ملاکنڈ: خانہ بدوشوں کا ٹرک کھائی میں گرنے سے خواتین و بچوں سمیت 15 افراد جاں بحق
اشاعت کی تاریخ: 16th, October 2025 GMT
سوات موٹروے ٹنل نمبر 3 کے قریب دل دہلا دینے والے حادثے میں خواتین و بچوں سمیت ایک ہی خاندان کے 15 افراد جاں بحق ہو گئے۔
ابتدائی اطلاعات کے مطابق ٹرک تیز رفتاری کے باعث بے قابو ہو کر الٹ گیا اور کھائی میں جا گرا، جس کے نتیجے میں 15 قیمتی جانیں ضائع ہو گئیں جبکہ 10 افراد شدید زخمی حالت میں اسپتال منتقل کیے گئے۔
ریسکیو 1122 ملاکنڈ کی ٹیموں نے فوری طور پر جائے وقوع پہنچ کر امدادی کارروائیاں شروع کیں، زخمیوں کو ابتدائی طبی امداد دینے کے بعد ڈی ایچ کیو اسپتال بٹخیلہ منتقل کیا گیا۔
حادثے میں جاں بحق ہونے والوں میں خواتین اور بچے بھی شامل ہیں، جن کا تعلق سوات کی تحصیل بحرین سے بتایا جا رہا ہے۔
ریسکیو حکام کے مطابق ٹرک میں سوار تمام افراد (خانہ بدوش) ایک ہی خاندان کے تھے ۔ موٹروے پولیس کے مطابق حادثہ بظاہر تیز رفتاری کے باعث پیش آیا، تاہم اصل وجوہات جاننے کے لیے تحقیقات جاری ہیں۔
افسوس ناک واقعے نے پورے علاقے کو سوگوار کر دیا ہے، بٹخیلہ اسپتال میں جاں بحق افراد کے لواحقین پہنچے جب کہ مقامی انتظامیہ نے جاں بحق افراد کے لیے مالی امداد اور زخمیوں کو ہر ممکن علاج فراہم کرنے کی یقین دہانی کرائی ہے۔
.
ذریعہ
ذریعہ: Al Qamar Online
پڑھیں:
مستونگ میں فتنہ الہندوستان کے 6 دہشتگرد مارے گئے، مرد و خواتین خودکش بمبار گرفتار
سیکیورٹی فورسز کی بلوچستان میں انٹیلیجنس بیسڈ مؤثر کارروائیاں جاری ہیں، مستونگ کے علاقہ کھڈ کوچہ میں فتنہ الہندوستان کے 6 دہشتگرد مارے گئے۔
سیکیورٹی فورسز کی کارروائی کے دوران متعدد دہشتگرد گرفتار کیے گئے، گرفتار دہشتگردوں میں سہولتکار سمیت مرد اور خواتین خودکش بمبار بھی شامل ہیں، کارروائی میں دہشتگردوں کےمتعدد ٹھکانے تباہ کر دیے گئے۔
علاقے میں سرچ اور کلیئرنس کارروائیاں جاری ہیں، سیکیورٹی فورسز کی جانب سے مکمل نگرانی برقرار ہے، دہشتگردوں کے ٹھکانوں سے بھاری مقدار میں اسلحہ، گولہ بارود برآمد کرلیا گیا ہے۔
سیکیورٹی ذرائع کا کہنا ہے کہ مستونگ کے علاقہ کھڈ کوچہ میں سیکیورٹی فورسز کی جانب سے انٹیلیجنس بیسڈ آپریشنز تیز کر دیے گئے، دہشت گردی کے خاتمے اور علاقے میں امن و امان کے قیام تک سیکیورٹی فورسز کی کارروائیاں جاری رہیں گی۔
متنازع ٹوئٹس کیس: ایمان مزاری، ہادی چٹھہ کی اپیل کی سماعت کل ہوگی