غزہ امن معاہدے پر دستخط کی تقریب، وزیراعظم شہباز شریف کل مصر روانہ ہوں گے
اشاعت کی تاریخ: 12th, October 2025 GMT
امریکی صدر ڈونلڈ ٹرمپ اور مصر کے صدر عبدالفتاح السیسی کی دعوت پر وزیراعظم پاکستان شہباز شریف 13 اکتوبر کو مصر کا دورہ کریں گے، جہاں وہ شرم الشیخ امن سربراہی اجلاس میں شرکت کریں گے اور غزہ کی سنگین صورتحال کے خاتمے کے لیے مجوزہ امن معاہدے پر دستخط کی تقریب میں شریک ہوں گے۔
ترجمان دفتر خارجہ کے مطابق وزیراعظم شہباز شریف کے ہمراہ نائب وزیراعظم و وزیر خارجہ اسحاق ڈار سمیت دیگر سینیئر وزرا بھی ہوں گے۔
یہ بھی پڑھیں: غزہ امن معاہدہ: اسرائیلی اجلاس کے دوران نیتن یاہو کا مودی سے رابطہ
یہ اجلاس ان سفارتی کوششوں کا نتیجہ ہے جو گزشتہ ماہ نیویارک میں اقوام متحدہ کی جنرل اسمبلی کے 80ویں اجلاس کے موقع پر شروع ہوئیں۔ 23 ستمبر 2025 کو وزیراعظم پاکستان نے 7 عرب و اسلامی ممالک کے رہنماؤں کے ہمراہ امریکی صدر سے ملاقات کی تھی، جس کا مقصد غزہ میں پائیدار امن کے امکانات کا جائزہ لینا تھا۔
اجلاس کے بعد جاری مشترکہ اعلامیے میں ان عرب و اسلامی ممالک نے صدر ٹرمپ کی امن کی کوششوں کو سراہا اور امریکا کے ساتھ مل کر جامع اور دیرپا جنگ بندی کے حصول اور غزہ میں انسانی بحران کے خاتمے کے لیے مشترکہ عزم کا اظہار کیا۔
وزیراعظم کی شرم الشیخ کانفرنس میں شرکت فلسطینی عوام کے حقِ خودارادیت اور ان کے منصفانہ مؤقف کی تاریخی، مستقل اور غیر متزلزل حمایت کی عکاسی کرتی ہے۔
پاکستان کو امید ہے کہ یہ سربراہی اجلاس اسرائیلی انخلا، فلسطینی شہریوں کے تحفظ، بے گھر افراد کی واپسی، قیدیوں کی رہائی، انسانی بحران کے خاتمے اور غزہ کی تعمیرِ نو کی راہ ہموار کرے گا۔
یہ بھی پڑھیں: غزہ جنگ بندی معاہدہ، حماس کا نیا مطالبہ سامنے آگیا
پاکستان یہ بھی توقع رکھتا ہے کہ ان کوششوں سے ایک قابلِ اعتبار سیاسی عمل کو تقویت ملے گی جس کا مقصد 1967 سے قبل کی سرحدوں کے مطابق القدس الشریف کو دارالحکومت بنا کر ایک آزاد، مستحکم فلسطینی ریاست کا قیام ہے، جو متعلقہ اقوام متحدہ کی قراردادوں اور عرب امن اقدام کے عین مطابق ہو۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews دستخط کی تقریب شہباز شریف غزہ امن معاہدہ مصر کا دورہ وزیراعظم پاکستان وی نیوز.ذریعہ: WE News
کلیدی لفظ: دستخط کی تقریب شہباز شریف غزہ امن معاہدہ مصر کا دورہ وزیراعظم پاکستان وی نیوز شہباز شریف
پڑھیں:
وزیر اعظم غزہ امن معاہدے پر دستخط کی تقریب میں شرکت کیلئے مصر پہنچ گئے
وزیراعظم شہباز شریف غزہ امن معاہدے پر دستخط کی تقریب میں شرکت کے لیے مصر پہنچ گئے۔وزیراعظم شہباز شریف غزہ امن معاہدے پر دستخط کی تقریب میں شرکت کے لیے مصر کے شہر شرم الشیخ پہنچے جہاں ائیر پورٹ پر مصر کے وزیر ڈاکٹر اشرف صبحیی نے وزیراعظم پاکستان کا استقبال کیا۔نائب وزیراعظم و وزیر خارجہ اسحاق ڈار اور وزیراطلاعات عطااللہ تارڑ بھی وزیراعظم کے ہمراہ وفد میں شامل ہیں۔وزیراعظم نے اپنے بیان میں کہا کہ تاریخی ’غزہ امن منصوبے‘ کی دستخطی تقریب میں آج صبح شرم الشیخ پہنچا ہوں، غزہ امن منصوبہ مشرقِ وسطیٰ میں پائیدار امن کی جانب اہم قدم ہے، ہم شریک میزبانوں صدر السیسی اور صدر ٹرمپ کے شکر گزار ہیں، یہ لمحہ صدر ٹرمپ کی غیر معمولی قیادت اور اُن کے عزم صمیم کے بغیر ممکن نہیں تھا۔وزیراعظم شہباز شریف نے کہا کہ امن کے حصول کےلیے ٹرمپ کی یکسو جدوجہد نے خونریزی اور تباہی کا خاتمہ ممکن بنایا، آج کی تقریب ایک نسل کُش باب کے اختتام کی علامت ہے، ایسا باب جس کے دوبارہ کھلنے سے عالمی برادری کو ہر قیمت پر روکنا ہوگا، بہادر اور ثابت قدم فلسطینی عوام ایک آزاد فلسطین کے حقدار ہیں، وہی فلسطین جو 1967 کی سرحدوں کے مطابق ہو جس کا دارالحکومت القدس الشریف ہو۔واضح رہے کہ مصر کے شہر شرم الشیخ میں آج غزہ امن معاہدے پر دستخط کی باقاعدہ تقریب منعقد کی جائے گی، امریکا کے صدر ڈونلڈ ٹرمپ سمیت مختلف ممالک کے سربراہان غزہ امن معاہدے پر دستخط کی تقریب میں شرکت کے لیے مصر پہنچ رہے ہیں۔
جڑواں شہروں میں پلاسٹک آلودگی انسانی صحت کے لئے بڑا چیلنج بن گئی