پاکستان چاول برآمد کرنے والا تیسرا بڑا ملک بن گیا
اشاعت کی تاریخ: 18th, January 2026 GMT
پاکستان کی چاول کی برآمدات نے دسمبر 2025 میں زبردست بحالی کا مظاہرہ کیا اور نومبر کے مقابلے میں 14 فیصد ماہانہ اضافہ ریکارڈ کیا، جس کی وجہ باسمتی برآمدات میں 50 فیصد سے زائد اضافہ بتایا گیا ہے، اس مضبوط کارکردگی کے باعث پاکستان دسمبر میں ویتنام کو پیچھے چھوڑتے ہوئے بھارت اور تھائی لینڈ کے بعد دنیا کا تیسرا بڑا چاول برآمد کنندہ بن گیا۔
یہ بھی پڑھیں: رواں مالی سال کے پہلے 2 ماہ میں پاکستانی چاول کی برآمدات میں 100 فیصد تک اضافہ
تجارتی اعداد و شمار کے مطابق پاکستان نے دسمبر 2025 میں ایران کو شامل کیے بغیر 4 لاکھ 89 ہزار ٹن چاول برآمد کیے، جبکہ ویتنام کی برآمدات 3 لاکھ 87 ہزار ٹن رہیں۔ یہ پاکستان کی چاول برآمدات کی ماہانہ سطح پر بہترین کارکردگی ہے اور شعبے میں نئی رفتار کی عکاسی کرتی ہے۔
متحدہ عرب امارات پاکستان کے چاول کا سب سے بڑا خریدار رہا، جس نے 74 ہزار 897 ٹن چاول درآمد کیے، جن میں 16 ہزار 850 ٹن باسمتی شامل تھے۔ چین نے 74 ہزار 685 ٹن چاول خریدا۔
تنزانیہ، کینیا، آئیوری کوسٹ، گنی بساؤ، ملائیشیا، مڈغاسکر، قازقستان، سعودی عرب، یورپی یونین اور برطانیہ، عمان، امریکہ اور کینیڈا شامل تھے۔ باسمتی کے حوالے سے ازبکستان کو 10 ہزار 382 ٹن چاول برآمد کیے گئے۔
یہ بھی پڑھیں: انڈیا پر پابندیوں کے بعد پاکستانی چاول امریکی مارکیٹوں میں نظر آنا شروع ہو گیا، سینیئر صحافی انور اقبال
ماہرین کے مطابق اس سے ایک ساختی تبدیلی کا پتہ چلتا ہے، کیونکہ پاکستان اب وسطی ایشیائی ریاستوں جیسے قازقستان، ازبکستان، آذربائیجان، ترکمانستان، تاجکستان اور کرغزستان کو براہ راست برآمدات کر رہا ہے۔
پہلے یہ تجارت زیادہ تر افغانستان کے ذریعے غیر مستقیم طور پر ہوتی تھی، لیکن افغان سرحد کی بندش نے براہ راست برآمدی راستے متعارف کرائے ہیں اور پاکستان کی موجودگی اس خطے میں زیادہ نمایاں ہو گئی ہے۔
اگرچہ دسمبر کے اعداد و شمار خوش آئند ہیں، چاول برآمدات کے شعبے کو اب بھی گہرے مسائل کا سامنا ہے۔ ساختی، مالیاتی، مارکیٹنگ اور صلاحیت سے متعلق کمزوریاں برقرار ہیں، جن میں سب سے بڑا خلا عراق کو پاکستان کی نامعلوم سطح کی برآمدات ہے، جو اس وقت سعودی عرب کے بعد بھارت کے باسمتی چاول کا دنیا میں دوسرا بڑا درآمد کنندہ ہے۔
یہ بھی پڑھیں: بھارت کو عالمی مارکیٹ میں شکست، باسمتی چاول پاکستانی پراڈکٹ قرار
اسی طرح ترکی کو پاکستان کی برآمدات نہ ہونے کے برابر ہیں، جبکہ یہ ملک عراق، اردن، شام اور مشرقی یورپ کے کچھ حصوں کے لیے اہم ٹرانزٹ مرکز ہے۔
وزیراعظم شہباز شریف نے حال ہی میں حکام کو ہدایت کی ہے کہ چاول کی برآمدات بڑھانے اور بڑھتے ہوئے تجارتی خسارے کو کم کرنے کے لیے جامع حکمت عملی تیار کی جائے۔
حکام کا کہنا ہے کہ بھارت کے سستے چاول اور سرحدوں پر نباتاتی معیارات کی وجہ سے برآمدات میں کمی آئی، جبکہ برآمد کنندگان کا موقف ہے کہ پاکستان کے چاولی شعبے کو بنیادی طور پر پالیسی غلطیوں نے نقصان پہنچایا ہے۔
چاولی شعبے کے تجزیہ کار حمید ملک کے مطابق عالمی مقابلے کی شدت، خصوصاً بھارت میں پیداوار میں اضافہ، بین الاقوامی طلب میں کمزوری، سمندری فریٹ اور لاجسٹکس کے بڑھتے ہوئے اخراجات، غیر مستحکم مالیاتی اور معاشی پالیسیاں، غیر معقول ضابطہ کاری، ذخیرہ اندوزی اور غیر دستاویزی رقم کی وجہ سے ملکی قیمتوں میں اضافہ، اور سرحدی بندشوں کے باعث سیکٹر متاثر ہو رہا ہے۔
یہ بھی پڑھیں: سیلاب: پنجاب میں چاول کی فصل کس قدر متاثر ہوئی؟
اس کے باوجود حمید ملک نے کچھ مثبت پیش رفت کو امید کی کرن قرار دیا۔ ان کا کہنا ہے کہ بنگلہ دیش میں پاکستانی چاول کی مضبوط طلب ہے، اگرچہ فریٹ کی بلند قیمتوں نے مسابقت کم کر دی ہے۔ وسطی ایشیائی ریاستیں بھی پاکستان کی فصل کے موسم کے آغاز کے بعد سے امید افزا منڈیوں کے طور پر ابھری ہیں۔ اسی طرح امریکہ نے بھارت پر باسمتی چاول کی برآمدات پر 50 فیصد ٹیرف عائد کیا ہے، جس سے پاکستان کو فائدہ پہنچ رہا ہے اور امریکہ کی طرف برآمدات بتدریج بڑھ رہی ہیں، جیسا کہ ایکسپورٹر ابو بکر نے بتایا۔
ایک اور اہم پیش رفت ایران میں سامنے آئی ہے، جہاں غیر ملکی کرنسی کی قلت کے باعث ایرانی مرکزی بینک نے چاول کی درآمد کے لیے سبسڈی شدہ فارن ایکسچینج جاری کرنا بند کردیا ہے۔
ایرانی تاجروں نے اب اپنی رقم سے چاول درآمد کرنا شروع کردیا ہے، جس سے جغرافیائی قربت کی وجہ سے پاکستان کو فائدہ پہنچا ہے۔ پاکستانی برآمد کنندگان کے مطابق ایرانی طلب میں اضافہ ہوا ہے جبکہ بھارتی برآمد کنندگان کو اس تبدیلی سے نقصان اٹھانا پڑا ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
we news ایران پاکستان چاول متحدہ عرب امارات ویتنام.
ذریعہ
ذریعہ: WE News
کلیدی لفظ: ایران پاکستان چاول متحدہ عرب امارات ویتنام چاول کی برآمدات یہ بھی پڑھیں پاکستان کی چاول برآمد کے مطابق ٹن چاول کی وجہ کے لیے کے بعد
پڑھیں:
سونے کی قیمت میں اضافہ، فی تولہ سونا 4 لاکھ 33 ہزار 836 روپے ہوگیا
کراچی: پاکستان میں سونے کی قیمت میں اضافہ مسلسل دوسرے روز بھی جاری رہا، جس کے بعد مقامی صرافہ بازاروں میں فی تولہ سونا 4 ہزار 600 روپے مہنگا ہو گیا۔
آل پاکستان صرافہ جیمز اینڈ جیولرز ایسوسی ایشن کے مطابق اضافے کے بعد 24 قیراط فی تولہ سونے کی نئی قیمت 4 لاکھ 33 ہزار 836 روپے مقرر کی گئی ہے۔
ایسوسی ایشن کے مطابق 10 گرام سونے کی قیمت میں بھی 3 ہزار 944 روپے کا اضافہ ریکارڈ کیا گیا، جس کے بعد نئی قیمت 3 لاکھ 71 ہزار 944 روپے ہو گئی۔
دوسری جانب چاندی کی قیمت میں بھی معمولی اضافہ دیکھا گیا۔ فی تولہ چاندی 7 روپے اضافے کے بعد 6 ہزار 403 روپے جبکہ 10 گرام چاندی 6 روپے مہنگی ہو کر 5 ہزار 489 روپے کی سطح پر پہنچ گئی۔
یاد رہے کہ گزشتہ روز بھی سونے کی قیمت میں نمایاں اضافہ ہوا تھا، جب فی تولہ سونا 4 ہزار 700 روپے مہنگا ہو کر 4 لاکھ 29 ہزار 236 روپے تک پہنچ گیا تھا، جبکہ 10 گرام سونے کی قیمت 4 ہزار 29 روپے اضافے کے بعد 3 لاکھ 68 ہزار روپے ہوگئی تھی۔
عالمی مارکیٹ میں بھی قیمتی دھاتوں کے نرخ بڑھنے کا رجحان برقرار ہے۔ بین الاقوامی مارکیٹ میں فی اونس سونے کی قیمت 46 ڈالر اضافے کے بعد 4 ہزار 114 ڈالر ریکارڈ کی گئی، جبکہ چاندی کی عالمی قیمت 0.07 ڈالر اضافے سے 59.24 ڈالر فی اونس تک پہنچ گئی۔
ماہرین کا کہنا ہے کہ عالمی منڈی میں سونے کی قیمتوں میں اضافے، امریکی ڈالر کی نقل و حرکت، شرح سود اور جغرافیائی کشیدگی جیسے عوامل مقامی مارکیٹ پر بھی براہِ راست اثر انداز ہوتے ہیں، جس کے باعث پاکستان میں سونے کی قیمتوں میں مسلسل اتار چڑھاؤ دیکھا جا رہا ہے۔
بھارت سے جنگ اور افغانستان میں کارروائی خارج ازامکان نہیں، وزیردفاع