جنوبی افریقا کا اسرائیلی سفارت کار کو ناپسندیدہ شخصیت قرار دے کر ملک چھوڑنے کا حکم
اشاعت کی تاریخ: 30th, January 2026 GMT
data-id="863a0a8" data-element_type="widget" data-widget_type="theme-post-content.default">
کیپ ٹاؤن :جنوبی افریقا نے اسرائیل کے ایک اعلیٰ سفارتی اہلکار کو ناپسندیدہ شخصیت (Persona Non Grata) قرار دیتے ہوئے 72 گھنٹوں کے اندر ملک چھوڑنے کا حکم دے دیا ہے، جس کے بعد دونوں ممالک کے تعلقات میں مزید کشیدگی پیدا ہونے کا خدشہ ظاہر کیا جا رہا ہے۔
جنوبی افریقی وزارتِ خارجہ کی جانب سے جاری بیان کے مطابق اسرائیلی سفارت خانے کے ناظم الامور ایریل سیڈمین کو سفارتی آداب کی سنگین خلاف ورزیوں کا مرتکب پایا گیا ہے، جس کے باعث انہیں ناپسندیدہ شخصیت قرار دیا گیا، متعلقہ سفارت کار کو 72 گھنٹوں کے اندر جنوبی افریقا چھوڑنا ہوگا۔
وزارتِ خارجہ کے مطابق ایریل سیڈمین نے سفارتی ذمہ داریوں اور بین الاقوامی قوانین کے برخلاف جنوبی افریقی صدر کے خلاف سوشل میڈیا پر توہین آمیز اور نامناسب مہم چلائی، جو ویانا کنونشن برائے سفارتی تعلقات کی صریح خلاف ورزی ہے، کسی بھی غیر ملکی سفارت کار کو میزبان ملک کی داخلی سیاست میں مداخلت یا ریاستی قیادت کے خلاف مہم جوئی کی اجازت نہیں دی جا سکتی۔
جنوبی افریقی حکام کا کہنا ہے کہ اس اقدام کا مقصد سفارتی آداب، ریاستی خودمختاری اور باہمی احترام کے اصولوں کا تحفظ کرنا ہے۔ وزارتِ خارجہ نے اسرائیل سے مطالبہ کیا ہے کہ آئندہ جنوبی افریقا میں تعینات ہونے والے سفارتی عملے کو بین الاقوامی سفارتی اصولوں کی مکمل پابندی کا پابند بنایا جائے۔
ذرائع کے مطابق جنوبی افریقی حکومت نے اس معاملے پر اسرائیلی حکام کو باضابطہ سفارتی نوٹ بھی ارسال کیا ہے، جس میں واضح کیا گیا ہے کہ مستقبل میں ایسی کسی بھی خلاف ورزی کو برداشت نہیں کیا جائے گا۔ حکومت نے اس بات پر بھی زور دیا کہ جنوبی افریقا سفارتی تعلقات کے دروازے بند نہیں کرنا چاہتا، تاہم باہمی احترام اور بین الاقوامی قوانین کی پاسداری ہر صورت لازم ہے۔
تاحال اسرائیلی وزارتِ خارجہ کی جانب سے اس فیصلے پر کوئی باضابطہ ردعمل سامنے نہیں آیا، تاہم سفارتی حلقوں میں اس اقدام کو غیر معمولی اور سخت قرار دیا جا رہا ہے۔
ذریعہ
ذریعہ: Jasarat News
کلیدی لفظ: جنوبی افریقا جنوبی افریقی
پڑھیں:
گوجرانوالہ: ایجنٹ مافیا کے خلاف ایف آئی اے کا کریک ڈاؤن، 15 گرفتار
گوجرانوالہ (نمائندہ خصوصی) ڈی جی ایف آئی اے ڈاکٹر عثمان انور کی ہدایت پر گوجرانوالہ زون نے پاسپورٹ دفاتر کے باہر سرگرم ایجنٹ مافیا کے خلاف کریک ڈاؤن کرتے ہوئے 15 ملزمان کو گرفتار کر لیا۔ گوجرانوالہ سرکل سے 7، گجرات سے 3 اور سیالکوٹ سے 5 ایجنٹوں کو گرفتار کیا گیا جو شہریوں سے جلد پاسپورٹ بنوانے کے نام پر رقم بٹورتے تھے۔ ابتدائی تحقیقات میں پاسپورٹ دفاتر کے بعض اہلکاروں کی ملی بھگت کے شواہد بھی ملے۔ ملزموں کے خلاف مقدمات درج کر کے مزید تفتیش جاری ہے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار