مزید سخت گیری بے چینی کا علاج نہیں
اشاعت کی تاریخ: 24th, January 2026 GMT
ایران میں جنوری دو ہزار پچیس میں ایک ڈالر کے سات لاکھ اور جون میں اسرائیل سے جنگ کے بعد نو لاکھ ریال مل رہے تھے۔ تازہ بے چینی کا آغاز اٹھائیس دسمبر کو تہران کے گرینڈ بازار سے ہوا جب ایک ڈالر کی قیمت ساڑھے چودہ لاکھ ریال تک پہنچ گئی اور اقتصادی اونٹ کی کمر توڑنے والے آخری تنکے نے تاجروں کو باہر نکلنے پر مجبور کر دیا۔گرینڈ بازار سے اٹھنے والی اس چنگاری نے راتوں رات اکتیس میں سے اٹھائیس صوبوں کو لپیٹ میں لے لیا۔
حکومت چونکہ بازار کی تاریخی سیاسی قوت سے واقف تھی لہذا سپریم لیڈر علی خامنہ ای نے اپنے بیان میں تاجروں کی حقیقی مشکلات کے حل کے لیے بات چیت مگر شرپسندوں سے آہنی طریقے سے نمٹنے کا حکم دیا۔
بازار ( تاجر طبقہ ) ہمیشہ سے ایران میں تبدیلی کا محور رہا ہے۔بیسویں صدی کے شروع میں قاچار بادشاہت کے خاتمے کا ایک بڑا سبب بازار کی بے چینی تھی۔اس بے چینی سے فائدہ اٹھاتے ہوئے موجودہ رضا پہلوی کے دادا کرنل رضا خان نے اقتدار پر قبضہ کر کے خود کو بادشاہ ڈکلیر دیا۔
انیس سو تریپن میں جب برطانوی ایم آئی سکس اور امریکی سی آئی اے نے آپریشن ایجکس کے ذریعے کرائے کے مظاہرین تہران میں جمع کر کے ایرانی تیل کو قومی ملکیت میں لینے والے شاہ مخالف ڈاکٹر محمد مصدق کی ڈھائی برس سے قائم قوم پرست حکومت کا تختہ الٹ کے کرنل رضا خان کے بیٹے محمد رضا شاہ پہلوی کی فسطائیت کو سہولت فراہم کی تب بازار نے کسی ایک فریق کا ساتھ دینے کے بجائے غیرجانبداری دکھائی۔
مگر انیس سو اٹھہتر تک یہی بازار پہلوی استبداد سے تنگ آ کر شاہ مخالف مذہبی طبقے کا ہراول دستہ بن گیا اور بادشاہت کو چمپت ہونا پڑا۔نئی انقلابی حکومت میں بازار کا اثر و رسوخ کئی گنا بڑھ گیا۔اقتصادی و تجارتی پالیسیوں میں اس کی مشاورت شامل رہی۔کابینہ کے کئی قلمدان یکے بعد دیگرے آنے والی حکومتوں میں تاجروں یا ان کے ہم نوا سیاستدانوں کے ہاتھ میں رہے۔طاقت ور فیصلہ ساز ادارے شوریِ نگہبان میں بھی تاجروں کے حق میں بولنے والے علما کی کمی نہیں تھی۔
ایرانی مجلس کے اسپیکر ہاشمی رفسنجانی خود بھی تاجر تھے۔ چنانچہ نوے کی دہائی میں ان کے دورِ صدارت کی تاجر دوستی سے بازاری خاصے مطمئن رہے۔کلیدی ادارے قومیانے کی ریاستی پالیسی کے باوجود تاجروں کو امپورٹ ایکسپورٹ لائسنس اور ٹیکس مراعات کے حصول میں کوئی خاص دشواری نہیں تھی۔
اگرچہ دو ہزار پانچ میں بازار نے احمدی نژاد کے صدارتی انتخاب میں سرگرم کردار ادا کیا۔مگر نئی حکومت کی پالیسیوں میں بدلاؤ سے بازار اور سرکار کے درمیان فاصلہ پیدا ہونا شروع ہوا۔دو ہزار آٹھ میں جب حکومت نے تجارتی آمدنی پر جنرل سیلز ٹیکس عائد کرنے سمیت کچھ تجارتی اصلاحات کی کوشش کی تو تاجروں نے مظاہرے شروع کر دیے اور حکومت کو جی ایس ٹی کا نفاذ موخر کرنا پڑ گیا۔
احمدی نژاد کی کابینہ میں سیکیورٹی اداروں سے منسلک سابق و حاضر شخصیات کو پہلے کی نسبت اچھی خاصی نمائندگی ملی۔چنانچہ سیکیورٹی اداروں اور پاسداران سے منسلک کمپنیوں اور بنیادِ مستضفین ، سیداتِ اجراِ فرمانِ امام اور آستانِ قدسِ رضوی جیسی بڑی بڑی فلاحی فاؤنڈیشنز کو غیر سرکاری ادارے ڈکلئیر کر کے نج کاری کے نام پر معیشت کا بڑا حصہ ان اداروں کے حوالے کر دیا گیا۔
انفراسٹرکچر کے شعبے، بینکاری اور کلیدی پیٹرو کیمیکل صنعت میں ان ’’ نجی اداروں ‘‘ کی سرمایہ کاری سے ایک ایسی بااثر کارپوریٹ پولٹیکل ایمپائر وجود میں آ گئی جس کے ریاستی اثر و رسوخ کو چیلنج کرنا بااثر تاجر طبقے کے لیے بھی محال تھا۔چنانچہ بازار کی تاریخی سیاسی اہمیت کم ہوتی چلی گئی۔
جوں جوں ایران کے جوہری پروگرام کے نام پر مغربی جکڑ بندیاں بڑھتی گئیں۔امپورٹ ایکسپورٹ کے لیے بین الاقوامی پابندیوں کو چکمہ دینا اور بچولیوں سے کام نکلوانا بازار کے تاجروں کے بس میں نہیں تھا لہذا سیکیورٹی اداروں کی نمایندہ کمپنیوں اور تجارتی اداروں کی گرفت بین الاقوامی تجارت کے شعبے پر مضبوط ہوتی چلی گئی۔
مگر گرفت مضبوط ہونا اور اس کے نتیجے میں معاشی استحکام پیدا ہونا دو الگ الگ باتیں ہیں۔ اس وقت حالت یہ ہے کہ جو ایران پابندیاں سخت ہونے سے قبل بائیس لاکھ بیرل روزانہ تیل ایکسپورٹ کرتا تھا۔اب یہ پیداوار ایک ملین بیرل روزانہ تک آ گئی ہے کیونکہ آئل انڈسٹری کی فرسودہ ٹیکنالوجی میں جدت کاری پابندیوں کے سبب دشوار ہے ( وینزویلا کے ساتھ بھی انیس سو اٹھانوے کے بعد یہی کچھ ہوا )۔
ایران کو چونکہ ضرورت کے مطابق ڈالر بھی میسر نہیں لہذا خام تیل بھی گاہک کی اپنی کرنسی یا بارٹر میں آئل ٹینکرز کے شیڈو فلیٹس کے ذریعے مارکیٹ ریٹ سے کم میں فروخت کرنا پڑتا ہے۔ایران جو اشیا بیرونِ ملک سے منگواتا ہے ان میں سے ایک تہائی خوراک پر مشتمل ہے۔ادویات کی قیمت تین سو گنا زائد ہے کیونکہ درآمدات کا دار و مدار بھی بچولیوں ، اسمگلنگ اور فرنٹ کمپنیوں پر ہے ۔چنانچہ چور بازاری ، بلیک مارکیٹنگ اور کرپشن اس پیکیج کا لازمی حصہ ہیں۔
اس وقت افراطِ زر پچاس فیصد اور بے روزگاری کی حقیقی شرح لگ بھگ اٹھائیس فیصد ہے۔لگی بندھی اجرت پانے والے کارکنوں اور تنخواہ دار طبقے کی روزمرہ حالت لامحالہ تکلیف دہ ہے۔دو ہزار چوبیس کے مقابلے میں آج خوراک کی قیمت بہتر فیصد زائد ہے۔
دو ہزار بارہ میں قومی پیداوار آٹھ ہزار ڈالر فی کس تھی جو اب کم ہو کر پانچ ہزار ڈالر فی کس تک پہنچ گئی ہے۔چنانچہ گذشتہ پندرہ برس میں متوسط طبقہ تیزی سے سکڑا اور پرچیزنگ پاور میں کمی کے نتیجے میں تیس فیصد مڈل کلاس اب لوئر مڈل کلاس میں شمار ہو رہی ہے۔
پابندیوں کے سبب گرین ٹیکنالوجی تک رسائی بھی مشکل ہے چنانچہ بڑے بڑے شہروں میں ٹریفک اور آلودہ پٹرول کے سبب آب و ہوا خاصی ابتر ہے۔اس کا سب سے بڑا نشانہ بچے اور معمر افراد ہیں۔گذشتہ چھ برس سے جاری خشک سالی کے مضر اثرات الگ سے ظاہر ہو رہے ہیں۔
اگرچہ ایرانی حکومت نے سترہ روزہ احتجاجی لہر کو فی الحال بزورِ طاقت دبا دیا ہے۔مگر اقتصادی زبوں حالی کے ڈھیر میں لگنے والی چنگاری کو محض امریکا اسرائیل سازش قرار دینے سے عوام کا مسئلہ حل نہیں ہو گا۔بین الاقوامی اقتصادی پابندیاں آنے والے دنوں میں مزید سخت ہوں گی مگر اس کا یہ مطلب نہیں کہ اندرونی طور پر سماجی و اقتصادی اصلاحات اور کرپشن کی روک تھام نہیں ہو سکتی۔
ریاستی ڈھانچہ مسلسل سخت گیری کے ساتھ بھی ایک حد تک ہی نتیجہ خیز ہو سکتا ہے۔عوام چھیالیس برس کی جکڑ بندیوں سے بیزار ہیں بھلے وجوہات کچھ بھی ہوں۔انھیں اب ایک محاصرہ زدہ اور اندر سے بند ریاست میں اقتصادی اور سماجی کھلے پن کی تھوڑی بہت آکسیجن چاہئیے۔
جمہوری اختلافِ رائے برداشت نہ کرنا اور تخلیقی آزادی کو ریاستی گھٹنے تلے دبا کے رکھنے جیسے ہتھکنڈوں سے سناٹا تو پیدا ہو سکتا ہے مگر قومی تائید و ریاست پر مکمل اعتماد پیدا نہیں ہو سکتا۔
چند لوگ ایسی فضا میں ہر کچھ عرصے بعد اندرونی و بیرونی وجوہات کے سبب تشدد پر اترتے رہیں گے۔ اکثریت بظاہر اس تشدد کی حامی نہ بھی ہو تب بھی ریاست کے ساتھ نہیں کھڑی رہے گی۔چنانچہ مزید سختی کے بجائے بتدریج نرمی میں ہی دیرپا علاج پنہاں ہیں۔ویسے بھی اندر سے کمزور ہوتی ریاست بیرونی دباؤ کا آخر کب تک مقابلہ کر سکتی ہے؟ تاریخ میں جا بجا ایسی مثالوں کا ملبہ بکھرا پڑا ہے۔
(وسعت اللہ خان کے دیگر کالم اور مضامین پڑھنے کیلیے bbcurdu.
ذریعہ
ذریعہ: Express News
کلیدی لفظ: بے چینی نے والے کے سبب
پڑھیں:
کے فور منصوبہ مزید تاخیر کا شکار، 2029 تک مکمل ہونے کا امکان
کراچی میں اضافی پانی کا منصوبہ کے فور کی تکمیل میں مزید تین سال لگ سکتے ہے جبکہ منصوبے کا اصل کام تو ابھی شروع ہی نہیں ہوا جب وہ ہوگا تو شہر کی مرکزی سڑکیں متاثر ہوگی۔
ایکسپریس نیوز کو واٹر کارپوریشن حکام کے سینئر افسران نے اس کی تصدیق کی کہ منصوبے میں مزید ڈھائی سال لگ سکتے ہے، اگر کام اسی طرح ہوتا رہے تو اس منصوبے میں وفاق، سندھ حکومت ، بین الاقومی مالیتی اداروں کی فنڈنگ بھی کی گئی۔
حکام نے بتایا کہ 12 سال پہلے یہ منصوہہ 25 ارب روپے مکمل ہو جانا تھا تاہم اب اس کی لاگت 200 ارب روپے سے زائد ہوچکی ہے اور آنے والے وقت تخمینی لاگت میں مزید اضافہ کا بھی امکان ہے۔
تفصیلات کے مطابق کراچی میں پانی کی طلب 1ارب 20 کروڑ گیلن ہے جبکہ رسد 65 کروڑ گیلن ہے شہر کو مزید پانی فراہم کر نے کے لئے کے فور منصوبہ بنانے کا اعلان کیا تھا لیکن حکومتین تبدیل ہوتی رہی لیکن یہ منصوبہ 20 سال سے زیر التواء ہے۔
2014 میں اس منصوبے کو وفاق اور سندھ حکومت نے مل کر بناناتھا جس کی لاگت 25 ارب روپے بتا ئی گئی تھی لیکن پھر کھٹائی میں پڑ گیا تاہم پھر اس کو واپڈ کو دیا گیا اور اس کی مکمل ہونے کی ڈیڈ لائن بھی دی گئی لیکن اس میں مکمل نہیں ہوسکا۔
کئی ڈیڈ لائن گزر گئیں لیکن منصوبہ مکمل نہیں ہوسکا تاہم اب وفاقی وزیر احسن اقبال نے دسمبر 2026 کی ڈیڈ لائن دی ہے۔ ایکپسریس نیوز نے مختلف ذرائع سے جو تفصیلا ت حاصل کیں ان کے مطابق کے فور منصوبہ 2026 میں بھی مکمل نہیں ہوسکے گا اس کی مکمل ہونے کا امکان 2029 کی جنوری تک ہے۔
ایک ذرائع نے بتایا کہ اگر کام اسی رفتار سے کام چلتا رہا تو نومبر 2025 کو آگمیٹیشن کام نیپا چورنگی سے شروع ہوا جو حسن اسکوائر تک محیط ہے، اس کی لمبائی 2 اعشاریہ 7 کلو میٹر طویل ہے اب تک مکمل نہیں ہوسکا کیونکہ یہ تو صرف ابتداء ہے اصل کام تو آر ون، آر ٹو، آر تھری کا کام جو اب تک شروع ہی نہیں ہوا۔
سب سے حیرت انگیز بات یہ ہے کہ ان کا ٹھیکہ ہی نہیں ہوسکا کہ کام کون کریں گا آر ون ،آر ٹو ، آر تھری ہے کیا یہ ریروائر کی لائنیں ہے آر ون 26 کلومیٹر طویل ہے ، آر ٹو40کلومیٹر طویل ہے جبکہ آرتھری 28 کلومیٹر طویل بتائی جا تی ہے۔
یہ لائنیں شہر کے وسط سے ہوتی ہوئی گزریں گی ان لائنوں کا مختلف نمبرز دئیے گئے ہے یہ لائنیں ڈلنے کے بعد ہی کراچی کو اضافی پانی مل سکے گا جب لائنوں کا مکمل شروع ہوگا تو شہر کی اہم شاہراہوں کو کھودنا پڑے گا، جس میں 72 انچ اور 96 انچ کی لائنیں ڈالی جا ئیں گی۔
صرف ایک روڈ آر ٹو کی تفصیلات فراہم کرر ہے ہیں یہ ریزر وائر ٹو نادرن بائی سے واپڈ کے ڈبلیو ایس ایس آئی پی کے سپرد کریں گی جو کھدائی کرتی ہوئی۔
نادرن بائی پاس، ٹول پلازہ سے سپرہائی وے ، پھر جنجال گوٹھ سے ہوتی ہوئی سہراب گوٹھ ، وہاں سے ابوالحسن اصفہانی روڈ ، ڈسکو بیکری سے ہوتی ہے گلشن چورنگی ، رب میڈیکل سے ہوتی ہوئی ہے سرسید یونی ورسٹی سےنیپا چورنگی پر آگمینٹیشن سے منسلک کیا جا ئے گا۔
پھر یہ حسن اسکوائر سے ہوتا ہوا غریب آباد ، لیا قت آباد ، ناظم آباد، حبیب بنک چورنگی ، سے ہوتی ہوئی گلبائی تک جا ئیں گی، یہ راستہ ہے (آر ٹو) ریزر وائر ٹو کے فور کے لئے ڈالی جانی والی لائن اس کے لئے جب لائن ڈالنے کا کام ہو گا تو کھدائی ہوگی جس میں 72 انچ اور کسی مقام پر 96 انچ کی لائن ڈالی جا ئیں گی۔
اندازہ لگانا مشکل نہیں یہ 94 کلو میٹر کی لائنیں ڈالنے کے لئے 80 ارب روپے لگے اس کے لئے 2 بین الاقومی مالیتی ادارے 80 فیصد قرضے کی صورت میں فنڈ فراہم کر یں گے جبکہ 20 فیصد فنڈ سندھ حکومت فراہم کر یگا۔
ذرائع کا کہنا ہے کہ یہ 80 ارب روپے صرف آرون، آرٹو، آر تھری کی لائنیں ڈالنے میں خرچ ہوں گے جبکہ 124 ارب ٹرانسمیشن لائن، پمپنگ اسٹیشنز، فلٹر پلانٹٹس اور دیگر کاموں میں خرچ ہوں گے۔
ذرائع کا کہنا ہے کہ کے فور منصوبے پر وفاق کی جانب سے تین کام کئے جا نے ہے جن میں ٹراسمیشن لائن ، پمپنگ اسٹیشن اور فلٹر پلانٹ بنا نے کے کام کی ذمہ داری ہے جبکہ سندھ حکومت کے پاس چار کام کرنے تھے اس میں اراضی مہیا کرنا، آگمینٹیشن ، الیکٹرک سپلائی اور اری گیشن کی ذمہ داری تھی جو کینچھر جیل سے پانی فراہم کرنے میں مدد کریگا۔
ذرائع کا کہنا ہے کہ اس منصوبے کا ابھی بہت کام کرنا باقی ہے آگمیٹیشن کانیپا سے حسن اسکوائر کا نومبر 2025 سے اب تک کام مکمل نہیں ہوسکا بلکل بین الاقومی مالیتی ادارے نے اس کو غیر معیا ری قرار دے دیا ہے اور ابھی تو بہت کام باقی جب یہ لائنیں شہر کی مرکزی راستوں میں ڈالی جا ئیں گی اس وقت شہریوں کو آمد ورفت میں مزید مشکلا ت کا سامنا کرنا پڑیگا۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ