قیام پاکستان ، ایک تاریخی معجزہ
اشاعت کی تاریخ: 14th, August 2025 GMT
ریاض احمدچودھری
پاکستان دو قومی نظریے کی بنیاد پر 14-13 اگست کی درمیانی شب 12 بجے دنیا کے نقشے پر ظہور پذیر ہوا۔ آ ل انڈیا کانگریس ، جمعیت علما ہند، مجلس احرار اور متحدہ قومیت کے رہنماؤں مولانا حسین احمد مدنی، مولانا ابوالکلام آزاد اور پنجاب میں یونینسٹ پارٹی کی پرزور مخالفت کے باوجود پاکستان کا قیام ایک تاریخی معجزہ ہے۔ انگریز حکمران کانگریس، جمعیت علماء ہند اورمجلس احرار کی پشت پر تھے لیکن برصغیر کے مسلمانوں نے قائد اعظم کی قیادت میں انگریزوں، ہندوؤں اور متحدہ قومیت کے حامیوں کو شکست دی اور علامہ اقبال کے 1930ء کے مشہور زمانہ خطبہ الٰہ آباد کی روشنی میں شمالی ہندوستان میں اکثریت کی بنیاد پر علیحدہ وطن معرض وجود میں آیا۔ قانون آزادی ہند1947ء سے پہلے طے ہوا تھا کہ پنجاب اور بنگال تقسیم نہیں ہوں گے لیکن انگریز وائسرائے لارڈ ماؤنٹ بیٹن اور کانگریسی رہنماؤں کی سازش کی وجہ سے پنجاب اور بنگال کو تقسیم کر دیا گیا۔
تحریک پاکستان کے کارکن کی حیثیت سے راقم الحروف کہنا چاہتا ہے کہ پنجاب میں مسلم لیگ نے کل 86مسلم نشستوں میں سے 79نشستیں جیت لیں اس طرح پنجاب میںمسلم لیگ واحد اکثریتی جماعت تھی لیکن انگریز گورنر نے پنجاب مسلم لیگ پارلیمانی پارٹی کے رہنما نواب افتخار حسین ممدوٹ کو حکومت سازی کی دعوت نہ دی کیونکہ وہ انگریز وائسرائے کے زیر اثر تھے۔ متحدہ قومیت کے علمبرداراور قائد اعظم کے بقول کانگریسی شو بوائے مولانا ابوالکلام آزاد دہلی سے بذریعہ جہاز لاہور آئے اور انہوں نے کانگریس، اکالی دل اور یونینسٹ پارٹی سے ملاقاتیں کیں۔ پھر یونینسٹ پارٹی نے کانگریس اور اکالی دل کے ساتھ مل کر خضر حیات ٹوانہ کی قیادت میں حکومت بنائی۔ اس فیصلے کے خلاف پنجاب بھر میں بالعموم اور ہندوستان کے بڑے سیاسی مرکز امرتسر میں زبردست مظاہرے شروع ہوگئے اور ٹوانہ کو ایک ماہ بعد ہی مستعفی ہونا پڑا۔ راقم الحروف سینکڑوں مسلم لیگی کارکنوں اور رہنماؤں بشمول شیخ صادق حسن، مولوی سراج الدین پال ایڈووکیٹ، خواجہ محمد رفیق ، ذکی الدین پال، تقی الدین پال اور عزالدین پال جو ان مظاہروں کی قیادت کرتے تھے ، کے ساتھ مظاہروں میں شریک ہوتا تھا۔ مجھے بخوبی یاد ہے کہ جب مسلم نوجوان خضر حیات ٹوانہ کے خلا ف مظاہرے کرتے تو ہندو سکھ مظاہرین پر پتھراؤ کرتے تھے۔
13 اور 14 کی درمیانی رات کو کپور تھلہ، نابھہ، پٹیالہ اور چمبہ کی ریاستوں کی پولیس اور سکھوں پر مشتمل مسلح جتھوں نے چاروں طرف سے امرتسر پر حملہ کر دیا جس کے نتیجے میں ہزاروں مسلمان شہید ہوگئے۔ نام نہاد اکالی رہنما ماسٹر تارا سنگھ نے پنجاب اسمبلی کے سامنے کرپان لہرا کر کہا تھا کہ ہم پنجاب میں مسلمانوں کا قتل عام کریں گے۔ وائسرائے ہند، پنجاب کے انگریز گورنر اور لیفٹیننٹ کرنل ایوب خان مسلمانوں کا قتل عام روکنے میںناکام رہے۔ مغربی پنجاب میں تعینات لیفٹیننٹ کرنل محمد موسیٰ نے پنجاب کے مسلمانوں کے قتل عام کو روکنے کیلئے بلوچ رجمنٹ امرتسر بلوائی اور مسلم فوجیوں کی کارروائی سے کثیر تعداد میں سکھ مارے گئے۔ بلوچ رجمنٹ کے کمانڈر نے اعلان کیا کہ امرتسر اور گردونواح کے مسلمان ریلوے سٹیشن پر جمع ہوجائیں جنہیں یہاں سے فوج کی نگرانی میں لاہور منتقل کیا جائیگا۔ 13 اگست کو امرتسر سے پہلی ٹرین لاہور روانہ ہوئی جو والٹن (لاہور) میں آ کر رکی۔ اسی لئے مسلم لیگی حکومت نے والٹن میں باب پاکستان بنانے کا فیصلہ کیا جس کا تین دفعہ سنگ بنیاد رکھا جا چکا ہے مگر تاحال والٹن میں باب پاکستان تعمیر نہ ہوسکا۔
راقم الحروف ان ہزاروں مسلمانوں میں شامل تھا جو اس وقت امرتسر ریلوے اسٹیشن پر موجود تھے۔ 12 بجے سے چند منٹ پہلے بتایا گیا کہ چند منٹ بعد نیا اعلان ہوگا۔ 12 بجے یہ اعلان کیا گیا کہ یہ پاکستان براڈ کاسٹنگ سروس، ریڈیو پاکستان ہے ۔ انگریزی میں یہ اعلان ظہور آذر اور اردو میں مصطفی علی ہمدانی نے کیا۔ اس کے بعد مصطفی علی ہمدانی کی زبانی خبریں سنیں۔ جب یہ اعلان ہوا تو امرتسر ریلوے سٹیشن اور شہر بھر میں پاکستان زندہ باد کے پرجوش نعرے لگائے گئے اور پھر تقریباً ایک گھنٹہ بعد امرتسر سے مہاجرین کو لے کر دوسری ٹرین پاکستان روانہ ہوئی۔ میں بھی اس ٹرین میں سوار تھا۔ تقریباً تین گھنٹے کے سفر کے بعد ٹرین ہربنس پورہ پہنچی تو اس کا رخ منٹگمری کی طرف موڑ دیا گیا۔ کیونکہ اس وقت تک لاہور انتظامیہ پہلی ٹرین کے مسافروں کے قیام و طعام میں مصروف تھی اور اس کے پاس مزید مہاجرین کو ٹھہرانے کیلئے کوئی انتظام نہ تھا۔ نماز فجر سے ایک گھنٹہ قبل یہ ٹرین منٹگمری پہنچی ۔ مہاجرین کو منٹگمری کے سکولوں اور کالجوں میں ٹھہرایا گیا۔ یہاں میں یہ بھی بتانا چاہتا ہوں کہ مجلس احرار کے ایک نام نہاد رہنما مولوی مظہر علی اظہر نے ضلع سیالکوٹ میں 1946 انتخابات کے ایک جلسے میں قائد اعظم کی شان میں گستاخی کی اور کافر اعظم کہا۔ اس پر مسلمانوں میں شدید غم و غصہ پھیل گیا اور مسلم لیگی کارکنوں اور مسلمانوں نے مولوی مظہر علی اظہر کو مولوی ادھر علی ادھر کا خطاب دے دیا۔ مسلم لیگی قیادت کی ہدایت کے نتیجے میں وہ قتل ہونے سے بچ گئے۔ اس انتخاب میں مولوی مظہر کو زبردست شکست ہوئی اور ضمانت بھی ضبط ہوگئی۔
خضر حیا ت ٹوانہ کے مستعفی ہونے کے بعد انگریز گورنر نے آئین کے مطابق اسمبلی میں اکثریتی پارٹی مسلم لیگ کے قائد نواب افتخار الحسن ممدوٹ کو حکومت بنانے کی دعوت دینے کی بجائے گورنر راج نافذ کر دیا۔ بعد ازاں گورنر جنرل قائد اعظم نے انگریز گورنر کو برطرف کر دیا اور عبدالرب نشتر پنجاب کے گورنر بنے جنہوں نے اپنے فرائض سنبھالتے ہی نواب افتخار الحسن ممدوٹ کو بطور وزیر اعلیٰ پنجاب ، حلف اٹھانے کی دعوت دی۔ افتخار حسین ممدوٹ مسلم لیگ کے فعال، زیرک اور دانشمند رہنما تھے۔ عہدہ سنبھالتے ہی انہوں نے علامہ اسد کی زیر نگرانی پنجاب میں محکمہ نفاذ اسلام کے قیام کا اعلان کیا۔نواب ممدوٹ نے ان سے کہا کہ چونکہ پاکستان اسلام اور دو قومی نظریہ کی بنیاد پر قائم ہوا ہے اور ایسا ادارہ ہونا چاہیے جو نظریاتی مسائل کو زیر بحث لا سکے۔ بعد ازاں علامہ اسد کوپاکستان کی وزارت خارجہ کے شعبہ مشرق وسطی میں منتقل کر دیا گیا جہاں انہوں نے دیگر مسلم ممالک سے پاکستان کے تعلقات مضبوط کرنے کا کام بخوبی انجام دیا۔ انہوں نے 1952ء تک اقوام متحدہ میں پاکستان کے پہلے سفیر کی حیثیت سے بھی خدمات انجام دیں۔علمی وتحقیقی کارناموں کے ساتھ ہی عالمی صحافت پر گہری نظر اور پختہ سیاسی شعور کے باعث انہوں نے بحیثیت سفارت کا ر بھی اپنی اعلیٰ صلاحیتوں کا خوب مظاہرہ کیا۔علامہ اسد پاکستان کے پہلے شہری تھے جنہیں حکومت پاکستان نے پاسپورٹ جاری کیا۔ یہ پاسپورٹ قائد اعظم کو جاری ہوا نہ لیاقت علی خان کو۔
علامہ محمد اسد سے راقم الحروف کا تعارف دسمبر 1957ء میں لاہور میں قیام کے دوران ہوا تب وہ پنجاب یونیورسٹی کے زیر اہتمام ایک بین الاقوامی اسلامی سیمینار کا اہتمام کر رہے تھے۔ ان کی کوششوں سے اس سیمینار کا انعقاد ہوا۔ مجھے ا ن سے انٹرویو کرنے کا بھی اتفاق ہوا۔ میرے خیال میں ، میں زندگی میں جن اہل علم حضرات سے متاثر ہوا ہوں ان میں علامہ محمد اسد کا نام چند گنے چنے اصحاب میں شامل ہے۔ علامہ محمد اسد نے 17 سال کی کاوشوں کے بعد 80 برس کی عمر میں اپنی زندگی کے سب سے بڑے خواب ”قرآن پاک کی انگریزی ترجمہ و تفسیر”کو تکمیل تک پہنچایا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
ذریعہ: Juraat
کلیدی لفظ: انگریز گورنر راقم الحروف پاکستان کے مسلم لیگی مسلم لیگ انہوں نے کے بعد کر دیا
پڑھیں:
شافع حسین سے ملاقات، پی ٹی آئی، دیگر سیاسی و سماجی شخصیات کا پاکستان مسلم لیگ میں شمولیت کا اعلان
لاہور (این این آئی) پاکستان مسلم لیگ پنجاب کے جنرل سیکرٹری وصوبائی وزیر صنعت و تجارت چوہدری شافع حسین سے گجرات کی معروف سیاسی و سماجی شخصیات کے وفد نے مسلم لیگ ہاؤس میں ملاقات کی۔وفد کی قیادت چوہدری رضوان دلدار کر رہے تھے۔اس موقع پر پی ٹی آئی سمیت دیگر سیاسی جماعتوں سے تعلق رکھنے والی گجرات کی سیاسی و سماجی شخصیات نے پاکستان مسلم لیگ میں شمولیت کا اعلان کیا۔انہوں نے پاکستان مسلم لیگ کے صدر چوہدری شجاعت حسین، چودھری شافع حسین اور چودھری سالک حسین کی قیادت پر مکمل اعتماد کا اظہار کیا اور ملک کی تعمیر وترقی اور عوام کی خدمت کیلئے مل کر کام کرنے کا عزم کیا۔ محمد اسلم ٹوپہ نے کہاکہ چوہدری شافع حسین کی عوامی خدمت کی سیاست سے متاثر ہو کر پاکستان مسلم لیگ میں شمولیت اختیار کی ہے۔صوبائی وزیر نے پاکستان مسلم لیگ میں شمولیت اختیار کرنے والوں کو پارٹی پرچم کے مفلر پہنائے۔ صوبائی وزیر صنعت و تجارت چوہدری شافع حسین نے اس موقع پر گفتگوکرتے ہوئے کہاکہ گجرات کی سیاسی وسماجی شخصیات کی پاکستان مسلم لیگ میں شمولیت کا خیر مقدم کرتے ہیں،معروف سیاسی وسماجی شخصیات کی پاکستان مسلم لیگ میں شمولیت سے پارٹی مزید مستحکم ہو گی۔پاکستان مسلم لیگ نے ہمیشہ عوامی خدمت،شرافت اور رواداری کی سیاست کی ہے،ہم چوہدری ظہور الٰہی شہید اور چوہدری شجاعت حسین کی شرافت اور رواداری کی سیاست کو ہی آگے بڑھا رہے ہیں۔پاکستان مسلم لیگ نے پاکستان بنایا اور یہی جماعت اسے ترقی کی منزل سے ہمکنار کرے گی۔چوہدری شافع حسین نے کہاکہ گجرات سمیت پنجاب کو تاریخ کے بدترین سیلاب کا سامنا کرنا پڑا ہے۔وزیر اعلیٰ پنجاب مریم نواز شریف سیلاب زدگان کی مدد اور عوام کی خدمت میں شب وروز کوشاں ہیں۔سیلاب کی صورتحال سے نمٹنے اور متاثرین کی مدد کیلئے وزیر اعلیٰ کی قیادت میں پوری حکومتی مشینری فیلڈ میں موجود رہی۔میں بھی کئی بار مشکلات میں گھرے لوگوں کے دکھ درد بانٹنے ان کے پاس پہنچا۔گجرات کو آئندہ ایسی سیلابی صورتحال سے محفوظ رکھنے کیلئے ابھی سے تیاری شروع کردی ہے۔وزیر صنعت و تجارت پنجاب نے کہاکہ گجرات میں اربوں روپے کے ترقیاتی منصوبوں پر تیزی سے کام جاری ہے،شہر میں عالمی معیار کا سیوریج سسٹم لایا جا رہا ہے۔صحت اور تعلیم کے اداروں اور پارکوں کو آپ گریڈ کیا جارہا ہے۔گجرات شہر کو ترقی کے لحاظ سے پنجاب کا ماڈل شہر بنائیں گے،سروس موڑ بریج دسمبر تک مکمل ہو جائے گا۔چوہدری شافع حسین نے کہاکہ ترقیاتی منصوبوں کی شفاف،بروقت اور معیاری تکمیل یقینی بنائی جارہی ہے۔پاکستان مسلم لیگ کے صدر چوہدری شجاعت حسین کی قیادت میں مل کر عوام کی خدمت کا سفر جاری رکھیں گے۔پاکستان مسلم لیگ میں شمولیت اختیار کرنے والوں میں محمد اسلم ٹوپہ،ندیم سنار،بشیراحمد ٹوپہ،سیدمحمد اکبر،محمد ارشاد،مبشر ریاض اور دیگر شامل تھے۔
کپل شرما سے بھتہ مانگنے والا گینگسٹر گرفتار