ایران کے داخلی حالات سے متعلق چند نکات
اشاعت کی تاریخ: 14th, January 2026 GMT
اسلام ٹائمز: عوام نے ملک بھر کے مختلف شہروں خصوصاً تہران، مشہد، اصفہان، شیراز، یزد اور قم میں کروڑوں کی تعداد میں سڑکوں پر نکل کر رہبرِ معظم انقلاب اسلامی حضرت آیت اللہ امام خامنہای (مدظلہ العالی) اور اسلامی جمہوریہ ایران کے نظام کے ساتھ اپنی بھرپور اور غیر متزلزل حمایت کا اظہار کیا۔ تحریر: ڈاکٹر سعید طالبی نیا
ڈائریکٹر جنرل، خانۂ فرهنگِ اسلامی جمہوریۂ ایران، کراچی
اسلامی جمہوریہ ایران، امتِ مسلمہ بالخصوص مظلوم فلسطینی اور غزہ کے عوام کے دفاع اور اپنی خودمختاری کی پالیسی کی وجہ سے ہمیشہ دشمنانِ اسلام اور عالمی صہیونیت کی بغض و عناد کا نشانہ رہا ہے۔ امریکا، اسرائیل، نیٹو اور خطے کے بعض غدار ممالک، غیر معمولی اتحاد کے باوجود بارہ روزہ جنگ میں اسلامی جمہوریہ ایران کو شکست دینے اور ایرانی عوام کو اپنے اسلامی نظام کے خلاف بھڑکانے میں ناکام رہے۔ اسی ناکامی کے بعد وہ کسی مناسب موقع کی تلاش میں تھے، تاکہ اپنی عداوت ظاہر کریں اور اپنے شیطانی مقاصد حاصل کر سکیں۔ گزشتہ دو ہفتوں کے دوران ایران میں زرِ مبادلہ کی قیمت اور بعض اشیائے ضروریہ کی قیمتوں میں اضافے کے باعث عوام کے ایک محدود طبقے جو ایران کی مجموعی آبادی کے ایک فیصد سے بھی کم تھا، نے اپنے احتجاج کے اظہار کیلئے سڑکوں کا رخ کیا۔
اسلامی جمہوریہ ایران کے نظام نے احتجاج کو اپنے شہریوں کا جائز اور قانونی حق تسلیم کیا اور اس پر کسی قسم کی پابندی یا مزاحمت نہیں کی، تاہم اسرائیل سے وابستہ تربیت یافتہ دہشتگردوں اور غدار عناصر کے ایک گروہ نے، جو غیر ملکی ہدایات پر عمل کر رہے تھے، چند افراد پر مشتمل ٹولیوں کی صورت میں عوامی احتجاج میں دراندازی کی۔ انہوں نے مظاہرین کو اشتعال دلایا اور تمام بین الاقوامی قوانین کی خلاف ورزی کرتے ہوئے سرکاری و عوامی املاک کو نقصان پہنچایا، اسپتالوں اور ایمبولینسوں پر حملے کیے، مساجد، مذہبی مراکز، قرآنِ مجید، بینکوں، فائر اسٹیشنز کو نذرِ آتش کیا، نیز عوام کے گھروں، دکانوں اور نجی گاڑیوں کو تباہ کیا۔ ان عناصر نے جنگی ہتھیاروں سے پولیس پر فائرنگ بھی کی، جس کے نتیجے میں امن و امان برقرار رکھنے والے درجنوں اہلکار اور بے گناہ شہری شہید ہو گئے۔
ان واقعات کے بعد پولیس کی بروقت اور مؤثر کارروائی کے نتیجے میں متعدد مسلح غدار کرائے کے ایجنٹوں، جو دہشتگرد تنظیموں سے وابستگی کا سابقہ رکھتے تھے اور سنگین جرائم میں ملوث تھے، گرفتار کر لیے گئے ہیں، جبکہ دیگر مجرموں اور قاتلوں کی گرفتاری کیلئے کارروائیاں جاری ہیں۔ حالیہ دنوں میں بالخصوص بروز پیر 12 جنوری کو ایران کے عوام نے ملک بھر کے مختلف شہروں خصوصاً تہران، مشہد، اصفہان، شیراز، یزد اور قم میں کروڑوں کی تعداد میں سڑکوں پر نکل کر رہبرِ معظم انقلاب اسلامی حضرت آیت اللہ امام خامنہای (مدظلہ العالی) اور اسلامی جمہوریہ ایران کے نظام کے ساتھ اپنی بھرپور اور غیر متزلزل حمایت کا اظہار کیا۔ ان عوامی مظاہروں نے ثابت کر دیا کہ امریکی صدر اور عالمی صہیونیت کی کھوکھلی دھمکیاں، ایرانی قوم کے استقلال اور آزادی کے عزمِ فولادی کو کمزور نہیں کر سکتیں۔
ایرانی شہریوں کے تحفظ اور سلامتی کو یقینی بنانے کی غرض سے بین الاقوامی مواصلاتی نیٹ ورکس پر عارضی پابندیاں عائد کی گئیں، جنہیں جلد ہی ختم کر دیا جائے گا۔ اس امر پر زور دیا جاتا ہے کہ بی بی سی، سی این این، فاکس نیوز اور اس نوعیت کے دیگر ادارے عالمی استکباری محاذ کے میڈیا ہتھیار ہیں، اور ایران کے محدود داخلی احتجاجات کے بارے میں ان کی رپورٹس عموماً جھوٹ، گمراہ کن اور مبالغہ آرائی پر مبنی ہوتی ہیں۔ ایران کے مسلمان عوام کی اکثریت اپنے رہبر کی حامی ہے اور غیر ملکی مداخلت، امریکہ و اسرائیل سے وابستہ ایجنٹوں، بشمول صہیونیت نواز، غدار اور اسلام دشمن رضا پہلوی، کی سخت مخالف ہے۔ عوام نے ان فتنہ انگیز بدامنیوں کا ساتھ نہیں دیا۔
ذریعہ
ذریعہ: Islam Times
کلیدی لفظ: اسلامی جمہوریہ ایران ایران کے
پڑھیں:
ایک ’’غدارِ وطن‘‘ کی سوانح عمری
مجھے خوب یاد ہے کہ راقم نے سب سے پہلے اُن کی تحریر امریکا کے مشہور جریدے ’’نیویارکر‘‘ میں پڑھی تھی۔اِس تحریر کی معرفت میرا اُن سے پہلا تعارف ہُوا۔ یوں میں اُن کی تحریروں کا گرویدہ ہوتا چلا گیا ۔ وہ ہمیشہ مفصل لکھتی ہیں اور اپنا نکتہ نظر کھل کر اور بے دھڑک بیان کرتی ہیں ۔ اُنھی ایام میں گجرات میں ہندو دہشت گردوں اور بدمعاشوں نے دل کھول کر مسلمانوں کے خون کی ہولی کھیلی تھی ۔
اِسی خونریزی میں مشہور گجراتی مسلمان سیاستدان و رکن پارلیمنٹ (احسان جعفری) کا خون بھی کر دیا گیا تھا۔اِسی نسل کشی اور مسلمانوں کی بے دریغ خونریزی پر مذکورہ مصنفہ نے ایسا انکشاف خیز آرٹیکل لکھا تھا کہ بھارتی حکومت اور گجرات کی ریاستی سرکار( جس کے وزیر اعلیٰ نریندر مودی تھے) تھرّا اُٹھے تھے۔ راقم اُن دنوں امریکا میں مقیم تھا اور وہاں سے بھارتی جرائد و اخبارات حاصل کرنا سہل تھا ۔ نیویارک کے معروف علاقے ’’ جیکسن ہائٹس‘‘ میں ایک ہندو کی خاصی بڑی دکان تھی ۔ وہیں سے مَیں بھارتی جریدے خریدا کرتا تھا ۔ مثال کے طور پر: انڈیا ٹوڈے،آؤٹ لک ، فرنٹ لائن وغیرہ ۔اِن تینوں جرائد میں میری پسندیدہ لکھاری کی تحریریں باقاعدہ اور بکثرت شائع ہوتی تھیں ۔
میری اِس محبوب لکھاری کی تحریروں نے مجھے اتنا مسمرائز کررکھا تھا کہ اُن کا عالمی شہرت یافتہ پہلا ناول The God of Small Thingsسامنے آیا تو پہلی ہی فرصت میں نیویارک کی سب سے بڑی کتابوں کی دکان Barnes and Nobleسے خریدا اور ٹرین میں آتے جاتے اِسے پڑھا ۔ ’’دی گاڈ آف اسمال تھنگز‘‘ ناول کی کہانی بھارتی صوبے ، کیرالہ، سے شروع ہوتی ہے ۔
اِس کہانی میں کیرالہ کے ایک قصبے میں رہائش پذیر ایک غریب خاندان کی دل شکستہ داستان بیان کی گئی ہے ۔ ناول میں کیرالہ کے ذات پات کے بندھنوں میں جکڑے خاندانوں اور اُن کی المناک کہانیوں کو الفاظ کی شکل میں فلم بنا کر دکھایا گیا ہے۔یہ ناول اشکبار اور افسردہ کر دینے والا ہے ۔ ناولسٹ کو اِس کی بے پناہ مقبولیت کی بِنا پر معروفِ عالم ادبی انعام ’’ بکر پرائز‘‘ سے بھی نوازا گیا ۔ یوں ناول نگار کو عالمی شہرت بھی مل گئی ۔
میری اِس محبوب بھارتی رائٹر کا نام ارُن دھتی رائے ہے ۔ اُن کی کئی عالمی شہرت یافتہ تحریروں کو اُردو میں ترجمہ کرکے کراچی کے سہ ماہی جریدے ’’آج‘‘ کے ذہین و فطین مدیر،اجمل کمال، شائع کر چکے ہیں ۔ واقعہ یہ ہے کہ اجمل کمال صاحب اپنے نام کی مانند باکمال مترجم بھی ہیں ۔ ارُن دھتی رائے کی شخصیت اور تحریریں خاصی سرکش ، مزاحمتی اور ریاست مخالف ہوتی ہیں۔
ہر بھارتی حکومت اِسی لیے انھیں ناپسندیدہ قرار دیتی ہے ۔ دائیں بازو سے تعلق رکھنے والے کئی معروف بھارتی سیاستدان ( از قسم بی جے پی) متعدد بار ارُن دھتی رائے کو ’’غدارِ وطن‘‘ قرار دے چکے ہیں ۔ لیکن یہ درویش صفت خاتون دانشور اور مصنفہ ہر قسم کی سرکاری و غیر سرکاری مخالفتوں کے باوصف اپنے طے شدہ موقف سے ہٹتی ہیں نہ کوئی مخالف انھیں ہٹا سکا ہے ۔ ارُن دھتی رائے کی تحریروں میں جس طرح مظلوم بھارتی مسلمانوں اور زیر استبداد مقبوضہ کشمیریوں کی غیر مبہم حمائت کی جاتی ہے، اِن کی بنیاد پر اُن کے خلاف غداری کے کئی مقدمات بھی دائر ہو چکے ہیں ۔ مگر یہ سرکش مصنفہ کسی کے غچے اور غرّے میں آنے والی نہیں ہیں ۔
بھارتی مسلمانوں اور مظلوم کشمیریوں کے حقوق کی پاسداری کا اِس محترم و عظیم خاتون نے جس عزیمت سے پرچم اُٹھا رکھا ہے، ہم پاکستانیوں کو شائد اِس لیے بھی ارُن دھتی رائے پسند ہیں ۔ بھارت میں خبثِ باطن کے حامل کئی افراد نے انھیں ’’پاکستان کی ایجنٹ‘‘ بھی قرار دے رکھا ہے ۔ حیرت ہے کہ ماضی قریب میں پاکستان کی بھی ایک ’’ارُن دھتی رائے‘‘ ہُوا کرتی تھیں : وہ باقاعدہ لکھاری تو نہیں تھیں مگر ایک معروف وکیل اور انسانی حقوق کی محافظ ہونے کے ناتے وہ ہر مستبد پاکستانی حکمران کی سخت ناقد رہا کرتی تھیں ۔ اُن کے ہر بیان اور اقدام کی اساس پر اُن کے نظریاتی و سیاسی و سماجی مخالفین انھیں ’’بھارت کی ایجنٹ‘‘ کے لقب سے یاد بھی کرتے تھے ۔
اگست2002کے سلگتے ایام میں ارُن دھتی رائے پاکستان تشریف لائیں تو ہم نے انھیں حیرت انگیز نظروں سے لاہور کے ایک پنج ستارہ ہوٹل میں خطاب کرتے دیکھا اور سُنا ۔ اُن کی سادہ شخصیت اور نہایت سادہ لباس اور بھی دَم بخود کر دینے والا تھا ۔ ایک نئی نئی سیاسی جماعت بنانے والے پاکستانی سیاستدان ( جو اَب مرحوم ہو چکے ہیں) اور ایک معروف صحافی (جو اَب مشہور ٹی وی اینکر ہیں) کی دعوتِ خاص پر ارُن دھتی رائے پاکستان آئی تھیں ۔ اور اب اِنہی ارُن دھتی رائے کی نئی کتابMother Mary Comes to Me شائع ہو کر سامنے آئی ہے تو ہم نے اِسے شوق، تجسس اور مسرت سے دیکھا اور پڑھا ہے ۔
اس کتاب میں مصنفہ کی سچائی ، سچ سے محبت، سماجی روایات سے بغاوت اور سرکشی اپنے عروج پر ہے ۔ جس نے بھی اِس کتاب کو پڑھا ہے،سناٹے میں آ گیا ہے کہ آیا کوئی مصنفہ بیٹی ہونے کے ناتے اپنے خاندان اور خاص طور پر اپنی والدہ بارے اتنے کڑوے سچ بھی بول اور لکھ سکتی ہے؟
یہ تازہ کتاب(Mother Mary Comes to Me) ارُن دھتی رائے نے دراصل اپنی آنجہانی والدہ (Mary) بارے لکھی ہے ۔ یہ درحقیقت والدہ بارے تلخ یادداشتیں اور سوانح ہیں ، مگر بین السطور یہ ارُن دھتی رائے کی سوانح حیات بھی ہے ۔ مصنفہ کے سیاسی و سماجی بھارتی ناقدین(خصوصی طور پر دائیں بازو کے بھارتی سیاستدان)کا کہنا ہے کہ ’’جو رائٹراپنی والدہ بارے یہ سخت الفاظ لکھ سکتی ہے ، اُس کے لیے غداری کا لفظ بھی کم ہے ۔‘‘زیر نظر کتاب میں مصنفہ نے اپنی والدہ کے ساتھ پیچیدہ ، ،مشکل اور جذباتی تعلقات کی داستان بیان کی ہے۔ ارُن دھتی رائے کے بچپن اور والدہ سے تعلقات کی یادداشتوں اور مضبوط حافظے کی داد دینا پڑتی ہے ۔ اُن کی والدہ ایک سخت گیر اور ڈسپلن کی پابند ماہر تعلیم تھیں ۔
اُنھوں نے کیرالہ میں جدید اسکول کی بنیاد رکھی جو بعد ازاں بڑی شہرت کا حامل بنا ۔ Maryاِس اسکول کی ہیڈ مسٹرس بھی رہیں ۔ وہ ایک آزاد روش کی حامل ، باغی اور انقلابی ذہن کی حامل استاد اور سوشل ایکٹوسٹ بھی تھیں ۔ اُنھوں نے بھارتی سپریم کورٹ میں شامی مسیحی بچیوں کا مقدمہ بہادری سے جیتا اور تاریخ رقم کر گئیں ۔ سماج سے بغاوت اور آزادی سے جینے اور لکھنے کی خواہش کے عناصر ارُن دھتی رائے کو اپنی والدہ سے وراثت میں ملے ۔ حکومت ، سیاست اور سماج مخالف آزادانہ تحریروں کے باعث انھیں ’’اینٹی انڈیا‘‘ بھی کہا گیا ۔ بھارت سرکار کی جانب سے ایک بڑا ڈیم ( نرمدا ویلی ڈیم پراجیکٹ) بنانے کے چکر میں لاکھوں کی مقامی آبادی کو جس وحشت سے اکھیڑا گیا، اُرن دھتی رائے نے بھارت بھر میں اِن غریبوں کا مقدمہ لڑا اور بالآخر اُن کے حقوق دلوا ہی دیئے ۔
ارُن دھتی رائے نے جرأتمندی سے طاقتوروں سے سوال پوچھنے اور اُن کے سامنے ڈَٹ جانے کا سلیقہ اپنی والدہ سے سیکھا ۔ شائد اِسی بِنا پر مصنفہ نے اپنی اِس کتاب میں اپنی والدہ کو اپنی Gangster، Shelterاور My Stormبھی قرار دیا ہے ۔ اگر زیر نظر کتاب کے خلاصے کو دو چار الفاظ میں کوزے میں بند کیا جائے تو کہا جائے گا کہ ارُن دھتی رائے کے قلم سے یہUncompromising Memoirsکی بازگشت ہے ۔ اُنھوں نے اپنی ڈسپلن پسند والدہ بارے لکھا ہے کہ وہ اپنے دونوں بچوں سے سفاکی کی حد تک منظم زندگی ، مگر آزادانہ زندگی گزارنے کی طلبگار تھیں ۔
وہ لکھتی ہیں :’’ اور جب میری تحریروں کے باعث مجھے بھارت اور بھارت سے باہر شہرت ملنے لگی تو میری والدہ مجھ سے حسد کرنے لگی تھیں َ‘‘۔ارُن دھتی رائے بھارت اور دُنیا بھر میں اقلیتوں کے حقوق کی جس طرح علمبردار ہیں، اِسی طرح وہ دُنیا کے کسی بھی ملک کو جوہری ہتھیار رکھنے کی حامی نہیں ہیں ۔اُن کے یہ الفاظ اُن کی آزاد منش طبیعت اور باغیانہ روش کے مظہر کہے جاتے ہیں:’’ مجھے کہنے ، لکھنے اور بولنے کی مطلق آزادی چاہیے ۔ اِس کے لیے مجھے کسی خاص ملک کے قومی پرچم کی چھاؤں کی ضرورت نہیں ہے ۔ کسی بھی ملک کا قومی پرچم دراصل کپڑے کو وہ ٹکڑا ہے جو انسانوں کے دماغوں کو محدود بھی کرتا ہے اور اِنہیں سکیڑ کر رکھ دیتا ہے ۔‘‘
متنازع ٹوئٹس کیس: ایمان مزاری، ہادی چٹھہ کی اپیل کی سماعت کل ہوگی