فلم ’قیامت سے قیامت تک‘ کے بعد اپنے کام سے خوش نہیں تھا، لگا کیریئر ختم ہو گیا: عامر خان
اشاعت کی تاریخ: 7th, December 2025 GMT
بالی ووڈ کے مسٹر پرفیکشنسٹ عامر خان نے اپنے کیریئر کے ابتدائی دور کے اُن مشکل لمحوں کا انکشاف کیا ہے جنہوں نے ناصرف انہیں مایوس کیا بلکہ فلمی دنیا چھوڑنے پر بھی مجبور کر دیا تھا۔
بھارتی میڈیا کے مطابق ایک تقریب میں گفتگو کے دوران عامر خان نے اپنی فلم ’قیامت سے قیامت تک‘ کی بلاک بسٹر کامیابی کے بعد پیش آنے والے چیلنجز کا کھل کر اعتراف کیا اور کہا کہ ’قیامت سے قیامت تک‘ بہت بڑی ہٹ فلم تھی، جس نے مجھے راتوں رات اسٹار بنا دیا تھا مگر اس کے بعد جن ڈائریکٹرز کے ساتھ کام کرنا چاہتا تھا، اُن کی طرف سے کوئی آفر نہیں آئی۔
انہوں نے بتایا کہ اُس دور میں ہر طرف سے فلموں کی آفرز آنے لگیں اور میں نے بھی یہ سوچ کر کئی فلمیں سائن کر لیں کہ اگر لوگ ایک وقت میں 30، 40 فلمیں کر سکتے ہیں تو میں بھی 8 سے 10 فلمیں تو کر ہی سکتا ہوں، لیکن جلد ہی مجھے اندازہ ہو گیا کہ یہ فیصلہ بڑا نقصان دہ ثابت ہو گا۔
عامر خان کا کہنا ہے کہ متعدد فلموں پر بیک وقت کام کرنا میری فطرت میں نہیں تھا اور یہی میرے مسائل کی شروعات تھی، جس کی وجہ سے میری ایک کے بعد ایک فلم فلاپ ہونے لگی، مجھے ’ون فلم ونڈر‘ کہا جانے لگا اور ٹھیک ہی کہا جاتا تھا۔
عامر نے اعتراف کیا کہ میں ہر شام گھر آ کر رویا کرتا تھا کیونکہ باقی فلموں کی حالت بھی مجھے پہلے سے پتہ تھی، مجھے لگا میں ڈوب گیا ہوں، جس کے بعد میں نے خود سے وعدہ کیا کہ اب کبھی بھی اپنے کام سے سمجھوتا نہیں کروں گا۔
1990ء میں فلم ’دل‘ نے عامر خان کی ڈگر تبدیل کی، پھر اسی دہائی میں فلم ’راجہ ہندوستانی‘ اور ’سرفروش‘ جیسی بڑی ہِٹ فلموں نے انہیں ایک نئی شناخت دی۔
بعد ازاں ’گجنی‘، ’تھری ایڈیٹس‘، ’پی کے‘ اور ’دنگل‘ جیسی ریکارڈ توڑ فلموں نے اُنہیں ہندوستانی سنیما کا لازوال اسٹار بنا دیا، فلم ’دنگل‘ آج بھی بھارت کی سب سے زیادہ کمائی کرنے والی فلم ہے۔
عامر خان کے مطابق ناکامیوں نے مجھے فیصلہ سازی میں صاف گوئی سکھائی، ایک ایسا اصول جو آج میری پہچان بن چکا ہے۔
عامر خان کی حالیہ فلم ’ستارے زمین پر‘ نے دنیا بھر میں 200 کروڑ روپے کا بزنس کیا، آر ایس پرسنا کی ہدایت کاری میں بننے والی اس فلم میں جینیلیا ڈی سوزا نے بھی اداکاری کے جلوے دکھائے ہیں، فلم نے سنیما کے بعد براہِ راست یوٹیوب ریلیز کا راستہ اختیار کیا اور او ٹی ٹی پلیٹ فارمز کو بائی پاس کیا۔
عامر خان کا سفر اس بات کا ثبوت ہے کہ ناکامی ہی اصل کامیابی کی بنیاد بن سکتی ہے بشرطیکہ انسان اپنے کام سے سمجھوتا نہ کرے۔
.
ذریعہ
ذریعہ: Daily Mumtaz
کلیدی لفظ: کے بعد
پڑھیں:
حیسکو میں ایک ارب 6 کروڑ سے زائد کی کرپشن کا انکشاف
حیدرآباد الیکٹرک سپلائی کمپنی (حیسکو) میں تنخواہوں اور الاؤنسز کی مد میں ایک ارب 6 کروڑ سے زائد کرپشن کا انکشاف ہوا ہے۔
قومی اسمبلی کی پبلک اکاؤنٹس کمیٹی کے اجلاس میں آڈٹ حکام نے انکشاف کیا کہ حیسکو میں گھوسٹ ملازمین، ڈبل تنخواہوں کے ذریعے قومی خزانے کو نقصان پہنچایا گیا اور وفاقی تحقیقاتی ادارہ (ایف آئی اے)99 کروڑ 62 لاکھ کی مبینہ کرپشن کی تحقیقات کر رہا ہے۔
آڈٹ حکام نے مزید انکشاف کیا کہ حیسکو کی اندرونی انکوائری میں مزید 6 کروڑ 78 لاکھ روپے کی مشتبہ ادائیگیاں ہوئی ہیں۔
چیئرمین کمیٹی شاہدہ اختر کی زیرصدارت اجلاس میں ایف آئی اے حکام نے بتایا کہ اس معاملے میں ایف آئی آرز کی تعداد 5 ہوگئی تھی، 151 ملزمان تھے جن میں سے 14 کو گرفتار کیا گیا جبکہ دیگر ضمانت پر ہیں، ایک ارب روپے میں سے 13 کروڑ روپے کی ریکوری ہوئی ہے۔
رکن کمیٹی قاسم نون نے کہا کہ 13 کروڑ روپے کچھ بھی نہیں ہیں، سخت ایکشن لیا جائے، سید امین الحق نے کہا کہ گھوسٹ ملازمین کی تصدیق بھی کی گئی کہ وہ موجود ہیں۔
سینیٹر افنان اللہ خان نے کہا کہ وزارت کو چاہیے کہ وہ مداخلت کرے اور ذمہ داران کا تعین کرے۔
چیئرمین کمیٹی شاہد اختر نے کہا کہ یہ تو آڈٹ نے نشان دہی کر دی ہے، لگتا ہے کہ پاور ڈویژن کا کوئی چیک اینڈ بیلنس نہیں ہے، جس پر سی ای او حیسکو نے بتایا کہ 756 ملین روپے کی ذمہ داری بھی فکس ہو چکی ہے۔
شاہدہ اختر نے کہا کہ عدالت کے حکم تک یہ آڈٹ پیرا زیر التوا رہے گا، رکن کمیٹی سید حسین طارق نے سوال کیا کہ حیسکو میں بائیو میٹرک سسٹم کیوں نہیں ہے۔
پاکستان پیپلزپارٹی (پی پی پی) کی رکن شازیہ مری نے کہا کہ ہم ڈسکوز کو یہاں کمنٹس کے لیے نہیں احتساب کے لیے بلاتے ہیں، یہ لوگوں کو چور کہتے ہیں اور اپنی پرفارمنس کے گیت گاتے نہیں تھکتے۔
پبلک اکاؤنٹس کمیٹی نے ہدایت کی کہ 13 کروڑ روپے کی ریکوری کی آڈٹ سے تصدیق کرائی جائے، جو ریکوری رہ گئی ہے وہ معاملہ زیر التوا رہے گا۔
متنازع ٹوئٹس کیس: ایمان مزاری، ہادی چٹھہ کی اپیل کی سماعت کل ہوگی