بی این پی کی انتخابی فتح کے بعد پاکستان کا بنگلہ دیش سے تعلقات مزید مضبوط بنانے کا اعلان
اشاعت کی تاریخ: 13th, February 2026 GMT
بنگلہ دیش میں بنگلہ دیش نیشنلسٹ پارٹی (بی این پی) کی 2 تہائی اکثریت سے کامیابی کے بعد پاکستان نے ڈھاکہ کے ساتھ تعلقات مزید مستحکم بنانے کی خواہش کا اظہار کیا ہے۔ صدر آصف علی زرداری اور وزیراعظم شہباز شریف نے بی این پی کے سربراہ طارق رحمان کو تاریخی کامیابی پر مبارکباد دیتے ہوئے دونوں ممالک کے درمیان جمہوری شراکت داری اور باہمی ترقی کے عزم کا اعادہ کیا۔
یہ بھی پڑھیں:پاک بنگلہ دیش تعلقات میں بہتری کو کراچی میں مقیم بنگالی آبادی کس نظر سے دیکھ رہی ہے؟
وزیراعظم شہباز شریف نے اپنے تہنیتی پیغام میں کہا کہ وہ طارق رحمان کو پارلیمانی انتخابات میں شاندار کامیابی پر دلی مبارکباد پیش کرتے ہیں۔ انہوں نے بنگلہ دیش کے عوام کو بھی پرامن اور کامیاب انتخابات کے انعقاد پر سراہا۔ وزیراعظم کا کہنا تھا کہ وہ نئی قیادت کے ساتھ مل کر تاریخی، برادرانہ اور کثیرالجہتی دوطرفہ تعلقات کو مزید مضبوط بنانے کے خواہاں ہیں تاکہ جنوبی ایشیا اور اس سے آگے امن، استحکام اور ترقی کے مشترکہ اہداف حاصل کیے جا سکیں۔
صدر آصف علی زرداری نے بھی طارق رحمان کو بی این پی کی بھاری اکثریت سے کامیابی پر مبارکباد دی اور کہا کہ پاکستان جمہوری شراکت داری اور مشترکہ ترقی کے لیے مضبوط حمایت جاری رکھے گا۔
غیر سرکاری نتائج کے مطابق بی این پی اور اس کے اتحادیوں نے 299 میں سے کم از کم 212 نشستیں حاصل کیں، جب کہ جماعت اسلامی اور اس کے اتحادیوں نے 70 نشستیں جیتیں۔ بی این پی تقریباً 2 دہائیوں بعد اقتدار میں واپسی کر رہی ہے۔ پارٹی نے اکثریت حاصل کرنے کے بعد قوم کا شکریہ ادا کیا اور ملک بھر میں خصوصی دعاؤں کی اپیل کی، ساتھ ہی ہدایت دی کہ کسی قسم کی جشن ریلی یا جلوس نہ نکالا جائے۔
یہ بھی پڑھیں:بنگلہ دیش کے متوقع وزیر اعظم طارق رحمان کون ہیں؟
تجزیہ کاروں کے مطابق واضح انتخابی نتیجہ 175 ملین آبادی والے ملک میں سیاسی استحکام کے لیے اہم سمجھا جا رہا ہے، جہاں 2024 میں سابق وزیراعظم شیخ حسینہ کی معزولی کے بعد مہینوں تک احتجاج اور بدامنی جاری رہی تھی۔ ان حالات نے روزمرہ زندگی اور معیشت، خصوصاً گارمنٹس کی برآمدی صنعت کو متاثر کیا تھا۔
توقع ہے کہ طارق رحمان جلد وزیراعظم کے عہدے کا حلف اٹھائیں گے۔ وہ پارٹی کے بانی اور سابق صدر ضیاء الرحمن کے صاحبزادے ہیں اور 18 برس بیرون ملک قیام کے بعد دسمبر میں ڈھاکہ واپس آئے تھے۔
ادھر امریکا نے بھی بی این پی کو تاریخی کامیابی پر مبارکباد دیتے ہوئے کہا ہے کہ وہ بنگلہ دیش کے ساتھ خوشحالی اور سلامتی کے مشترکہ اہداف کے لیے کام کرنے کا خواہاں ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
امریکا بنگلہ دیش بھارت پاکستان صدر زرداری طارق رحمان وزیراعظم شہباز شریف.
ذریعہ
ذریعہ: WE News
کلیدی لفظ: امریکا بنگلہ دیش بھارت پاکستان وزیراعظم شہباز شریف
پڑھیں:
وزیر ریلوے کی اطالوی قومی دن کے موقع پر اٹلی کی حکومت اور عوام کو مبارکباد
اسلام آباد(اُردو پوائنٹ اخبارتازہ ترین - این این آئی۔ 02 جون2026ء) وزیر ریلوے محمد حنیف عباسی نے اطالوی قومی دن کے موقع پر اٹلی کی حکومت اور عوام کو مبارکباد پیش کرتے ہوئے کہا ہے کہ پاکستان اور اٹلی کے درمیان دیرینہ دوستانہ تعلقات باہمی احترام، اعتماد اور تعاون پر مبنی ہیں۔منگل کو اپنے بیان میں انہوں نے کہا کہ اٹلی پاکستان کا ایک اہم یورپی شراکت دار ہے اور دونوں ممالک کے تعلقات وقت کے ساتھ مزید مستحکم ہوئے ہیں۔ وزیر ریلوے نے کہا کہ پاکستان اٹلی کے ساتھ تجارت، سرمایہ کاری، تعلیم اور ثقافتی روابط کے فروغ کو خصوصی اہمیت دیتا ہے۔انہوں نے کہا کہ اطالوی قومی دن دونوں ممالک کے درمیان دوستی اور تعاون کے مزید فروغ کے عزم کی تجدید کا موقع فراہم کرتا ہے۔ انہوں نے اٹلی میں مقیم پاکستانی برادری کے کردار کو سراہتے ہوئے کہا کہ یہ برادری دونوں ممالک کے درمیان تعلقات کو مضبوط بنانے میں اہم کردار ادا کر رہی ہے۔(جاری ہے)
وزیر ریلوے نے کہا کہ پاکستان اٹلی کے ساتھ اقتصادی، تجارتی اور عوامی سطح کے روابط کو مزید وسعت دینے کا خواہاں ہے ،دونوں ممالک کے درمیان مختلف شعبوں میں تعاون کے وسیع امکانات موجود ہیں جو مشترکہ ترقی اور خوشحالی کا ذریعہ بن سکتے ہیں۔انہوں نے کہا کہ پاکستان اور اٹلی کے مضبوط تعلقات باہمی مفادات کے تحفظ اور بین الاقوامی تعاون کے فروغ میں اہم کردار ادا کر رہے ہیں اور یہ دیرینہ دوستی مستقبل میں مزید مضبوط اور نتیجہ خیز شراکت داری میں تبدیل ہوگی۔ انہوں نے اطالوی قومی دن پر پاکستان اور اٹلی کے عوام کے لیے امن، ترقی اور خوشحالی کی نیک تمناں کا اظہار کیا۔
وزارت آئی ٹی نے 1.67 ارب روپے سے زاید کے فنڈز طلب کرلیے