اسلامی انقلاب کی نوید… اجتماع عام
اشاعت کی تاریخ: 21st, November 2025 GMT
data-id="863a0a8" data-element_type="widget" data-widget_type="theme-post-content.default">
جماعت اسلامی پاکستان کے امیر حافظ نعیم الرحمن نے اعلان کیا ہے کہ جماعت اسلامی عوام کو وڈیروں، جاگیرداروں اور مافیاز کے رحم و کرم پر نہیں چھوڑے گی بلکہ ان طبقات کے ستائے ہوئے اور پریشان حال عوام کی داد رسی کا فرض پورا کرے گی۔ جماعت اسلامی کے کل پاکستان اجتماع عام کے انتظامات اور تیاریوں کا تفصیلی جائزہ لینے کے بعد بدھ کے روز مینار پاکستان کے زیر سایہ عظیم تر اقبال پارک کے نیشنل ہسٹری میوزیم میں ناظم اجتماع نائب امیر جماعت اسلامی پاکستان لیاقت بلوچ، سیکرٹری جنرل امیر العظیم، لاہور کے امیر ضیاء الدین انصاری اور دیگر رہنمائوں کے ہمراہ ذرائع ابلاغ کے نمائندوں کو بریفنگ دیتے ہوئے حافظ نعیم الرحمن نے اجتماع کے انتظامات پر اطمینان کا اظہار کرتے ہوئے ناظم اجتماع لیاقت بلوچ اور ساتھی کارکنوں کی شب و روز کی محنت کو سراہا۔ ملکی تاریخ کے حقائق سے نقاب کشائی کرتے ہوئے انہوں نے کہا کہ 78 سال سے ظلم و جبر کے نظام نے عوام کو ریلیف دینے کے بجائے لوگوں کے ارمانوں کا خون کیا۔ عدالتیں انصاف دے سکیں نہ ادارے کسی کام آسکے۔ عوام بنیادی حقوق اور سہولتوں سے محروم ہیں کوئی ان کا پرسان حال نہیں۔ 26 ویں اور 27 ویں ترمیم نے تو بیڑا غرق کردیا ہے۔ جماعت اسلامی عوام کو وڈیروں، جاگیرداروں اور مافیاز کے رحم و کرم پر نہیں چھوڑ سکتی۔ جماعت اسلامی کے اجتماع عام میں شرکت کے لیے ملک بھر سے قافلے مینار پاکستان لاہور پہنچنا شروع ہوگئے، ہیں لاکھوں لوگوں کے قیام و طعام کے لیے انتظامات مکمل کرلیے گئے ہیں۔ بیرونی ممالک سے اسلامی تحریکوں کے قائدین بھی بڑی تعداد میں اجتماع میں شریک ہوں گے۔ جماعت اسلامی کا یہ اجتماع عام ملک و قوم کے لیے امید کے نئے چراغ روشن کرے گا۔ ابراہم معاہدہ پر دستخط، ٹرمپ کا امن منصوبہ اور دو ریاستی حل قبول کرنا اسرائیل کو تسلیم کرنے کے مترادف ہے۔ فلسطین پر ایک بار پھر برطانوی سامراج کا تسلط قبول نہیں۔ پاکستان کسی جرنیل، بیوروکریٹ یا کسی اور طاقتور شخصیت کا نہیں، پچیس کروڑ غیور عوام کا ہے۔ ہم نے سلامتی کونسل میں امن منصوبے پر پاکستان کے ووٹ ہی کی مخالفت کی ہے۔ اس منصوبے کو فلسطین کی اصل قیادت نے بھی مسترد کیا ہے۔ حافظ نعیم الرحمن نے کہا کہ عوام اس وقت سخت مایوسی اور پریشانی میں ہیں، انہیں کسی طرف سے امید کی کوئی کرن نظر نہیں آرہی ، ملک کی مجموعی آبادی کا 65 فی صد نوجوان ہیں مگر انہیں تعلیم اور روز گار نہیں مل رہا۔ اعلیٰ تعلیم کے دروازے غریب کے لیے بند کردیے ہیں۔ طبقاتی نظام تعلیم میں امیر کا بچہ پڑھ رہا اور غریب کا بچہ اسکول سے باہر ہے، چند لیپ ٹاپ تقسیم کرکے حکمران سمجھتے ہیں کہ ان کا فرض پورا ہوگیا۔ عام لوگوں کی تعلیم اور ٹیکنالوجی تک رسائی نہیں۔ ملک میں لینڈ مافیاز، ڈرگ مافیاز، آئی پی پیز مافیاز چینی اور آٹا مافیاز ٹھیکیداروں اور وڈیروں کا راج ہے۔ سیکڑوں مربع زمین کے مالک ٹیکس چوری کرتے ہیں یہ لوگ خود تو ٹیکس دیتے نہیں الٹا مزدوروں، کسانوں اور چھوٹے ملازمین کے ٹیکسوں پر عیش کرتے ہیں۔ 83 فی صد کسانوں اور مزدوروں کو ملازمت کے حقوق حاصل نہیں وہ جاگیرداروں اور ٹھیکیداروںکے رحم و کرم پر ہوتے ہیں۔ خواتین کو تحفظ حاصل نہیں، کام کرنے کی جگہ پر انہیں ہراسمنٹ کا سامنا ہوتا ہے۔ ان پریشان اور ستائے ہوئے عوام کی داد رسی کا فرض جماعت اسلامی پورا کرے گی۔ جماعت اسلامی عوام سے اتحاد کرے گی۔ کسان، مزدور، اساتذہ، طلبہ اور وکلا جماعت اسلامی کے اتحادی ہیں۔ ہم مزدوروں، محنت کشوں، کسانوں، طلبہ، خواتین سمیت پسے ہوئے طبقے کو حقوق دلائیں گے۔ ہم سب مل کر ملک میں اسلام کے غلبے کی تحریک چلائیں گے۔ ملک میں اللہ کا نظام نافذ ہوجائے تو ظلم کا نظام خود بخود دم توڑ جائے گا۔ جماعت اسلامی کا یہ اجتماع عام اسی عظیم مقصد کے لیے منعقد ہورہا ہے۔ مینار پاکستان سے اتحاد ویک جہتی کا پیغام پورے پاکستان میں جائے گا۔ جماعت اسلامی منظم طریقے سے اپنا کام کرتی ہے۔ پورا پاکستان ایسی تحریک کا منتظر ہے جس کو منظم لوگ لے کر اٹھیں۔ پاکستان ہم سب کا گھر ہے اور اس گھر کو بچانا ہم سب کی ذمے داری ہے۔ زی جنریشن اور نوجوانوں کے لیے تعلیم اور روز گار کا بہت بڑا پیکیج لائیں گے۔ نوجوانوں کے مستقبل کو روشن کرنے کے لیے انہیں تعلیم کے ساتھ ساتھ روز گار بھی دیں گے۔ خواتین کو اسلام نے احترام اور وقار دیا ہے اسے بحال کرائیں گے۔ مزدور اور کسان طلبہ و وکلا نظام بدلنے کی تحریک میں ہمارے شانہ بشانہ ہوں گے۔ اجتماع عام میں خواتین عالمی کانفرنس میں لاکھوں خواتین شریک ہوں گی، یہ خواتین کا دنیا بھر میں سب سے بڑا اجتماع ہوگا۔ ملک میں موجود سیکڑوں سیاسی جماعتوں میں جماعت اسلامی کو جہاں مثالی تنظیم، باقاعدگی سے ہر سطح پر جماعت کے اندرونی انتخابات، امین و دیانت دار قیادت، ہر مشکل وقت میں زمینی و آسمانی آفات کے دوران صرف پاکستانی اور مسلمان عوام ہی کی نہیں بلکہ بلا امتیاز رنگ و نسل پوری انسانیت کی بے لوث خدمت اور ’’بنوقابل‘‘ جیسے پروگراموں کے ذریعے نوجوان نسل کے لیے امید کی شمعیں روشن کرنے سمیت بہت سے منفرد اعزازات حاصل ہیں، وہیں یہ اعزاز بھی صرف جماعت اسلامی ہی کو حاصل ہے کہ وہ مقامی سطح پر ہمہ وقت اپنے کارکنوں کو اپنی جماعت کی پالیسیوں سے متعلق اعتماد میں لیتی اور ان کی حکمت سے آگاہ کرنے کا اہتمام کرتی ہے اور اس کے ساتھ ساتھ حالات کے تقاضوں اور ملکی صورت حال کو پیش نظر رکھ کر مختلف وقفوں سے ملک بھر سے اپنے ارکان و کارکنان ہی کو نہیں ہمدردان و متفقین کو بھی ایک جگہ جمع کر کے انہیں ملکی و بین الاقوامی حالات سے اسلامی تناظر میں آگاہ کرنے اور درپیش معاملات میں رہنمائی فراہم کرنے کا موثر اہتمام کرتی ہے۔ ملک میں جمہوریت اور عوام کی نمائندگی کے بلند بانگ دعوئوں کے ساتھ کام کرنے والی بڑی بڑی اور بے پناہ مالی و دیگر وسائل رکھنے والی سیاسی جماعتوں کو کبھی یہ ہمت نہیں ہوتی کہ وہ عوام کو اپنی پالیسیوں کے بارے میں اعتماد میں لینے کے لیے کوئی بڑا اجتماع منعقد کریں۔ جماعت اسلامی کا ایسا ہی ایک بڑا ملک گیر سہ روزہ اجتماع 21 سے 23 نومبر تک مینار پاکستان کے زیر سایہ تاریخی عظیم تر اقبال پارک میں منعقد ہو رہا ہے جس میں کارکنوں کی تعلیم و تربیت اور قومی و بین الاقوامی حالات حاضرہ سے آگاہی کا بندوبست بھی ہو گا اور تذکیہ نفس کا اہتمام بھی۔ جماعت اسلامی کی قیادت اس اجتماع کو ملک کے موجودہ فرسودہ نظام کی تبدیلی کے پیش خیمہ کے طور پر دیکھ رہی ہے۔ اور اجتماع عام کے بعد ملک میں رائج ظالمانہ اور جابرانہ نظام کو جڑ سے اکھاڑ پھینکنے کی بڑی تحریک برپا کرنے کا عزم رکھتی ہے، جس کی تفصیلات کا اعلان امیر جماعت اسلامی پاکستان حافظ نعیم الرحمن اجتماع کے آخری روز اپنے کلیدی خطاب میں کریں گے۔ آئیے دعا کریں کہ اللہ تعالیٰ اس اجتماع کو اسلامیان پاکستان کے دیرینہ خواب، جس کی خاطر لاکھوں جانوں کی قربانی دی گئی… اور برصغیر پاک و ہند کے مسلمانوں نے تاریخ کی سب سے بڑی ہجرت کی عزیتیں برداشت کی اسلامی انقلاب کی نوید بنا دے۔ ایں دعا از من و از جملہ جہاں۔
ذریعہ: Jasarat News
کلیدی لفظ: حافظ نعیم الرحمن مینار پاکستان جماعت اسلامی پاکستان کے عوام کو ملک میں کے لیے
پڑھیں:
محکمہ داخلہ نے جماعت اسلامی کو مینار پاکستان پر اجتماع کی اجازت دے دی
لاہور(ڈیلی پاکستان آن لائن)محکمہ داخلہ پنجاب نے ضلعی انتظامیہ کی سفارش پر مینار پاکستان پر دینی، دعوتی اور اصلاحی اجتماع کی اجازت دے دی۔
نجی ٹی وی چینل دنیا نیوز کے مطابق جماعت اسلامی نے 21 سے 23 نومبر تک دینی، دعوتی، اصلاحی اجتماع کیلئے این او سی کی درخواست کی تھی، ضلعی انٹیلی جنس کمیٹی نے دفعہ 144 کے حکمنامے میں مخصوص نرمی کی سفارش کی۔
ڈپٹی کمشنر لاہور کی سفارش پر دفعہ 144 میں مخصوص نرمی کا فیصلہ کیا گیا، مخصوص اور محدود اجازت کو دفعہ 144 کے حکم نامے کا حصہ بنا دیا گیا۔
یاد رہے کہ ضلعی انتظامیہ نے اصلاحی اجتماع کیلئے 20 اکتوبر کو این او سی جاری کیا تھا جس کی توثیق کیلئے درخواست کی گئی، اجتماع کی اجازت سخت شرائط و ضوابط کے ساتھ مشروط قرار دی گئی ہے۔
مشفیق الرحیم 100ویں ٹیسٹ میں سنچری بنانے والے کھلاڑی بن گئے
اجازت نامہ کے مطابق منتظمین کو ضلعی انتظامیہ کے جاری کردہ قواعد و ضوابط پر من و عن عملدرآمد کرنا ہوگا، اجتماع کی اجازت منتظمین کے حلف نامے اور ذمہ داری قبول کرنے کی بنیاد پر دی گئی، انتظامیہ سٹیج سکیورٹی، خواتین و حضرات کیلئے علیحدہ انکلوژرز اور ہنگامی راستوں کی ذمہ دار ہوگی۔
انتظامیہ ہجوم اور بھگدڑ سے بچاؤ کیلئے مناسب پارکنگ اور رضاکار فراہم کرے گی، تمام سکیورٹی ضروریات اسپیشل برانچ کے آڈٹ کے مطابق پوری کی جائیں گی، اجتماع کے دوران ساؤنڈ سسٹم صرف گراؤنڈ کے اندر اور کم والیوم پر استعمال ہوگا، کم عمر بچوں کو اجتماع میں لانے کی اجازت نہیں ہوگی۔
قومی اسمبلی: بیوی بچوں، بزرگوں کے سماجی تحفظ کیلئے قانون منظور، گالی دینا بھی جرم
واضح رہے کہ کسی دکاندار کو زبردستی کاروبار بند کرانے کی اجازت نہیں ہوگی، کسی قسم کا جلوس یا ریلی سڑکوں پر نہیں نکالی جائے گی، آئینی اداروں، عدلیہ یا افواج کے خلاف تقاریر مکمل طور پر ممنوع ہیں، کسی قسم کے اسلحے یا لاٹھی کی اجازت نہیں دی جائے گی، کسی مذہبی گروہ یا فرقے کی توہین پر مبنی گفتگو کی اجازت نہیں ہوگی۔
اجتماع کے اعلان کیلئے موبائل وین یا کسی بھی گاڑی کا استعمال نہیں ہوگا، شہر میں کہیں بھی وال چاکنگ کی اجازت نہیں ہوگی،اجتماع کے دوران مکمل پرامن ماحول برقرار رکھا جائے گا، قابل اعتراض اور اشتعال انگیز نعروں پر پابندی ہوگی، منتظمین کسی بھی ناگہانی واقعہ کی تمام ذمہ داری خود اٹھائیں گے۔
خاتون اغوا کیس: چیف جسٹس لاہور ہائیکورٹ کا ڈی آئی جی انوسٹی گیشن پر اظہارِ برہمی
پولیس عام شہریوں اور شرکاء کی مکمل سکیورٹی یقینی بنائے گی۔
پاکستان میں 2025کے دوران 53لاکھ سے زائد سائبر حملے رپورٹ ہونے کا انکشاف