سہیل آفریدی نے جامعات میں اردو تقریر لازمی قرار دینے پر زور دے دیا، وڈیو وائرل
اشاعت کی تاریخ: 7th, January 2026 GMT
پشاور: وزیر اعلیٰ خیبر پختونخوا سہیل آفریدی نے بینظیر بھٹو ویمنز یونیورسٹی کے کانووکیشن کے موقع پر وائس چانسلر کی انگریزی میں تقریر پر عدم اطمینان کا اظہار کرتے ہوئے ہدایت کی ہے کہ آئندہ تمام سرکاری تقریبات میں اردو میں خطاب کیا جائے۔
سہیل آفریدی نے کہا کہ پاکستان کی قومی زبان اردو ہے اور جامعات سمیت تمام سرکاری تقریبات میں اردو کو ترجیح دی جانی چاہیے، اگر آئندہ کسی تقریب میں انگریزی میں تقریر کی گئی تو اس پر سخت ردعمل ہوگا۔
وزیر اعلیٰ نے صوبے میں امن و امان کی صورتحال پر بھی بات کی اور بتایا کہ صوبے میں 14 ہزار سے زائد انٹیلی جنس بیسڈ آپریشنز کیے گئے ہیں، صرف کارروائیوں سے دہشت گردی کا مکمل خاتمہ ممکن نہیں، کسی بھی آپریشن سے قبل قوم کو اعتماد میں لینا ضروری ہے تاکہ عوام کی حمایت اور تعاون حاصل کیا جا سکے۔
سہیل آفریدی نے مزید کہا کہ صوبے کے عوام نے ہمیشہ ملک کے لیے قربانیاں دی ہیں اور آئندہ بھی پاکستان کی حفاظت اور ترقی کے لیے ہر قربانی دینے کے لیے تیار ہیں، حکومت صوبے میں دہشت گردی کے خاتمے کے لیے مربوط حکمت عملی اپنائے گی اور امن قائم رکھنے کے لیے تمام وسائل بروئے کار لائے جائیں گے۔
.
ذریعہ
ذریعہ: Al Qamar Online
کلیدی لفظ: پاکستان کھیل سہیل آفریدی نے کے لیے
پڑھیں:
فیلڈ مارشل عاصم منیر کا بلوچستان میں پائیدار امن کے عزم کا اعادہ
فیلڈ مارشل سید عاصم منیر نے کہا ہے کہ سکیورٹی فورسز اور قانون نافذ کرنے والے ادارے عوام کی بھرپور حمایت سے بلوچستان میں دیرپا امن کے قیام کے لیے پرعزم ہیں۔ انہوں نے اس عزم کا اظہار کیا کہ دہشت گردی اور اس کے سہولت کاروں کے خلاف کارروائیاں اپنے منطقی انجام تک جاری رہیں گی۔
پاک فوج کے شعبہ تعلقات عامہ (آئی ایس پی آر) کے مطابق 20ویں نیشنل ورکشاپ بلوچستان کے شرکاء نے جنرل ہیڈکوارٹرز (جی ایچ کیو) کا دورہ کیا، جہاں فیلڈ مارشل سید عاصم منیر نے شرکاء سے خطاب کرتے ہوئے قومی اتحاد، استحکام اور ثابت قدمی کی اہمیت پر زور دیا۔
فیلڈ مارشل نے کہا کہ بلوچستان پاکستان کا فخر ہے اور یہ صوبہ قدرتی وسائل سے مالا مال ہے۔ ان کے مطابق بلوچستان کے محب وطن، باصلاحیت، باہمت اور ثابت قدم عوام ہی اس صوبے کا سب سے قیمتی سرمایہ ہیں۔
انہوں نے کہا کہ وفاقی اور صوبائی حکومتوں کی جانب سے بلوچستان میں جاری ترقیاتی منصوبوں کا مقصد صوبے کی سماجی اور معاشی ترقی کو یقینی بنانا، عوام کے معیارِ زندگی کو بہتر بنانا اور خوشحالی کے نئے مواقع پیدا کرنا ہے۔
آئی ایس پی آر کے مطابق فیلڈ مارشل نے کہا کہ سکیورٹی فورسز اور قانون نافذ کرنے والے ادارے عوام کے تعاون سے بلوچستان میں امن و امان کے قیام کے لیے بھرپور کوششیں جاری رکھے ہوئے ہیں اور ان کی یہی مشترکہ کاوشیں صوبے میں پائیدار امن کی بنیاد بنیں گی۔
انہوں نے اس موقع پر کہا کہ فتنہ الخوارج اور فتنہ الہندوستان کے خلاف ٹارگٹڈ آپریشنز پوری قوت کے ساتھ جاری رہیں گے اور یہ کارروائیاں دہشت گردی اور اس کے سہولت کاروں کے مکمل خاتمے تک بلا تعطل جاری رہیں گی۔
فیلڈ مارشل سید عاصم منیر نے اس عزم کا اعادہ کیا کہ پاکستان کی مسلح افواج عوام کے اتحاد، عزم اور ثابت قدمی کی بدولت ہر قسم کے مذموم عزائم کو ناکام بنائیں گی اور ملکی سلامتی، خودمختاری اور استحکام کے تحفظ کے لیے اپنی ذمہ داریاں پوری کرتی رہیں گی۔
بھارت سے جنگ اور افغانستان میں کارروائی خارج ازامکان نہیں، وزیردفاع