پنجاب اور سندھ میں تباہ کن سیلاب کا خطرہ، پی ڈی ایم اے نے ہنگامی الرٹ جاری کردیا
اشاعت کی تاریخ: 31st, August 2025 GMT
لاہور(نیوز ڈیسک)پنجاب میں دریائے ستلج، راوی اور چناب میں پانی کی سطح خطرناک حد تک بڑھنے لگی ہے اور صوبائی ڈیزاسٹر مینجمنٹ اتھارٹی (پی ڈی ایم اے) نے انتہائی اونچے درجے کے سیلاب کی وارننگ جاری کردی ہے۔
پی ڈی ایم اے کے ترجمان کے مطابق دریائے ستلج میں گنڈا سنگھ والا کے مقام پر اونچے درجے کا سیلاب برقرار ہے، جبکہ اگلے 48 گھنٹوں کے دوران دریائے چناب میں ہیڈ تریموں اور پنجند پر بھی تباہ کن ریلے آنے کی پیش گوئی کی گئی ہے۔ بھارتی ریاست مدھیہ پردیش میں طوفانی بارشوں کے بعد پاکستانی دریاؤں میں مزید طغیانی کا خدشہ ہے۔
ڈی جی پی ڈی ایم اے عرفان کاٹھیا نے کہا ہے کہ اگلے دو دن انتہائی اہم ہیں۔ انہوں نے خبردار کیا کہ ملتان، مظفرگڑھ، خانیوال اور جنوبی پنجاب کے کئی اضلاع شدید متاثر ہوسکتے ہیں۔ عوام کو فوری طور پر نشیبی اور کچے کے علاقوں کو خالی کرنے کی ہدایت کی گئی ہے۔
دریائے راوی میں شاہدرہ کے مقام پر پانی کی سطح میں کمی آرہی ہے لیکن سیلابی ریلہ اب بھی 90 ہزار کیوسک سے زیادہ ہے۔ ریسکیو ٹیمیں زیر آب دیہات میں پھنسے افراد کو محفوظ مقامات پر منتقل کر رہی ہیں۔
دوسری جانب دریائے چناب کا 6 لاکھ کیوسک کا ریلا جھنگ میں داخل ہوچکا ہے جبکہ مزید 4 لاکھ کیوسک پانی چنیوٹ سے گزرنے کے بعد 135 دیہات کو متاثر کرچکا ہے۔ سرگودھا، سیالکوٹ، وزیرآباد اور حافظ آباد میں بھی پانی نے تباہی مچادی ہے اور سینکڑوں خاندان محصور ہوکر رہ گئے ہیں۔
اطلاعات کے مطابق 10 لاکھ کیوسک کا ایک اور ریلا آج ملتان پہنچنے والا ہے۔ شہر کو بڑے نقصان سے بچانے کے لیے ہیڈ محمد والا بند پر شگاف ڈالنے کا فیصلہ کیا گیا ہے تاکہ دباؤ کم کیا جاسکے۔
ادھر سندھ میں بھی سیلاب کے خطرات بڑھنے لگے ہیں۔ دریائے سندھ میں منگل اور بدھ کی درمیانی شب شدید طغیانی کا خدشہ ظاہر کیا گیا ہے جس سے 16 لاکھ افراد متاثر ہوسکتے ہیں۔ پی ڈی ایم اے کے مطابق اگر 7 لاکھ کیوسک پانی داخل ہوا تو کچے کے تمام علاقے ڈوب جائیں گے، 167 یوسیز متاثر ہوں گی اور 2 لاکھ 73 ہزار خاندانوں کی فوری نقل مکانی کرنا پڑے گی۔
Post Views: 6.
ذریعہ
ذریعہ: Daily Mumtaz
کلیدی لفظ: پی ڈی ایم اے لاکھ کیوسک
پڑھیں:
مصنوعی مٹھاس دماغی صحت کے لیے خطرہ؟ نئی تحقیق میں یادداشت متاثر ہونے کا اشارہ
ایک نئی سائنسی تحقیق میں یہ انکشاف سامنے آیا ہے کہ مصنوعی مٹھاس کا زیادہ استعمال یادداشت اور ذہنی صلاحیتوں میں تیزی سے آنے والی کمی سے تعلق رکھ سکتا ہے۔ ماہرین کا کہنا ہے کہ اگرچہ یہ اجزا چینی کے متبادل کے طور پر استعمال کیے جاتے ہیں، تاہم ان کے طویل المدتی اثرات دماغی صحت کے لیے تشویش کا باعث بن سکتے ہیں۔
یہ تحقیق امریکن اکیڈمی آف نیورولوجی کے جریدے نیورولوجی میں شائع ہوئی، جس میں تقریباً 13 ہزار بالغ افراد کی آٹھ برس تک نگرانی کی گئی۔ تحقیق کے دوران کم یا بغیر کیلوریز والی مٹھاس کے سات عام اجزا کا جائزہ لیا گیا، جن میں ایسپارٹیم، سیکرین، ایسی سلفیم کے، اریتھریٹول، زائیلیٹول، سوربیٹول اور ٹیگاٹوز شامل تھے۔
تحقیقی نتائج کے مطابق وہ افراد جو روزانہ اوسطاً 191 ملی گرام مصنوعی مٹھاس استعمال کرتے تھے، جو تقریباً ایک کین ڈائٹ سوڈا میں موجود ایسپارٹیم کے برابر مقدار ہے، ان میں کم استعمال کرنے والوں کے مقابلے میں یادداشت اور ذہنی کارکردگی میں کمی کی رفتار 62 فیصد زیادہ دیکھی گئی۔
اسی طرح درمیانی مقدار میں مصنوعی مٹھاس استعمال کرنے والے افراد میں بھی ذہنی صلاحیتوں میں کمی کا خطرہ نمایاں رہا، جہاں یہ شرح کم استعمال کرنے والوں کے مقابلے میں 35 فیصد زیادہ ریکارڈ کی گئی۔
محققین کے مطابق یہ تعلق 60 سال سے کم عمر افراد اور ذیابیطس کے مریضوں میں زیادہ نمایاں دیکھا گیا، کیونکہ یہ افراد عام چینی کے بجائے مصنوعی مٹھاس کا زیادہ استعمال کرتے ہیں۔
تحقیق میں شامل سات میٹھے اجزا میں سے صرف ٹیگاٹوز ایسا جز تھا جس کا ذہنی صلاحیتوں میں تیز رفتار کمی سے واضح تعلق سامنے نہیں آیا، جبکہ باقی چھ اجزا اس خطرے سے منسلک پائے گئے۔
تحقیق کی مرکزی مصنفہ، یونیورسٹی آف ساؤ پالو سے وابستہ ڈاکٹر کلاڈیا کیمی سوئیموتو نے کہا کہ مصنوعی مٹھاس کو عموماً صحت مند متبادل سمجھا جاتا ہے، لیکن تحقیق کے نتائج اس بات کی نشاندہی کرتے ہیں کہ بعض مصنوعی میٹھے اجزا طویل عرصے تک استعمال کیے جانے کی صورت میں دماغی صحت پر منفی اثرات مرتب کر سکتے ہیں۔
یہ مصنوعی مٹھاس عام طور پر ڈائٹ سوڈا، فلیورڈ واٹر، انرجی ڈرنکس، دہی اور دیگر کم کیلوریز والی پراسیسڈ غذاؤں میں استعمال کی جاتی ہے۔
تاہم محققین نے اس بات پر بھی زور دیا کہ یہ ایک مشاہداتی تحقیق ہے، اس لیے اس سے یہ حتمی نتیجہ اخذ نہیں کیا جا سکتا کہ مصنوعی مٹھاس ہی براہِ راست یادداشت میں کمی کی وجہ بنتی ہے۔ ان کے مطابق ان نتائج کی مزید تصدیق اور مختلف متبادل میٹھے اجزا کے اثرات جانچنے کے لیے مزید سائنسی تحقیق کی ضرورت ہے۔
پاکستان نے ورلڈ کپ 2028 کیلیے براہ راست کوالیفائی کر لیا