پنجاب؛ موٹروے کے اطراف اینٹوں کے بھٹوں کی ماحولیاتی مطابقت سے متعلق رپورٹ جاری
اشاعت کی تاریخ: 13th, October 2025 GMT
لاہور:
پنجاب ماحولیاتی تحفظ ادارے (ای پی اے) نے تاریخ میں پہلی بار موٹروے کے اطراف اینٹوں کے بھٹوں کی ماحولیاتی مطابقت (کمپلائنس) رپورٹ جاری کر دی ہے۔
یہ اقدام وزیراعلیٰ پنجاب مریم نواز شریف کی ہدایت پر کیا گیا، جس کے تحت کالا یا سیاہ دھواں خارج کرنے والے تمام بھٹوں کا مکمل ریکارڈ تیار کیا گیا۔
ای پی اے ٹیموں نے موٹروے کے گرد 108 بھٹوں کی جامع جانچ کی، جن میں سے 71 بھٹے جدید ’’زگ زیگ‘‘ ٹیکنالوجی پر چل رہے ہیں اور سفید دھواں خارج کرتے ہوئے ماحولیاتی اصولوں کے مطابق فعال پائے گئے، جبکہ 37 بھٹے غیر فعال تھے جن سے کسی قسم کا اخراج نہیں ہو رہا تھا۔ ہر بھٹے کی جی پی ایس اسٹیمپ کے ساتھ تصویری شہادت بھی رپورٹ کا حصہ ہے۔ اس طرح موٹروے زون میں 100 فیصد ماحولیاتی کمپلائنس حاصل کر لی گئی ہے۔
سینیئر صوبائی وزیر مریم اورنگزیب نے کہا کہ یہ کامیابی وزیراعلیٰ مریم نواز شریف کے صاف فضا، صحت مند پنجاب ویژن کا عملی ثبوت ہے۔ زگ زیگ ٹیکنالوجی سے بھٹوں کے دھوئیں میں نمایاں کمی آئی ہے جس سے سموگ کے خاتمے میں مدد مل رہی ہے۔ ان کے مطابق ای پی اے کی پالیسی سزا کے بجائے اصلاح پر مبنی ہے تاکہ پائیدار نتائج حاصل کیے جا سکیں۔
ای پی اے کی فیلڈ ٹیموں کی کارکردگی پر صوبائی وزیر نے انہیں شاباش دیتے ہوئے کہا کہ حکومت کی توجہ سائنسی بنیادوں پر فضائی آلودگی کے خاتمے پر ہے۔
محکمہ ماحولیات کے مطابق 13 اکتوبر کو شہر کا فضائی معیار مجموعی طور پر 150 رہنے کا امکان ہے، تاہم دوپہر کے وقت فضائی آلودگی میں کمی ہو سکتی ہے جب اے کیو آئی 125 سے 130 تک گرنے کی توقع ہے۔ اس دوران درجہ حرارت 32 ڈگری سینٹی گریڈ اور ہوا کی رفتار 4 تا 5 کلومیٹر فی گھنٹہ رہے گی۔
پنجاب حکومت کی کلین اینڈ گرین لاہور مہم کے تحت اسموگ کنٹرول یونٹس فعال کر دیئے گئے ہیں۔ ای پی اے فورس صنعتی اور تجارتی علاقوں میں ریئل ٹائم انسپکشن کر رہی ہے اور دھواں خارج کرنے والے ذرائع کے خلاف فوری کارروائی جاری ہے۔
اسمارٹ ایئر کوالٹی اسٹیشنز کے ذریعے فضائی معیار کی روزانہ نگرانی اور ٹریفک و صنعتی سرگرمیوں کی منصوبہ بندی کی جا رہی ہے۔ تمام صنعتی چمنیوں کو ای پی اے کے اسموگ وار روم سے منسلک سی سی ٹی وی سسٹم کے تحت مانیٹر کیا جا رہا ہے۔
.
ذریعہ
ذریعہ: Express News
پڑھیں:
مانجھی خیل چیک پوسٹ حملہ، گورنر خیبرپختونخوا نے رپورٹ طلب کر لی
پشاور:گورنر خیبرپختونخوا فیصل کریم کنڈی نے ضلع ٹانک کے علاقے مانجھی خیل میں قائم چیک پوسٹ پر ہونے والے حملے کا نوٹس لیتے ہوئے متعلقہ اعلیٰ حکام سے واقعے کی تفصیلی رپورٹ طلب کر لی ہے۔
اپنے بیان میں گورنر فیصل کریم کنڈی نے حملے کی شدید مذمت کرتے ہوئے اسے ہندوستان کے پروردہ خوارج کی مذموم کارروائی قرار دیا۔ انہوں نے کہا کہ اس بزدلانہ حملے میں ہونے والی شہادتوں پر پوری قوم غمزدہ ہے اور شہداء کی قربانیاں ہمیشہ یاد رکھی جائیں گی۔
گورنر خیبرپختونخوا نے متعلقہ حکام کو ہدایت کی کہ حملے میں زخمی ہونے والے سیکیورٹی اہلکاروں کو ہر ممکن اور بہترین طبی سہولیات فراہم کی جائیں تاکہ ان کے علاج میں کسی قسم کی کوتاہی نہ ہو۔
فیصل کریم کنڈی نے شہداء کے اہل خانہ سے دلی ہمدردی اور تعزیت کا اظہار کرتے ہوئے کہا کہ وہ اس دکھ کی گھڑی میں غمزدہ خاندانوں اور شہید اہلکاروں کے ساتھیوں کے ساتھ برابر کے شریک ہیں۔
انہوں نے شہداء کے درجات کی بلندی، زخمیوں کی جلد صحت یابی اور ملک میں امن و استحکام کے لیے دعا بھی کی۔
متنازع ٹوئٹس کیس: ایمان مزاری، ہادی چٹھہ کی اپیل کی سماعت کل ہوگی