گلگت بلتستان کی نگران کابینہ غیر سیاسی اور میرٹ پر بنائی جائے، حفیظ الرحمن کا مطالبہ
اشاعت کی تاریخ: 29th, November 2025 GMT
نگران وزیر اعلیٰ نے تمام تجاویز کو قابل عمل قرار دیتے ہوئے کہا کہ صاف شفاف الیکشن کی اولین زمہ داری احسن طریقے سے ادا کریں گے اور الیکشن کمیشن کو غیر جانبدار صاف شفاف الیکشن کے قیام کیلئے تمام وسائل فراہم کئے جائیں گے اور نگران کابینہ مختصر اور اہل افراد پر مشتمل بنائی جائے گی۔ اسلام ٹائمز۔ سابق وزیر اعلیٰ و صوبائی صدر مسلم لیگ (ن) گلگت بلتستان حافظ حفیظ الرحمن نے نگران وزیر اعلی جسٹس (ر) یار محمد کے ساتھ مسلم لیگ (ن) کے وفد کے ہمراہ ملاقات کی۔ نگران وزیر اعلیٰ کا منصب سنبھالنے پر مبارکباد دی، نیک خواہشات کا اظہار کیا اور اس امید کا اظہار بھی کیا کہ نگران وزیر اعلیٰ صاف شفاف الیکشن کی اپنی بنیادی زمہ داری بھرپور طریقے سے ادا کریں گے۔ حفیظ الرحمن نے ملاقات کے بعد میڈیا سے بات چیت کرتے ہوئے نگران وزیر اعلیٰ یار محمد کی تقرری کو مناسب فیصلہ قرار دیتے ہوئے کہا کہ نگران وزیر اعلی کی شخصیت غیر جانبدار اور غیر سیاسی ہے اور اس فیصلے کو ہر طبقے نے سراہا ہے۔ اب نگران وزیر اعلیٰ پر بھاری زمہ داری عائد ہوئی ہے کہ وہ غیر جانبدار اور صاف شفاف الیکشن کیلئے تمام وسائل بروئے کار لائیں گے۔
سابق وزیر اعلیٰ نے ملاقات کی تفصیلات سے مزید آگاہ کرتے ہوئے بتایا کہ نگران کابینہ کا قیام نگران وزیراعلی کا پہلا امتحان ہے، مسلم لیگ (ن) نے تجاویز دی ہیں کہ نگران وزراء کا الیکشن نہیں سلیکشن ہے لہٰذا غیر سیاسی، بے داغ، اہل اور پڑھے لکھے افراد پر مشتمل نگران کابینہ بنائی جائے۔ وفاق اور تمام صوبوں کے نگران کابینہ کے قیام کے اصولوں کے طرز پر جانے والی حکومت کے کسی بھی زمہ دار کو نگران کابینہ میں شامل نہ کیا جائے جو بھی وزراء لئے جائیں وہ سیاسی جماعتوں سے وابسطہ عہدیدار نہ ہوں اور نہ ہی ان کا کوئی قریبی عزیز الیکشن میں حصہ لے رہا ہو۔ نگران کابینہ میں گلگت بلتستان کے تمام اضلاع اور مذہبی ہم آہنگی کا عنصر بھی خاص خاطر میں رکھا جائے۔
ان کا کہنا تھا کہ جنوری میں الیکشن کا شیڈول دیا گیا ہے لیکن موسمی حالات کو سامنے رکھتے ہوئے الیکشن ممکن نہیں ہیں، نگران وزیر اعلیٰ کو تجویز دی ہے کہ وہ آل پارٹیز کانفرنس بلائیں تاکہ الیکشن کمیشن میں رجسٹرڈ تمام سیاسی جماعتوں کی مشاورت سے آگے بڑھا جاسکے۔ سابق وزیر اعلیٰ نے مزید بتایا کہ مسلم لیگ (ن) اور وفاقی حکومت چاہتی ہے کہ گلگت بلتستان میں صاف شفاف الیکشن ہوں اس ضمن میں ہر ممکن تعاون کیلئے تیار ہیں۔ نگران وزیر اعلیٰ نے تمام تجاویز کو قابل عمل قرار دیتے ہوئے کہا کہ صاف شفاف الیکشن کی اولین زمہ داری احسن طریقے سے ادا کریں گے اور الیکشن کمیشن کو غیر جانبدار صاف شفاف الیکشن کے قیام کیلئے تمام وسائل فراہم کئے جائیں گے اور نگران کابینہ مختصر اور اہل افراد پر مشتمل بنائی جائے گی تاکہ نگران حکومت کی مختصر مدت میں گلگت بلتستان کے عوام کی بھرپور خدمت کی جاسکے۔
ذریعہ: Islam Times
کلیدی لفظ: نگران وزیر اعلی نگران کابینہ گلگت بلتستان مسلم لیگ کہ نگران نگران کا گے اور
پڑھیں:
جمعیت علماء اسلام گلگت بلتستان کی نئی کابینہ کا اعلان
جے یو آئی کے امیر مولانا فضل الرحمن نے آئندہ انٹرا پارٹی الیکشن تک نئی کابینہ کے اراکین کی منظوری دیدی، بیان کے مطابق اس سے پہلے موجود کابینہ صوبائی مجلس عمومی کا اجلاس نہ بلانے پر کالعدم ہو گئی ہے۔ اسلام ٹائمز۔ جمعیت علماء اسلام گلگت بلتستان کی نئی کابینہ کا اعلان کر دیا گیا۔ جے یو آئی کے امیر مولانا فضل الرحمن نے آئندہ انٹرا پارٹی الیکشن تک نئی کابینہ کے اراکین کی منظوری دیدی۔ بیان کے مطابق اس سے پہلے موجود کابینہ صوبائی مجلس عمومی کا اجلاس نہ بلانے پر کالعدم ہو گئی ہے۔ نوٹیفکیشن کے مطابق نئی صوبائی کابینہ میں مولانا عطاء اللہ شہاب سرپرست جبکہ مولانا قاری عبد الکریم بخاری کو صوبائی امیر مقرر کر دیا گیا ہے۔ حاجی رحمت خالق نائب امیر اول، مولانا سید محمد جگلوٹ نائب امیر دوم، مولانا عبد الہادی نائب امیر سوم، مولانا عنایت اللہ میر نائب امیر چہارم ہوں گے۔ منہاج الدین ناظم عمومی، میر بہادر نائب ناظم اول، ماسٹر محمد ایاز نائب ناظم دوم، مولانا محمد شریف نائب ناظم سوم، مفتی محمد رفیق نائب ناظم چہارم ہوں گے۔ نوٹیفکیشن کے مطابق مولانا مقصود احمد کو سیکرٹری اطلاعات جبکہ مولانا دلدار محمد عزیزی کو سالار مقرر کیا گیا ہے۔
ہری پور ضمنی انتخاب, ن لیگ کامیاب