خیبر پختونخوا: پی ٹی آئی سے دوری، کیا علی امین گنڈاپور پارٹی چھوڑ رہے ہیں؟
اشاعت کی تاریخ: 12th, December 2025 GMT
وزیرِاعلیٰ خیبر پختونخوا کے عہدے سے ہٹائے جانے کے بعد پاکستان تحریکِ انصاف کے بانی عمران خان کے دیرینہ اور قابلِ اعتماد ساتھی سمجھے جانے والے اور عمران خان کی رہائی کے لیے احتجاجی تحریک چلانے والے علی امین گنڈاپور نہ صرف پارٹی رہنماؤں سے دور ہیں بلکہ عمران خان کی رہائی کے لیے ہونے والے احتجاج اور جلسوں میں بھی نظر نہیں آ رہے۔
یہ بھی پڑھیں: پی ٹی آئی اندرونی اختلافات کا شکار، علی امین گنڈاپور کا پارٹی سے قطع تعلق، معاملہ کیا ہے؟
پارٹی جلسوں اور سیاسی منظرنامے سے مسلسل غائب رہنے کے باعث یہ خیال کیا جارہا ہے کہ علی امین گنڈاپور ممکنہ طور پر پارٹی چھوڑنے پر غور کررہے ہیں۔ کچھ اطلاعات کے مطابق وہ پی ٹی آئی کے اندر ہی ایک فارورڈ بلاک بنانے کی کوشش بھی کررہے ہیں۔
سابق وزیرِ اعلیٰ کے قریبی حلقوں کا کہنا ہے کہ علی امین گنڈاپور عمران خان اور پارٹی قیادت سے شدید ناراض ہیں، اور اسی وجہ سے وہ عمران خان کی رہائی کے لیے احتجاجی سرگرمیوں میں حصہ نہیں لے رہے۔ ان کی سرگرمیاں اس وقت صرف اپنے آبائی ضلع تک محدود ہیں اور پارٹی سے ان کا رابطہ بھی نہ ہونے کے برابر ہے۔ ان کے ایک قریبی ساتھی کے مطابق علی امین کے پاس اس وقت کوئی عہدہ نہیں ہے۔
کیا علی امین واقعی پی ٹی آئی چھوڑ رہے ہیں؟
اگرچہ سابق وزیرِاعلیٰ علی امین گنڈاپور نے ابھی تک پارٹی کے خلاف کوئی بیان نہیں دیا، لیکن پی ٹی آئی کے اندر ان کے بارے میں شکوک و شبہات بڑھ رہے ہیں۔
پارٹی کے ایک سینئر رہنما کے مطابق علی امین عمران خان کے انتہائی قریبی اور قابلِ اعتماد ساتھی سمجھے جاتے ہیں، لیکن جس طرح بغیر کسی مشاورت کے انہیں ایک وکیل کی جانب سے اعلان کے ذریعے وزارتِ اعلیٰ سے ہٹایا گیا، اسے وہ اپنی بے عزتی سمجھ رہے ہیں۔ ان کے دوبارہ پارٹی سرگرم ہونے کے امکانات بھی بہت کم بتائے جارہے ہیں۔
یہ بھی پڑھیں: علی امین گنڈاپور اور سہیل آفریدی میں کیا فرق ہے؟
رہنما کے مطابق جب عمران خان نے سہیل آفریدی کو وزیرِ اعلیٰ نامزد کیا تو پارٹی میں فکر تھی کہ کہیں علی امین گنڈاپور انکار نہ کریں یا کوئی فارورڈ بلاک نہ بنا دیں، لیکن اس وقت انہوں نے عمران خان کے فیصلے کو تسلیم کر لیا۔ تاہم اب بھی ان کے راستے جدا ہونے کا امکان موجود ہے۔
نوجوان صحافی محمد فہیم کے مطابق علی امین گنڈاپور کی سیاست عمران خان سے شروع ہوئی اور اب بھی عمران خان ہی ان کا سیاسی محور ہیں۔ ان کے مطابق فی الحال علی امین کے پارٹی چھوڑنے کے امکانات بہت کم ہیں کیونکہ ان کے پاس زیادہ آپشنز نہیں ہیں۔
فہیم کا کہنا ہے کہ علی امین ناراض ضرور ہیں اور جس طرح انہیں ہٹایا گیا وہ درست نہیں تھا، لیکن پارٹی چھوڑنا ان کے لیے اس سے بھی زیادہ نقصان دہ ہوگا۔
کیا علی امین کو کوئی پیشکش ہوئی ہے؟
سابق وزیرِ اعلیٰ کے قریبی ساتھی کے مطابق علی امین کو ہٹانے سے ایک ہفتہ قبل عمران خان سے ملاقات ہوئی تھی جس میں کابینہ میں ردوبدل کی اجازت دی گئی تھی، لیکن ہٹانے سے متعلق کوئی بات نہیں ہوئی تھی۔ عہدے سے ہٹائے جانے کے بعد انہیں متعدد پیشکشیں ہوئیں، یہاں تک کہ وفاق کی جانب سے بھی رابطہ کر کے انہیں وزیرِ اعلیٰ برقرار رکھنے اور تعاون کی یقین دہانی کرائی گئی۔
ساتھی کے مطابق علی امین نے متعدد پیش کشوں کے باوجود عمران خان سے وفاداری نبھائی اور کوئی پیش کش قبول نہیں کی۔
یہ بھی پڑھیں: وزارت اعلیٰ سے ہٹنے کے بعد اب علی امین گنڈاپور کیا کررہے ہیں؟
محمد فہیم بھی اس موقف سے اتفاق کرتے ہیں۔ ان کے مطابق سہیل آفریدی کی نامزدگی کچھ حلقوں کے لیے پریشانی کا باعث تھی، اور علی امین اگر چاہتے تو وزیرِ اعلیٰ رہ سکتے تھے، لیکن اب وقت گزر چکا ہے۔ ان کے مطابق علی امین اس وقت صرف موقع کے انتظار میں ہیں۔
سینئر صحافی عارف حیات بھی فہیم سے کچھ حد تک اتفاق کرتے ہیں۔ ان کا کہنا ہے کہ علی امین جانتے ہیں کہ پی ٹی آئی کے بغیر ان کی سیاست مشکل ہے، کیونکہ جو لوگ پی ٹی آئی سے الگ ہوئے، ان کی سیاست تقریباً ختم ہو گئی۔
علی امین کے پاس کیا آپشنز ہیں؟
عارف حیات کے مطابق علی امین گنڈاپور سیاسی طور پر مضبوط ہو چکے ہیں اور حلقے میں ان کا ووٹ بینک موجود ہے۔ ان کے مطابق اگرچہ پی ٹی آئی کا ووٹ عمران خان کا ہے، لیکن علی امین آزاد حیثیت میں بھی الیکشن لڑ سکتے ہیں۔
وہ کہتے ہیں کہ علی امین اس وقت اپنے حلقے میں بہت فعال ہیں اور اپنی پوزیشن بہتر بنانے کی کوشش کر رہے ہیں۔ انہیں اندازہ ہو چکا ہے کہ ووٹ اب ان کا اپنا ہونا چاہیے، عمران خان کا نہیں۔
یہ بھی پڑھیں: عمران خان نے وزارت اعلیٰ سے کیوں نکالا؟ علی امین گنڈاپور نے خاموشی توڑ دی
عارف کے مطابق علی امین دیگر جماعتوں میں بھی جانے کی گنجائش رکھتے ہیں اور انہیں وہاں قبول بھی کیا جائے گا، لیکن شاید وہ خود ایسا نہ کریں۔ اس وقت ان کے پاس سب سے بہتر آپشن اپنی سیاسی پوزیشن مضبوط کرنا ہی ہے۔ انہوں نے بتایا کہ علی امین نے عمران خان کے ذریعے ہی ڈی آئی خان میں جگہ بنائی اور جے یو آئی اور پیپلز پارٹی کو سخت ٹف ٹائم دیا۔
علی امین کے ترجمان کیا کہتے ہیں؟
سابق وزیرِ اعلیٰ کے ترجمان فراز مغل علی امین کی پارٹی سے دوری کی خبروں کی تردید کرتے ہیں۔ ان کے مطابق علی امین پارٹی میں سرگرم ہیں اور ان دنوں اپنے آبائی ضلع ڈی آئی خان میں موجود ہیں۔ 20 ماہ کی مصروفیت کے دوران وہ حلقے کو وقت نہیں دے سکے تھے اور اب اپنی توجہ وہاں مرکوز کیے ہوئے ہیں۔ ترجمان کے مطابق علی امین آج بھی عمران خان کے ساتھ کھڑے ہیں اور اگر عمران خان کی رہائی کے لیے کال دی گئی تو وہ سب سے آگے ہوں گے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
we news پی ٹی آئی خیبرپختونخوا سابق وزیراعلیٰ سہیل آفریدی علی امین گنڈاپور عمران خان فارورڈ بلاک.
ذریعہ
ذریعہ: WE News
کلیدی لفظ: پی ٹی ا ئی خیبرپختونخوا سابق وزیراعلی سہیل ا فریدی علی امین گنڈاپور فارورڈ بلاک عمران خان کی رہائی کے لیے کے مطابق علی امین علی امین گنڈاپور ہے کہ علی امین یہ بھی پڑھیں عمران خان کے ان کے مطابق علی امین کے پی ٹی آئی ہیں اور رہے ہیں کے پاس
پڑھیں:
بھارت میں ’کاکروچ جنتا پارٹی‘ کیا ہے اور یہ بھارتی حکومت کے لیے دردِ سر کیوں بن گئی ہے؟
گزشتہ ماہ 15 مئی کو بھارتی سپریم کورٹ کے چیف جسٹس سوریا کانت نے ایک سماعت کے دوران جعلی ڈگریوں کے ذریعے مختلف پیشوں میں آ جانے والے لوگوں کو پیراسائٹس قرار دیا تو ان کے اِس بیان نے نہ صرف سوشل میڈیا پر ایک بحث کو جنم دیا بلکہ ایک سیاسی جماعت بھی قائم ہوگئی جس کا نام ’کاکروچ جنتا پارٹی‘ رکھا گیا۔
گوکہ بعد میں بھارتی چیف جسٹس کانت نے وضاحت کی کہ ان کے الفاظ کو غلط انداز میں پیش کیا گیا اور ان کا ہدف تمام بے روزگار نوجوان نہیں تھے بلکہ مخصوص افراد تھے جنہوں نے جعلی اسناد کے ذریعے پیشہ ورانہ شعبوں میں جگہ بنائی لیکن بیان پر آنے والا عوامی ردعمل کم نہیں ہوا۔
مزید پڑھیں: کاکروچ جنتا پارٹی: اکاؤنٹس ہیک، اہلخانہ کو ہراساں کیا جا رہا ہے، بانی بھارتی جین زی اکاؤنٹ
بھارتی حکومت کی جانب سے ’کاکروچ جنتا پارٹی‘ کے خلاف اٹھائے گئے اقدامات ’کاؤنٹر پروڈکٹو‘ ثابت ہو رہے ہیں۔
بھارتی حکومت نے سوشل میڈیا پلیٹ فارمز پر ’کاکروچ جنتا پارٹی‘ کو محدود کرنے کی کوششیں کی ہیں لیکن یہ اقدامات جین زی کو پارٹی سے زیادہ جوڑ رہے ہیں۔
کاکروچ جنتا پارٹی کیسے بنی؟بھارتی چیف جسٹس سوریا کانت کے ریمارکس کے ردعمل میں امریکا میں مقیم بھارتی طالب علم اور تعلقاتِ عامہ کے ماہر ابھیجیت دیپکے نے سوشل میڈیا پر ایک طنزیہ سیاسی پلیٹ فارم قائم کیا جس کا نام ’کاکروچ جنتا پارٹی‘ رکھا گیا۔
ابتدائی طور پر یہ ایک مزاحیہ اور طنزیہ مہم تھی، لیکن چند ہی دنوں میں لاکھوں نوجوان اس میں شامل ہوگئے۔ پارٹی نے اپنے آپ کو بے روزگار، آن لائن رہنے والے اور نظام سے مایوس نوجوانوں کی آواز کے طور پر پیش کیا اور اس کا مقصد روایتی سیاست کا مذاق اڑانا تھا۔
نوجوان نسل میں بڑھتا ہوا غم و غصہ بی جے پی کے سوشل میڈیا پر غلبے کے لیے ایک بڑا چیلنج بن گیا ہے۔
بھارتیہ جنتا پارٹی کی حکومت جس طرح اصل مسائل سے صرفِ نظر کرتے ہوئے تمام مسائل کو مذہب سے جوڑتی چلی آئی ہے اور جس طرح سے اس نے نوجوانوں کی بے روزگاری اور تعلیمی مسائل کو قالین کے نیچے چھپانے کی کوشش کی ہے ’کاکروچ جنتا پارٹی‘ کی مقبولیت نے تمام مفروضے غلط ثابت کر دیے ہیں۔
بھارتی سوشل میڈیا جو زیادہ تر وہاں دائیں بازو سے تعلق رکھنے والے لوگوں کے غلبے میں ہے اور جہاں بی جے پی پر تنقید کو ہندوؤں پر تنقید سے تعبیر کرکے ٹرولنگ اور نفرت کا نشانہ بنایا جاتا ہے، ایسے ماحول کے اندر کاکروچ جنتا پارٹی کا بی جے پی کے سوشل میڈیا غلبے کو توڑنا ایک اہم پیش رفت سمجھا جا رہا ہے۔
کاکروچ جنتا پارٹی اب تک کیا کچھ کر چُکی ہے؟’کاکروچ جنتا پارٹی‘ کے قیام کے بعد محض 2 ہفتوں کے اندر یہ ایک سوشل میڈیا مذاق یا میم مہم سے بڑھ کر ایک قابلِ ذکر سیاسی و سماجی فِنامنا بن گئی ہے۔ لاکھوں نوجوانوں نے آن لائن اس کی رکنیت اختیار کی جبکہ انسٹاگرام، ایکس اور دیگر پلیٹ فارمز پر اس کے صفحات نے غیر معمولی مقبولیت حاصل کی۔
چند ہی دنوں میں اس کے انسٹاگرام فالوورز کی تعداد کروڑوں تک جا پہنچی ہے۔ کاکروچ جنتا پارٹی جو تاحال ایک غیر منظم تحریک کی شکل میں موجود ہے اس نے بے روزگاری، نوکریوں کے لیے مقابلے کے امتحانات میں مبینہ بے ضابطگیوں، پرچہ لیک اسکینڈلز، مہنگائی اور نوجوانوں کے معاشی مسائل کو اپنی مہم کا مرکزی موضوع بنایا۔
حکومت کی جانب سے اس کے ایکس اکاؤنٹ کو بھارت میں محدود یا معطل کیے جانے کے بعد معاملہ مزید توجہ کا مرکز بن گیا اور اس اقدام کو عدالت میں چیلنج کیا گیا، جس کے نتیجے میں آزادیِ اظہار اور سوشل میڈیا سنسرشپ پر نئی بحث چھڑ گئی۔
ادھر دہلی، ممبئی، پونے، بنگلورو اور دیگر شہروں میں نوجوانوں نے علامتی احتجاجی سرگرمیوں کا انعقاد کیا جہاں بعض شرکا نے کاکروچ کے ماسک اور ملبوسات پہن کر خود کو اس متنازع اصطلاح سے منسلک کیا جس نے اس تحریک کو جنم دیا تھا۔
تحریک کے بانی ابھجیت دیپکے نے خدشہ ظاہر کیا کہ بھارت واپسی کی صورت میں انہیں قانونی کارروائی یا گرفتاری کا سامنا کرنا پڑ سکتا ہے۔
اس تمام عرصے میں کاکروچ جنتا پارٹی نے نوجوان نسل کے سوالات کو ایک منظم اور نمایاں ڈیجیٹل آواز فراہم کردی، جس کے باعث یہ معاملہ اب محض ایک طنزیہ مہم نہیں بلکہ بھارت کے سیاسی مباحثے کا اہم موضوع بن چکا ہے۔
کیا کاکروچ جنتا پارٹی واقعی سیاسی قوت بن سکتی ہے؟پارٹی کے بانی ابھیجیت دیپکے نے 6 جون کو بھارت واپسی اور جنتر منتر (دہلی میں احتجاجات کے لیے معروف مقام) پر احتجاجی دھرنے کا اعلان کیا ہے جو وزیرِ تعلیم کے استعفیٰ کے لیے دیا جائے گا۔
2011-12 میں بھارتی سماجی کارکن انا ہزارے نے بھی جنتر منتر پر دھرنا دیا تھا جس کا مقصد کرپشن کے خلاف لوک پال بِل (قانون سازی) کی منظوری تھا جس میں وہ کامیاب رہے لیکن انا ہزارے نے اپنی تحریک کو سیاسی تحریک نہیں بنایا تھا، تاہم ان کی جماعت کے ایک سرکردہ رہنما اروند کیجریوال نے بعدازاں ایک سیاسی جماعت عام آدمی پارٹی کی بنیاد رکھی جس نے پہلے دہلی اور اب بھارتی پنجاب میں حکومت بنا رکھی ہے۔
کاکروچ جنتا پارٹی اپنی مقبولیت کے باعث کوئی سیاسی جماعت قائم کر سکے گی یا نہیں اس پر بھارت کے سیاسی مبصرین منقسم ہیں۔
بعض تجزیہ کاروں کے مطابق کاکروچ جنتا پارٹی صرف ایک ’میم موومنٹ‘ ہے جو وقت کے ساتھ ختم ہو جائے گی۔ اس کے پاس نہ تنظیمی ڈھانچہ ہے، نہ مقامی قیادت اور نہ ہی کوئی واضح انتخابی حکمت عملی۔
مزید پڑھیں: کاکروچ جنتاپارٹی کا بھارتی وزیرِ تعلیم کیخلاف احتجاج کا اعلان
دوسری جانب کچھ ماہرین کا خیال ہے کہ اس کی اصل اہمیت انتخابات میں نہیں بلکہ اس حقیقت میں ہے کہ اس نے نوجوانوں کی ناراضی کو منظم شکل دے دی ہے۔ یہ تحریک شاید خود سیاسی جماعت نہ بن سکے، لیکن اس نے بھارتی سیاست کو یہ پیغام ضرور دیا ہے کہ سوشل میڈیا کی نئی نسل روایتی نعروں سے مطمئن نہیں ہوتی۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews بھارت بھارتی چیف جسٹس حکومت کے لیے چیلنج سوشل میڈیا مہم کاکروچ جنتا پارٹی وی نیوز
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ