگٹی نے کہا کہ 1947 سے اب تک افغانستان کی ہر حکومت نے پاکستان کے خلاف معاندانہ رویہ برقرار رکھا ہے۔ انہوں نے کہا کہ پاکستان نے دہائیوں تک افغان مہاجرین کی میزبانی کی، مگر بدلے میں ہمیشہ دشمنی ملی۔ انہوں نے واضح کیا کہ افغان مہاجرین کی واپسی کا فیصلہ حتمی ہے اور یہ اقدام وفاقی حکومت کی ہدایت کے مطابق بلوچستان میں مکمل طور پر نافذ کیا جائے گا۔
اجلاس میں شفاف طرز حکمرانی اور عوامی فلاح کے لیے متعدد اہم فیصلے کیے گئے۔ دفعہ 144 میں ترمیم کی منظوری دی گئی، جس کے تحت ڈپٹی کمشنر 30 دن، کمشنر 60 دن اور ایڈیشنل چیف سیکرٹری داخلہ 90 دن کے لئے اس کا نفاذ کرسکیں گے۔ ماحولیاتی تحفظ کے حوالے سے ایک اہم پیش رفت کے طور پر کابینہ نے مینگرو فاریسٹ ایریا میں توسیع کی منظوری دی۔ اجلاس میں انسداد جنسی جرائم یونٹس کے قیام اور خواتین کے تحفظ کے لئے خصوصی فورس کی تشکیل کی بھی منظوری دی گئی۔ اس کے علاوہ بلوچستان کنٹرول آف نارکوٹکس سبسٹینس بل 2025 منظور کیا گیا، تاکہ منشیات کی اسمگلنگ پر مؤثر قابو پایا جا سکے، جبکہ صوبائی وزیر ظہور بلیدی کی سربراہی میں ایک کمیٹی قائم کی گئی جو سستین ایبل فشریز اینڈ ایکو کلچر بل کو حتمی شکل دے گی۔
کابینہ نے نکاح نامہ فارم ٹو میں ترمیم، بلوچستان اوور سیز پاکستانیز کمیشن بل 2025 اور بلوچستان یوتھ پالیسی پر عملدرآمد کے لئے فنڈز کے اجراء کی منظوری دی۔ اس کے ساتھ ہی مائنز اینڈ منرلز سیکٹر کو باقاعدہ صنعت کا درجہ دے دیا گیا، تاکہ سرمایہ کاری اور روزگار کے مواقع میں اضافہ ہو۔ علاوہ ازیں، اجلاس میں گوادر پریس کلب کے صحافیوں کے لئے جرنلسٹ کالونی اور بلوچستان لینڈ لیز پالیسی 2025 کی بھی منظوری دی گئی۔ وزیراعلیٰ سرفراز بگٹی نے اس عزم کا اظہار کیا کہ صوبائی حکومت شفاف طرز حکمرانی، ادارہ جاتی اصلاحات اور ایک خوشحال و مستحکم بلوچستان کے لیے عملی اقدامات جاری رکھے ہوئے ہے۔
ذریعہ: Islam Times
پڑھیں:
عمران خان سے ملاقات کی اجازت نہ ملنے پر خیبر پختونخوا کابینہ کا ہنگامی اجلاس طلب
پشاور:خیبر پختون خوا کابینہ کا ہنگامی اجلاس آج طلب کر لیا گیا، جس میں بانی چیئرمین سے ملاقات کی اجازت نہ ملنے اور سیاسی صورتحال پر غور کیا جائے گا۔
معاون خصوصی برائے اطلاعات شفیع جان نے بتایا کہ وزیراعلیٰ خیبر پختونخوا نے کابینہ کا اجلاس طلب کیا ہے۔
وزیراعلیٰ نے پی ٹی آئی کی پارلیمانی پارٹی اور پارٹی کابینہ کا بھی اجلاس آج بلایا ہے، کابینہ اجلاس کے بعد وزیراعلیٰ میڈیا کو فیصلوں سے آگاہ کریں گے۔
ایف سی ہیڈکوارٹر پر حملہ؛ شواہد کے مطابق دہشت گرد افغان تھے، آئی جی خیبر پختونخوا