شہباز شریف اور شہزادہ محمد میں ٹیلی فونک رابطہ، تعلقات مزید مضبوط بنانے کا عزم، اتحاد امت ضروری: وزیراعظم

اشاعت کی تاریخ: 1st, January 2026 GMT

اسلام آباد (خبر نگار خصوصی) وزیراعظم محمد شہباز شریف نے گزشتہ شام سعودی عرب کے ولی عہد و وزیراعظم، شہزادہ محمد بن سلمان بن عبدالعزیز آل سعود سے ٹیلیفون پر گفتگو کی۔ وزیراعظم نے خادمِ حرمینِ شریفین، عزت مآب شاہ سلمان بن عبدالعزیز آل سعود اور ولی عہد شہزادہ محمد بن سلمان کے لیے اپنے احترام اور نیک تمناؤں کا اظہار کیا۔ پاکستان کے لیے ولی عہد شہزادہ محمد بن سلمان کی محبت، خلوص اور گرمجوشی پر ان کا شکریہ ادا کیا۔ دونوں رہنماؤں نے اس امر کا اعادہ کیا کہ حالیہ مہینوں میں نئی بلندیوں کو چھونے والے دیرینہ اور برادرانہ تعلقات کو مزید مضبوط کیا جائے گا۔ دونوں رہنماؤں نے علاقائی صورتحال حالیہ پیش رفت پر بھی تبادلہ خیال کیا گیا۔ وزیراعظم نے مختلف چیلنجز کے تناظر میں امتِ مسلمہ کے درمیان اتحاد اور ہم آہنگی برقرار رکھنے کی ضرورت پر زور دیا۔ مملکتِ سعودی عرب کے ساتھ پاکستان کی مکمل یکجہتی کا اظہار کرتے ہوئے وزیراعظم نے کہا کہ بات چیت اور سفارت کاری کے ذریعے علاقائی امن و استحکام کو برقرار رکھنا ناگزیر ہے۔ ولی عہد شہزادہ محمد بن سلمان نے ٹیلیفونک رابطے پر وزیراعظم کا شکریہ ادا کیا اور پاکستان کے ساتھ باہمی دلچسپی کے تمام شعبوں میں تعاون کو مزید فروغ دینے کی مملکت کی خواہش کا اعادہ کیا۔ انہوں نے آئندہ برس پاکستان کا سرکاری دورہ کرنے کی خواہش کا بھی اظہار کیا۔ دوسری طرف وزیراعظم محمد شہبازشریف سے پاکستان میں تعینات سعودی عرب کے سفیر نواف بن سعید احمد المالکی نے آج شام وزیراعظم ہاؤس میں ملاقات کی۔ ملاقات کے دوران وزیراعظم نے خادم حرمین شریفین عزت مآب شاہ سلمان بن عبدالعزیز آل سعود کے اور سعودی عرب کے وزیر اعظم و ولی عہد شہزادہ محمد بن سلمان بن عبدالعزیز آل سعود کے لیے اپنے احترام اور نیک خواہشات کا اظہار کیا۔ دونوں ممالک کے درمیان دیرینہ برادرانہ تعلقات کو مزید گہرا کرنے کے اپنے مضبوط عزم کا اعادہ کیا۔ انہوں نے ضرورت کے وقت سعودی عرب کی جانب سے پاکستان کی مسلسل حمایت اور علاقائی امن و استحکام کے فروغ میں اس کے تعمیری کردار کو بھی سراہا۔ سعودی سفیر نے شاہ سلمان بن عبدالعزیز آل سعود اور ولی عہد شہزادہ محمد بن سلمان کی جانب سے وزیراعظم کو تہنیتی پیغام پہنچایا۔ دریں اثناء وزیر اعظم محمد شہباز شریف نے معاشی بہتری کیلئے اصلاحات کو ناگزیر قرار دیتے ہوئے کہا ہے کہ مشکل فیصلوں کے نتائج سامنے آ رہے ہیں ، دو سال کے دوران پاکستان نے بہترین معاشی ترقی کی ہے، غیر متزلزل عزم سے چیلنجز کا مقابلہ کیا اور ملک کو درست سمت میں گامزن کر دیا، اسی رفتار سے آگے بڑھتے رہے تو کامیابی ہمارا مقدر ہے۔ انہوں نے ان خیالات کا اظہار بدھ کو یہاں اقتصادی گورننس اصلاحات کی تقریب رونمائی سے ویڈیو لنک کے ذریعے خطاب کرتے ہوئے کیا۔ اس موقع پر وزیر خزانہ سینیٹر محمد اورنگزیب سمیت وفاقی وزراء، حکومت کی معاشی ٹیم کے ارکان اور اعلیٰ سرکاری حکام بھی موجود تھے۔ وزیر اعظم نے حکومت کی معاشی کامیابیوں کو اجاگر کرتے ہوئے کہا کہ جب اقتدار سنبھالا تو ہمیں شدید چیلنجز کا شکار معیشت ورثے میں ملی، چیلنجز کے باوجود ہم نے ملک کو دوبارہ درست سمت میں ڈال دیا ہے۔ ہمارے سامنے بڑے چیلنجز تھے جن سے نمٹنا آسان نہ تھا، معاشی طور پر ہم مشکلات میں گھرے ہوئے تھے، انہوں نے کہا کہ کرنٹ اکاؤنٹ خسارہ 3.

3 ارب ڈالر سے تبدیل ہو کر 1.9 ارب ڈالر کے سرپلس میں بدل چکا ہے، ٹیکس ٹو جی ڈی پی کا تناسب تقریباً 8 فیصد سے بڑھ کر 10 فیصد سے زائد ہو گیا ہے۔ گزشتہ 2 سال میں پاکستان نے بہترین معاشی ترقی کی ہے۔ وزیر اعظم نے حکومت کی اہم کامیابیوں کو اجاگر کرتے ہوئے بتایا کہ افراط زر 29.2 فیصد سے کم ہو کر 4.5 فیصد تک آ چکا ہے، زرمبادلہ کے ذخائر 9.2 ارب ڈالر سے بڑھ کر 21.2 ارب ڈالر سے تجاوز کر چکے ہیں، 10 لاکھ سے زائد نئے ٹیکس دہندگان نظام میں شامل ہوئے ہیں، حکومتی نظام کو وسیع پیمانے پر ڈیجیٹل پر منتقل کیا۔ وزیر اعظم نے کہا کہ چیلنجز کے باوجود ہم نے ملک کو دوبارہ درست سمت میں ڈال دیا ہے، بین الاقوامی سطح پر پاکستان کی کامیابیوں کا اعتراف کیا جا رہا ہے۔ عالمی کریڈٹ ریٹنگ ایجنسیوں نے حکومت کی معاشی بہتری اور اصلاحات کو سراہا ہے۔ انہوں نے کہا کہ معاشی اصلاحات آسان کام نہیں تھا، پاکستان سرمایہ کاری کیلئے پرکشش ملک بن چکا ہے۔ اقتصادی اصلاحات پاکستان کے بہتر مستقبل کا پتہ دے رہی ہیں، ہم کاغذی نہیں، عملی اقدامات کر رہے ہیں۔ وزیر اعظم نے سٹرکچرل ریفارمز کو حکومت کااہم ایجنڈا قرار دیتے ہوئے کہا کہ یہ ہماری اپنی ضرورت ہے۔ اس کے بغیر پاکستان ترقی و خوشحالی کی طرف گامزن نہیں ہو سکتا، بین الاقوامی اداروں کی مشاورت سے ہم نے جو اصلاحات کی ہیں یہ ہمارے اپنے مفاد میں ہیں، ہم اپنے عوام کو جوابدہ ہیں، عوام نے ہمیں جو ذمہ داری دی ہے اس سے احسن طریقے سے عہدہ برآ ہوں گے۔ انہوں نے کہا کہ ایف بی آر کی ڈیجیٹائزیش پہلی بار عمل میں آئی ہے ، مالی نظم و ضبط بحال اور سرکاری مالیاتی نظام کو مضبوط بنایا گیا ہے۔ پاکستان کو کاروبار کے لئے زیادہ آسان ملک بنانے پر توجہ مرکوز ہے۔ وزیر اعظم نے اقتصادی اصلاحات کے سلسلے میں کام کرنے والی حکومتی ٹیم اور کابینہ کے ممبران کو سراہتے ہوئے کہا کہ یہ طویل اور سخت سفر ہے، ابھی مزید چیلنجز کا سامنا ہے، غیر متزلزل عزم سے آگے بڑھتے رہے اور سخت محنت سے کام کیا تو کامیابی ہمارا مقدر ہے۔ قبل ازیں وزیراعظم آفس میں منعقدہ تقریب میں وزیراعظم کی اقتصادی گورننس اصلاحات کا باضابطہ آغاز کیا گیا جو معیشت کو محض کلی معیشت کے استحکام کے مرحلے سے نکالتے ہوئے نمو پر مبنی اور اصلاحات پر مرکوز اقتصادی فریم ورک کی جانب فیصلہ کن پیش رفت کی علامت ہے۔ وفاقی وزیر خزانہ و محصولات سینیٹر محمد اورنگزیب نے اصلاحات کے ایجنڈے پر جامع بریفنگ دی۔ پاکستان کی معاشی بحالی کا جائزہ پیش کرتے ہوئے وفاقی وزیر خزانہ نے کلی معیشت کے مضبوط، استحکام اور اہم معاشی اشاریوں میں بہتری پر تفصیل سے روشنی ڈالی۔ وزیرخزانہ نے بتایا کہ گزشتہ مالی سال(2024-25ء) میں ملک کی مجموعی قومی پیداوار کی شرح نمو 3.1 فیصد رہی جو مالی سال 2026ء کی پہلی سہ ماہی میں مزید بڑھ کر 3.71 فیصد تک پہنچ گئی۔ مہنگائی میں نمایاں کمی دیکھنے میں آئی۔ مالی سال 2025ء میں مہنگائی کی شرح کم ہو کر 4.5 فیصد رہی، مالی سال 2026ء کے ابتدائی پانچ مہینوں کے دوران موسمیاتی عوامل کے باوجود افراط زر کی شرح 5 فیصد کی سطح پر رہی۔ وزیر خزانہ نے کہاکہ مالی نظم و ضبط کا مظاہرہ مالی سال 2026ء کی پہلی سہ ماہی میں مالیاتی فاضل (فسکل سرپلس) کے حصول سے ہوا جو مالی سال 2025ء کی پہلی سہ ماہی کے بعد دوسری مرتبہ ہواہے، پرائمری سرپلس جی ڈی پی کے 2.7 فیصد تک پہنچ گیا۔ وزیرخزانہ نے کہاکہ محصولات کے شعبے میں ڈھانچہ جاتی اصلاحات کے نتیجہ میں بہتری کا ثبوت ایف بی آر کے جی ڈی پی کے تناسب سے ٹیکسوں میں اضافہ، اضافے سے ملا ہے جو مالی سال 2025ء میں بڑھ کر 10.2 فیصد ہو گیا جو گزشتہ 25 برسوں میں بلند ترین سطح ہے۔ پریزنٹیشن کے اختتام پر وفاقی وزیر خزانہ نے اصلاحات کے نفاذ کے اگلے مرحلے کا خاکہ پیش کیا جو تین بنیادی شعبوں پر مشتمل ہوگا، نگرانی سینئر کابینہ کرے گی، وزارت خزانہ سیکرٹریٹ کے طور پر کام کرے گی اور ترقیاتی شراکت دار خصوصی تکنیکی یونٹ کی معاونت فراہم کریں گے تاکہ پالیسی پر مسلسل مکالمہ اور اصلاحات کا تسلسل یقینی بنایا جا سکے۔ وزیر اعظم محمد شہباز شریف نے قوم کو سال نو کی مبارکباد دیتے ہوئے کہا ہے کہ 2025ء کا سال تاریخ میں سنہری حروف سے لکھا جائے گا جب مسلح افواج اور قوم نے شانہ بشانہ دشمن کے عزائم کو ناکام بناتے ہوئے معرکہ حق میں تاریخ رقم کی، خدا کرے کہ نئے سال کا ہر دن ملکی سالمیت، قومی ہم آہنگی جیسی اقدار کومضبوط تر کرے اور معاشی آسودگی، سماجی و معاشرتی خوشحالی کی نوید لے کر آئے۔ شانہ بشانہ دشمن کے عزائم کو ناکام بناتے ہوئے معرکہ حق میں تاریخ رقم کی۔ پاکستان کے شاہینوں نے فضائی حدود کا ایسا ناقابل تسخیر دفاع کیا جو دنیا کے لیے مثالی کامیابی اور دنیا کے جنگجوئوں کے لئے نصابی سطح پر سبق آموز مقابلہ تھا۔ انشاء اللہ پوری قوم اپنی دلیر، بہادر اور باصلاحیت افواج کے ساتھ مل کر ملک کے دفاع میں ہمیشہ سیسہ پلائی ہوئی دیوار ثابت ہو گی۔ انہوں نے کہا کہ گزشتہ برس دہشت گردی کے حملوں میں مادر وطن کے لئے اپنی جان کی قربانی پیش کرنے والے شہداء کو بھی پوری قوم کی طرف سے آج کے دن خصوصی خراج عقیدت پیش کرتے ہیں۔

ذریعہ

ذریعہ: Nawaiwaqt

کلیدی لفظ: ولی عہد شہزادہ محمد بن سلمان سلمان بن عبدالعزیز ا ل سعود انہوں نے کہا کہ سعودی عرب کے پاکستان کے اصلاحات کے پاکستان کی شہباز شریف کرتے ہوئے حکومت کی ارب ڈالر کی معاشی مالی سال ہوئے کہا کا اظہار ہوئے کہ بڑھ کر کے لیے

پڑھیں:

پاکستان مشرق وسطیٰ میں امن و استحکام کیلئے فعال سفارتی کردار جاری رکھے ہوئے ہے، اسحاق ڈار

نائب وزیر اعظم اور وزیرخارجہ اسحاق ڈار نے کہا ہے کہ پاکستان آسیان ریجنل فورم کے ذریعے علاقائی امن، استحکام اور تعاون کے لیے پرعزم ہے اور مشرق وسطیٰ میں امن کے لیے فعال سفارتی کردار جاری رکھا ہوا ہے۔

فلپائن کے دارالحکومت منیلا میں آسیان ریجنل فورم کے وزارتی اجلاس سے خطاب میں نائب وزیراعظم اسحاق ڈار نے کہا کہ پاکستان نے مشرق وسطیٰ میں امن و استحکام کے لیے فعال سفارتی کردار جاری رکھے ہو ئے ہے۔

انہوں نے زور دیا کہ تمام فریق تحمل کا مظاہرہ کریں اور سفارت کاری کے ذریعے مسائل حل کریں۔

نائب وزیراعظم اسحاق ڈار نے کہا کہ جموں و کشمیرکے تنازع کا حل ہی جنوبی ایشیا میں پائیدار امن کی بنیاد ہے، بھارت کا سندھ طاس معاہدہ معطل کرنا تشویش ناک اور اشتعال انگیز اقدام ہے۔

اسحاق ڈار نے فلسطینی عوام کے حق خودارادیت کے لیے غیرمتزلزل حمایت کا اعادہ کیا اور کہا کہ افغان سرزمین سے دہشت گردی پاکستان کے لیے سنگین خطرہ ہے۔

شہباز شریف اور شہزادہ محمد میں ٹیلی فونک رابطہ، تعلقات مزید مضبوط بنانے کا عزم، اتحاد امت ضروری: وزیراعظم

پاکستان مشرق وسطیٰ میں امن و استحکام کیلئے فعال سفارتی کردار جاری رکھے ہوئے ہے، اسحاق ڈار

متعلقہ مضامین

روزانہ کی خبریں

سب سے زیادہ دورہ کیا

کلیدی لفظ

آخری خبر