افغانستان میں شدید بارشوں اور سیلاب سے 17 افراد جاں بحق
اشاعت کی تاریخ: 2nd, January 2026 GMT
افغانستان میں شدید بارشوں اور سیلابی ریلوں نے تباہی مچا دی، مختلف علاقوں میں 17 افراد جان سے ہاتھ دھو بیٹھے۔
بین الاقوامی خبر رساں اداروں کے مطابق افغانستان میں شدید بارشوں، برف باری اور اچانک آنے والے سیلاب نے بڑے پیمانے پر تباہی مچاتے ہوئے قیمتی جانیں نگل لیں، جہاں مختلف صوبوں میں پیش آنے والے قدرتی حادثات کے نتیجے میں 17 افراد جان سے ہاتھ دھو بیٹھے جبکہ 11 افراد زخمی ہو چکے ہیں۔
غیر ملکی میڈیا رپورٹس کے مطابق یہ بارشیں موسمِ سرما کی پہلی نمایاں بارشیں ہیں، جنہوں نے طویل عرصے سے جاری خشک سالی کا خاتمہ تو کیا، مگر ساتھ ہی بڑے پیمانے پر جانی و مالی نقصان بھی چھوڑ گئیں۔
افغانستان کی نیشنل ڈیزاسٹر منیجمنٹ اتھارٹی کے ترجمان نے تصدیق کی ہے کہ شدید بارشوں اور برف باری کے باعث پیدا ہونے والی سیلابی صورتحال کے نتیجے میں اب تک کم از کم 17 افراد ہلاک جبکہ 11 افراد زخمی ہو چکے ہیں۔
نیشنل ڈیزاسٹر منیجمنٹ اتھارٹی افغانستان کے ترجمان نے کہا کہ متاثرہ افراد میں خواتین اور بچے بھی شامل ہیں، جب کہ بعض علاقوں میں امدادی کارروائیاں مشکل جغرافیائی حالات کے باعث سست روی کا شکار ہیں۔
ترجمان کا کہنا ہے کہ سیلاب اور موسلا دھار بارشوں نے ملک کے وسطی، شمالی، جنوبی اور مغربی علاقوں کو شدید متاثر کیا ہے، جہاں روزمرہ زندگی مفلوج ہو کر رہ گئی ہے۔
انہوں نے کہا کہ کئی دیہات میں سڑکیں زیرِ آب آ گئیں، رابطہ راستے منقطع ہو گئے اور شہریوں کو محفوظ مقامات پر منتقل کرنے کے لیے ہنگامی اقدامات کرنا پڑے۔
حکام کے مطابق سیلابی ریلوں کے باعث انفرااسٹرکچر کو بھی شدید نقصان پہنچا ہے، متعدد مکانات، پل اور سڑکیں تباہ ہو گئی ہیں، جبکہ مویشیوں کی بڑی تعداد کے ہلاک ہونے کی اطلاعات بھی موصول ہوئی ہیں۔
قدرتی آفت کے بعد متعلقہ اداروں نے متاثرہ علاقوں میں امدادی سرگرمیاں تیز کرنے کا اعلان کیا ہے، تاہم موسمی صورتحال کے مزید خراب ہونے کے خدشات کے پیش نظر نقصانات میں اضافے کا امکان ظاہر کیا جا رہا ہے۔
.
ذریعہ
ذریعہ: Al Qamar Online
پڑھیں:
مستونگ میں سیشن جج عبدالحکیم کاکڑ فائرنگ میں شہید، گن مین بھی جاں بحق
بلوچستان کے ضلع مستونگ میں قومی شاہراہ پر نامعلوم مسلح افراد کی فائرنگ کے نتیجے میں سیشن جج عبدالحکیم کاکڑ اور ان کے گن مین شہید ہوگئے، جبکہ ایڈیشنل سیشن جج طارق لاشاری سمیت دو افراد شدید زخمی ہو گئے۔ واقعے کے بعد قانون نافذ کرنے والے اداروں نے علاقے کو گھیرے میں لے کر حملہ آوروں کی تلاش اور تحقیقات کا آغاز کر دیا ہے۔
ڈپٹی کمشنر مستونگ بہرام سلیم کے مطابق سیشن جج عبدالحکیم کاکڑ کوئٹہ سے مستونگ جا رہے تھے کہ قومی شاہراہ پر نامعلوم مسلح افراد نے ان کی گاڑی پر اندھا دھند فائرنگ کر دی۔ حملے کے نتیجے میں سیشن جج اور ان کے گن مین موقع پر ہی شہید ہوگئے، جبکہ گاڑی میں سوار ایڈیشنل سیشن جج طارق لاشاری سمیت دو افراد شدید زخمی ہوئے۔
واقعے کے فوری بعد شہداء اور زخمیوں کو قریبی اسپتال منتقل کیا گیا، جہاں زخمیوں کو طبی امداد فراہم کی جا رہی ہے۔ سکیورٹی فورسز نے جائے وقوعہ کو گھیرے میں لے کر شواہد اکٹھے کیے اور حملہ آوروں کی گرفتاری کے لیے سرچ آپریشن شروع کر دیا ہے۔
دوسری جانب بلوچستان بار کونسل نے حملے کو نظامِ انصاف پر دہشت گردانہ حملہ قرار دیتے ہوئے شدید مذمت کی ہے۔ بار کونسل نے واقعے کے خلاف صوبہ بھر میں دو روزہ عدالتی ہڑتال اور تین روزہ سوگ کا اعلان کیا ہے۔ اعلامیے میں ججز، وکلا اور شہریوں کی سکیورٹی یقینی بنانے، حملے میں ملوث عناصر کی فوری گرفتاری اور انہیں قانون کے مطابق سزا دینے کا مطالبہ بھی کیا گیا۔
وزیراعلیٰ بلوچستان میر سرفراز بگٹی اور صوبائی وزیر داخلہ میر ضیاء اللہ لانگو نے بھی واقعے کی سخت الفاظ میں مذمت کرتے ہوئے شہداء کے اہل خانہ سے اظہار تعزیت کیا۔ انہوں نے متعلقہ اداروں کو حملہ آوروں کی فوری گرفتاری اور واقعے کی جامع تحقیقات کی ہدایت دیتے ہوئے کہا کہ ذمہ دار عناصر کو قانون کی گرفت سے نہیں بچنے دیا جائے گا۔
بھارت سے جنگ اور افغانستان میں کارروائی خارج ازامکان نہیں، وزیردفاع