وزیراعلیٰ پنجاب نے رمضان نگہبان پیکیج کی منظوری دے دی
اشاعت کی تاریخ: 26th, January 2026 GMT
فائل فوٹو۔
وزیراعلیٰ پنجاب مریم نواز نے رمضان نگہبان پیکیج کی منظوری دے دی، رمضان میں صوبے کے 42 لاکھ مستحق خاندانوں کو 10، 10 ہزار روپے ملیں گے۔
وزیراعلیٰ پنجاب کی زیرصدارت رمضان کی تیاریوں اور عوامی ریلیف سے متعلق اجلاس لاہور میں ہوا۔
حکومت کی جانب سے رمضان میں نادار افراد کو نگہبان کارڈز مہیا کیے جائیں گے۔ نادار افراد کیلئے راشن کارڈ، نگہبان دسترخوان، سہولت بازار اور دیگر انتظامی امور کی منظوری دی گئی۔ رمضان نگہبان کارڈ سے کیش کے علاوہ دیگر ضروری اشیا خریدنے کی سہولت ہوگی۔
ضلعی انتظامیہ متعلقہ علاقوں میں گھر گھر جا کر وزیراعلیٰ پنجاب رمضان نگہبان کارڈ فراہم کرے گی۔ رمضان نگہبان کارڈ کے ذریعے بینک آف پنجاب برانچ لیس بینکنگ ایجنٹ سے بھی کیش حاصل کرسکیں گے۔
رمضان نگہبان کارڈ کے ذریعے ون لنک نیٹ ورک اے ٹی ایم کے ذریعے بھی کیش حاصل کیا جا سکے گا۔ بینک آف پنجاب کے مقررہ دکانداروں سے رمضان نگہبان کیش کے ذریعے خریداری کی جاسکے گی۔
وزیراعلیٰ مریم نواز رمضان نگہبان کارڈ کی ایکٹیویشن کے لیے 136 ایکٹیویشن مراکز قائم کیے جائیں گے۔ رمضان نگہبان کارڈ پنجاب بینک کی اے ٹی ایم پر بھی ایکٹیویٹ کیا جاسکے گا۔
پنجاب بھر میں راشن کارڈ ہولڈرز کو رمضان میں 3 ہزار ماہانہ کی بجائے 10 ہزار روپے دیے جائیں گے۔ رمضان نگہبان ڈیش بورڈ قائم اور کارڈ ہولڈرز کو کال کر کے کاؤنٹر چیکنگ کا نظام قائم کیا جائے گا۔
ہر تحصیل میں رمضان المبارک میں 8 نگہبان دستر خوان اور مریم کے مہمان قائم کرنے کی منظوری بھی دی گئی۔ ہر تحصیل میں نگہبان دسترخوان کے تحت ہر روز 2 ہزار روزہ داروں کی افطاری کرائی جائے گی۔ روزہ داروں کی کھجور، سموسہ، شربت، فروٹ اور چکن بریانی سے تواضع کی جائے گی۔
رمضان المبارک میں پنجاب کے 30 اضلاع میں 65 سہولت بازار فنکشنل ہوں گے۔ پنجاب کے11 اضلاع میں عارضی رمضان سہولت بازار قائم کیےجائیں گے۔
فری ہوم ڈلیوری کیلئے نگہبان کارڈ سے ادائیگی کی سہولت فراہم کرنے کی ہدایت کی گئی۔ سہولت بازاروں میں نرخ، صفائی، سیکیورٹی اور دیگر امور کی نگرانی کیلئے 1250کیمرے اور مانیٹرنگ روم قائم کیے جائیں گے۔
وزیراعلیٰ مریم نواز نے رمضان المبارک میں نرخ مزید کم کرانے کیلئے بھی اقدامات کی ہدایت کی ہے۔ فلور ملز، چکن، کریانہ اور گھی ملز ایسوسی ایشن کے اسٹائل بھی قائم ہوں گے۔
وزیراعلیٰ پنجاب مریم نواز نے کہا کہ کوئی بھی مستحق خاندان رمضان المبارک میں خود کو تنہا محسوس نہ کرے۔ انھوں نے کہا دکھ سکھ میں غریب عوام کے ساتھ کھڑے رہیں گے، خدمت کے جذبے کے ساتھ فرائض انجام دیےجائیں تو اللہ تعالیٰ راضی ہوتا اور رزق بڑھتا ہے۔
مریم نواز نے کہا کہ اللہ تعالیٰ کی مخلوق کی خدمت کی ذمہ داری میری ہی نہیں بلکہ ہر کمشنر، ڈی سی اور ہر افسر کی ہے۔
وزیراعلیٰ مریم نواز نے ہر ضلع میں نہروں کی بھل صفائی کی بروقت تکمیل کا بھی حکم دیا۔ سرگودھا میں صفائی کی صورتحال بہتر نہ ہونے پر اظہار ناپسندیدگی کیا اور ڈی سی کو کارکردگی بہتر بنانے کی ہدایت کی۔
.
ذریعہ
ذریعہ: Jang News
کلیدی لفظ: رمضان نگہبان کارڈ رمضان المبارک میں مریم نواز نے کی منظوری جائیں گے کے ذریعے
پڑھیں:
پاکستان ڈی ایٹ ممالک کے ساتھ مضبوط معاشی شراکت داری قائم کرنا چاہتا ہے، عرفان سومرو
وزارت خارجہ کے ڈائریکٹر جنرل عرفان سومرو نے کہا ہے کہ تجارتی ڈپلومیسی حکومت پاکستان کی خارجہ پالیسی کا بنیادی ستون ہے اور پاکستان ڈی ایٹ ممالک کے ساتھ محض تجارتی حجم بڑھانے کا خواہاں نہیں بلکہ مضبوط اور پائیدار معاشی شراکت داری قائم کرنا چاہتا ہے۔
فیڈریشن ہاؤس کراچی میں فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے زیر اہتمام ڈی ایٹ چیمبرز آف کامرس اینڈ انڈسٹری (D-8 CCI) کی پاکستان نیشنل کمیٹی کے اجلاس سے خطاب کرتے ہوئے دائریکٹر جنرل وزارت خارجہ عرفان سومرو نے کہا کہ ڈی ایٹ کے قیام کو تین دہائیاں گزر چکی ہیں، اب وقت آ گیا ہے کہ اس وژن کو عملی اقدامات میں تبدیل کیا جائے۔
ان کا کہنا تھا کہ ڈی ایٹ ممالک کی مشترکہ معیشت تقریباً 5 ہزار ارب ڈالر پر مشتمل ہے اور ایک ارب سے زائد آبادی مشرق بعید سے افریقہ تک پھیلی ہوئی ہے، جو باہمی تجارت اور سرمایہ کاری کے بے شمار مواقع فراہم کرتی ہے۔
انہوں نے کہا کہ زراعت، معدنیات، سیاحت اور نوجوان افرادی قوت ڈی ایٹ ممالک کے اہم اثاثے ہیں، تاہم مختلف مفاہمتی یادداشتوں (ایم او یوز) پر مؤثر عمل درآمد نہ ہونے کے باعث رکن ممالک اپنی حقیقی معاشی صلاحیت سے بھرپور فائدہ نہیں اٹھا پا رہے۔
ڈی جی وزارت خارجہ کے مطابق پاکستان کی ڈی ایٹ ممالک کے ساتھ سالانہ تجارت تقریباً 11 ارب ڈالر ہے، جس میں 8 ارب ڈالر درآمدات جبکہ 2.8 ارب ڈالر برآمدات شامل ہیں، اس عدم توازن کو کم کرنے اور برآمدات میں اضافے کی ضرورت پر زور دیا۔
عرفان سومرو نے کہا کہ پاکستان کی بندرگاہیں اور نوجوان آبادی ملکی معیشت کے لیے قیمتی اثاثہ ہیں، کاروباری برادری پر زور دیتے ہوئے انہوں نے کہا کہ وہ پاکستانی سفارت خانوں کے ساتھ روابط بڑھائے تاکہ نئی منڈیوں تک رسائی اور سرمایہ کاری کے مواقع سے فائدہ اٹھایا جا سکے۔
انہوں نے کہا کہ حکومت بین الاقوامی معاہدے اور سازگار پالیسی فریم ورک فراہم کر سکتی ہے، تاہم تجارت اور سرمایہ کاری کو فروغ دینا نجی شعبے کی ذمہ داری ہے، اس سلسلے میں ایف پی سی سی آئی کا کردار انتہائی اہم ہے۔
ڈائریکٹر جنرل وزارت خارجہ نے خواتین اور نوجوان کاروباری افراد پر زور دیا کہ وہ علاقائی تجارت اور اقتصادی سرگرمیوں میں بھرپور کردار ادا کریں، پاکستان ڈی ایٹ ممالک کے ساتھ تعلقات کو مزید مضبوط بنانے کے لیے مکمل طور پر تیار ہے۔
اس موقع پر ایف پی سی سی آئی کے صدر عاطف اکرام شیخ نے قاہرہ میں منعقدہ چوتھی ڈی ایٹ ٹریڈ منسٹر کونسل کے فیصلوں کا خیرمقدم کرتے ہوئے استنبول میں ترکیہ کی تنظیم TOBB کی سرپرستی میں ڈی ایٹ چیمبرز کے مستقل سیکرٹریٹ کے قیام کو اہم پیش رفت قرار دیا۔
ڈی ایٹ سیکریٹری جنرل سہیل محمود نے اپنے خصوصی پیغام میں رکن ممالک پر زور دیا کہ وہ حلال معیشت، مالیاتی انضمام اور علاقائی تجارت کے مواقع سے بھرپور فائدہ اٹھائیں۔
ایف پی سی سی آئی کے سینئر نائب صدر ثاقب فیاض مگوں نے کہا کہ ڈی ایٹ ممالک کے درمیان اندرونی تجارت میں نمایاں اضافہ وقت کی اہم ضرورت ہے اور فیڈریشن پریفرینشل ٹریڈ ایگریمنٹ (پی ٹی اے) کو ناگزیر سمجھتی ہے۔
اجلاس میں انڈونیشیا، ترکیہ، ایران، مصر، ملائیشیا، نائجیریا، آذربائیجان اور بنگلہ دیش کے قونصل جنرلز، سینئر سفارت کاروں، ایف پی سی سی آئی کے نائب صدور امان پراچہ، آصف سخی، سابق صدر زبیر طفیل، سابق نائب صدور خالد تواب، حنیف گوہر، شبیر منشا، ناہید مسعود، نازلی عابد، ماہین خان اور دیگر کاروباری رہنماؤں نے بھی شرکت کی۔
متنازع ٹوئٹس کیس: ایمان مزاری، ہادی چٹھہ کی اپیل کی سماعت کل ہوگی