جمہوریت عوام کی طاقت اور ملک کے روشن مستقبل کی ضمانت ہے, اسپیکر سردار ایاز صادق
اشاعت کی تاریخ: 14th, September 2025 GMT
اسلام آباد(نیوز ڈیسک) اسپیکر قومی اسمبلی سردار ایاز صادق نے عالمی یومِ جمہوریت کے موقع پر پاکستان کے جمہوری عزم، پارلیمانی استحکام اور عوامی شمولیت کے تسلسل کو خراجِ تحسین پیش کرتے ہوئے کہا کہ جمہوریت عوام کی طاقت، اجتماعی دانش، اور قومی ترقی و خوشحالی کی ضامن ہے۔ انہوں نے کہا کہ آج کا دن اُن تمام سیاسی کارکنوں، رہنماؤں اور صحافیوں کی قربانیوں کی یاد دلاتا ہے جنہوں نے جمہوریت کی بحالی اور بقا کے لیے جدوجہد کی۔
اسپیکر قومی اسمبلی نے کہا کہ پاکستان جمہوری جدوجہد کے نتیجے میں قائم ہوا، اور آئینِ پاکستان ہر شہری کو برابری، مذہبی آزادی، اظہارِ رائے اور شراکتی سیاست کے بنیادی حقوق فراہم کرتا ہے۔ انہوں نے کہا کہ اسلام بھی مشاورت، باہمی رائے اور عوامی شمولیت کی تعلیم دیتا ہے، اور انہی اصولوں کی روشنی میں جمہوری نظام عوامی نمائندگی پر قائم ہے۔
اسپیکر سردار ایاز صادق نے کہا کہ پارلیمان عوامی امنگوں کا سپریم فورم ہے، جہاں قانون سازی، پالیسی سازی، اور حکومتی نگرانی کے ذریعے عوامی رائے کو عملی جامہ پہنایا جاتا ہے۔ انہوں نے کہا کہ پارلیمان کی بالادستی، آئین کی مکمل پاسداری، ادارہ جاتی ہم آہنگی اور عوامی فلاح و بہبود جمہوری استحکام کی ضمانت ہیں۔
انہوں نے قائداعظم محمد علی جناحؒ کے 11 اگست کے تاریخی خطاب کا حوالہ دیتے ہوئے کہا کہ ہر شہری کو مذہبی آزادی حاصل ہے اور ریاست کا تعلق فرد کے مذہب، ذات یا عقیدے سے نہیں ہوتا۔
اسپیکر قومی اسمبلی نے سابق وزیرِ اعظم میاں محمد نواز شریف، سابق خاتون اول بیگم کلثوم نواز، سابق وزرائے اعظم شہید ذوالفقار علی بھٹو اور محترمہ بے نظیر بھٹو شہید سمیت دیگر سیاسی رہنماؤں کی ملک میں جمہوریت کی بحالی اور استحکام کے لیے قربانیوں اور جدوجہد کو خراج عقیدت پیش کیا۔
اسپیکر سردار ایاز صادق نے کہا کہ جمہوری نظام حکومت عوام کو بااختیار بناتا ہے، اداروں کو جوابدہ کرتا ہے اور قومی ترقی کے لیے اجتماعی بصیرت فراہم کرتا ہے۔ انہوں نے کہا کہ آج کا دن اس عزم کی تجدید کا موقع ہے کہ ہم آئین، قانون، اور اداروں کے استحکام کے لیے اپنی جدوجہد جاری رکھیں گے۔ انہوں نے تمام سیاسی جماعتوں پر زور دیا کہ وہ باہمی اختلافات کو بالائے طاق رکھتے ہوئے قومی مفاد میں مشترکہ حکمتِ عملی اپنائیں۔
انہوں نے نوجوانوں کی جمہوری عمل میں شرکت پر زور دیتے ہوئے کہا کہ قومی اسمبلی کی جانب سے شروع کیے گئے پارلیمانی اسٹڈیز پروگرام، انٹرن شپ پروگرامز، اور یوتھ پارلیمنٹرینز فورم جیسے اقدامات کا مقصد نوجوان نسل کو جمہوری عمل میں شامل کرنا اور قومی ترقی میں اُن کا کردار یقینی بنانا ہے۔ انہوں نے کہا کہ نوجوانوں کی شمولیت جمہوریت کو نتیجہ خیز اور پائیدار بنانے میں بنیادی کردار ادا کرے گی۔
اسپیکر قومی اسمبلی نے مزید کہا کہ پاکستان کی پارلیمان نے نہ صرف خواتین کے حقوق، مالیاتی شفافیت اور ماحولیاتی تحفظ جیسے اہم معاملات پر قانون سازی کی بلکہ وومنز پارلیمانی کاکس، پارلیمانی ٹاسک فورس برائے پائیدار ترقی کے اہداف (ایس ڈی جیز)، پارلیمانی کاکس برائے چائلڈ رائٹس، اور ینگ پارلیمنٹرینز فورم جیسے پارلیمانی پلیٹ فارمز کے ذریعے بین الجماعتی تعاون کو فروغ دیا۔ انہوں نے کہا کہ یہ فورمز پارلیمان میں تمام سیاسی جماعتوں کی شراکت کو ممکن بناتے ہیں، جو شراکتی جمہوریت اور گڈ گورننس کی اصل روح ہے۔
ڈپٹی اسپیکر قومی اسمبلی، سید غلام مصطفیٰ شاہ نے بھی عالمی یوم جمہوریت کے موقع پر اظہار خیال کرتے ہوئے کہا کہ سابق وزرائے اعظم شہید محترم ذوالفقار علی بھٹو اور شہید محترمہ بے نظیر بھٹو کی جمہوریت کے لیے لازوال قربانیاں ہمارے لیے مشعلِ راہ ہیں۔ انہوں نے کہا کہ جمہوریت صرف ایک طرزِ حکمرانی نہیں بلکہ ایک نظریہ ہے جو عوامی حاکمیت، شہری آزادی اور آئینی بالادستی کو یقینی بناتا ہے۔
ڈپٹی اسپیکر قومی اسمبلی نے کہا کہ پارلیمان ایک ایسا ادارہ ہے جہاں مختلف سیاسی نظریات رکھنے والے نمائندگان مل کر قانون سازی کرتے ہیں۔ انہوں نے تمام پارلیمانی کاکسز کے کردار کو سراہتے ہوئے کہا کہ بین الجماعتی مکالمہ اور مشاورت ہی جمہوریت کا اصل حسن ہے، اور یہی راستہ پاکستان کے روشن اور پائیدار مستقبل کی طرف لے جاتا ہے
Post Views: 7.ذریعہ: Daily Mumtaz
کلیدی لفظ: اسپیکر قومی اسمبلی نے سردار ایاز صادق انہوں نے کہا کہ ہوئے کہا کہ کے لیے
پڑھیں:
سپیکرقومی اسمبلی سے مالدیپ کی عوامی مجلس کے سپیکر کی ملاقات، دوطرفہ پارلیمانی تعلقات سمیت اہم امور پر تبادلہ خیال
اسلام آباد (اُردو پوائنٹ اخبارتازہ ترین - اے پی پی۔ 17 ستمبر2025ء) سپیکر قومی اسمبلی سردار ایاز صادق کی دعوت پر پاکستان کے دورے پر آئے ہوئے مالدیپ کی عوامی مجلس کے سپیکرعبدالرحیم عبداللہ اور ان کے ہمراہ پارلیمانی وفد کا پارلیمنٹ ہاؤس آمد پر پرتپاک خیر مقدم کیا گیا۔ بدھ کو مالدیپ کی عوامی مجلس کے سپیکر عبدالرحیم عبداللہ نے پارلیمانی وفد کے ہمراہ سپیکر قومی اسمبلی سردار ایاز صادق سے ملاقات کی جس میں دوطرفہ پارلیمانی تعلقات سمیت اہم علاقائی اور عالمی امور پر تبادلہ خیال کیا گیا ۔ دونوں رہنماؤں نے دوطرفہ پارلیمانی تعاون اور عوامی روابط بڑھانے پر اتفاق کیا ۔ اس موقع پر سپیکر قومی اسمبلی سردار ایاز صادق نے گفتگو کرتے ہوئے کہا کہ پاکستان اور مالدیپ مشترکہ مذہب، تاریخ اور ثقافت کے رشتوں میں جڑے ہیں،خطے میں امن و ترقی کے فروغ کیلئے پارلیمانی سفارتکاری اہم ہے،مسئلہ فلسطین اور کشمیر کو حل کئے بغیر خطے میں پائیدار امن ممکن نہیں، عالمی برادری مسئلہ فلسطین اور کشمیر کے منصفانہ حل کے لئے کردار ادا کرے، مسلم امہ کو فلسطین اور کشمیر کے عوام کے حق میں مشترکہ لائحہ عمل اپنانا ہوگا۔(جاری ہے)
سپیکر قومی اسمبلی نے کہا کہ پاکستانی فورسز اور عوام دہشت گردی جیسے ناسور کا بہادری سے مقابلہ کر رہے ہیں،اسرائیل بھارتی گٹھ جوڑ خطے اور دنیا کے امن کے لئے بڑا خطرہ ہے، قطر پر اسرائیلی بمباری پر مسلم ممالک کی اجتماعی مذمت بروقت اقدام ہے،اسرائیل نے انسانیت کی تمام حدود پار کر دی ہیں۔ انہوں نے کہا کہ اسرائیل فلسطینی عوام کی نسل کشی کر رہا ہے، اسرائیل کی جانب سے خطے کے ممالک کی سرحدوں کی خلاف ورزی شرمناک فعل ہے، اسرائیلی ایجنڈا عالمی امن کیلئے سنگین خطرہ ہے۔ سپیکر سردار ایاز صادق نے مقبوضہ کشمیر میں بھارتی مظالم کی شدید مذمت کی اور کہا کہ کشمیری عوام کی جدوجہدِ آزادی کو ہر سطح پر پاکستان کی حمایت حاصل ہے۔سپیکر سردار ایاز صادق نے بھارت کے خلاف پاکستان کی حالیہ فتح پر قوم اور افواجِ پاکستان کو خراجِ تحسین پیش کیا اور کہا کہ پاکستان کی کامیابی پوری قوم کے اتحاد اور افواج کی جرأت و قربانیوں کا ثمر ہے،بھارتی جارحیت کے مقابلے میں پاکستان ہمیشہ سرخرو ہوا ہے،سارک کو مزید فعال کرنے کی ضرورت ہے،پاکستان میں تجارت کے وسیع مواقع موجود ہیں، دوطرفہ رابطوں کے فروغ سے دونوں ممالک کے عوام ایک دوسرے کے مزید قریب آئیں گے۔ انہوں نے کہا کہ پاک-مالدیپ فرینڈ شپ گروپ دونوں ممالک میں پارلیمانی رابطوں کے فروغ میں کلیدی کردار ادا کر رہے ہے۔ مالدیپ کے سپیکر نے کہا کہ پاکستان آمد پر شاندار استقبال پر شکریہ ادا کرتے ہیں۔پاکستان اور مالدیپ کے تعلقات برادرانہ اور باہمی احترام پر مبنی ہیں۔ انہوں نے کہا کہ پاکستان کا مسئلہ فلسطین و کشمیر پر دو ٹوک مؤقف قابلِ ستائش ہے، پارلیمانی سطح پر قریبی روابط عوامی سطح پر تعلقات کو مزید مضبوط کریں گے۔
یادگار آپریشن سومنات میں پاک بحریہ نےبھارتی مواصلاتی نظام تباہ کیاتھا، وزیراعظم کایوم بحریہ پر پیغام