امریکی ناظم الامور کا سیالکوٹ کا دورہ، دوطرفہ تجارت اور سرمایہ کاری کو مزید مضبوط بنانے پر زور
اشاعت کی تاریخ: 20th, January 2026 GMT
پاکستان میں امریکی ناظم الامور نیٹلی بیکر نے سیالکوٹ کا دورہ کیا ہے، جہاں انہوں نے شہر کی متحرک کاروباری برادری کی تعریف کی اور امریکا و پاکستان کے درمیان دوطرفہ تجارت اور سرمایہ کاری کو مزید مضبوط بنانے کی ضرورت پر زور دیا تاکہ باہمی خوشحالی کو فروغ دیا جا سکے۔
سیالکوٹ چیمبر آف کامرس کی جانب سے دیے گئے ظہرانے سے خطاب کرتے ہوئے نیٹلی بیکر نے امریکا اور پاکستان کے درمیان تجارتی تعلقات کی مضبوطی کو اجاگر کیا۔
مزید پڑھیں: اصلاحات اور استحکام کے بعد پاکستان امریکا کے لیے اسٹریٹجک شراکت دار کے طور پر ابھرنے لگا
انہوں نے بتایا کہ دونوں ممالک کے درمیان تجارت کا حجم 8 ارب ڈالر سے تجاوز کرنے کی توقع ہے۔ تجارت میں توسیع اس مضبوط بنیاد کی عکاسی کرتی ہے جو پاکستان میں اور عالمی سطح پر امریکی معاشی شراکت داری کے مثبت اثرات کو نمایاں کرتی ہے۔
انہوں نے کہا کہ امریکا اور پاکستان منصفانہ اور متوازن تجارتی تعلقات کے فروغ کے لیے کوشاں ہیں، جو دونوں ممالک کے لیے خوشحالی کا باعث بنیں گے۔
انہوں نے مزید کہاکہ گزشتہ 2 دہائیوں سے زیادہ عرصے سے امریکا پاکستان کی سب سے بڑی برآمدی منڈی اور نمایاں سرمایہ کار رہا ہے، تجارتی وسعت اور مشترکہ خوشحالی کے وسیع مواقع موجود ہیں۔
دورے کے دوران امریکی ناظم الامور نے فارورڈ اسپورٹس، فرسٹ امریکن کارپوریشن لمیٹڈ اور سی اے اسپورٹس کا بھی دورہ کیا، جو سیالکوٹ کی اسپورٹنگ گڈز انڈسٹری میں عالمی سطح پر پہچان رکھتے ہیں۔
اس کے علاوہ انہوں نے سیالکوٹ انٹرنیشنل ایئرپورٹ کا معائنہ کیا اور ایئر سیال کی انتظامیہ سے ملاقات بھی کی۔ ان ملاقاتوں اور دوروں کے ذریعے عالمی سپلائی چینز، روزگار کے مواقع اور تجارت کے ذریعے معاشی ترقی میں امریکا اور پاکستان کے تعاون کی اہمیت کو اجاگر کیا گیا۔
نیٹلی بیکر نے کہاکہ امریکا جدید ٹیکنالوجی، جدت اور کاروباری صلاحیتوں کے ذریعے دونوں ممالک میں روزگار کے مواقع پیدا کرنے اور کمیونٹیز کو مضبوط بنانے کے لیے پرعزم ہے۔
یہ دورہ ایسے وقت میں ہوا ہے جب امریکا اعلانِ آزادی کی 250ویں سالگرہ منا رہا ہے۔ یہ موقع صرف ماضی پر نظر ڈالنے کا نہیں بلکہ مستقبل کے لیے جدت، تجارت اور عالمی سطح پر قیادت کے ایک نئے دور کا آغاز بھی ہے۔
امریکی ناظم الامور نے کہاکہ امریکا کھیلوں اور کاروبار کے ذریعے عوام، منڈیوں اور ثقافتوں کو جوڑنے کے لیے شراکت داریوں کو مزید مستحکم کررہا ہے۔
مزید پڑھیں: پاکستان امریکا تعلقات کو پاک چین دوستی کے تناظر میں نہ دیکھا جائے، اسحاق ڈار
نیٹلی بیکر نے مزید کہاکہ امریکا پاکستان اور اس کے عوام میں گہری دلچسپی رکھتا ہے اور اس شراکت داری کو مزید آگے بڑھا رہا ہے، جس کی بنیاد پاکستان کی آزادی کے وقت رکھی گئی تھی اور جو تجارت، جدت، تعلیم اور ثقافتی تبادلے کے ذریعے مسلسل مضبوط ہو رہی ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews امریکی ناظم الامور دوطرفہ تجارت سرمایہ کاری سیالکوٹ کا دورہ کاروباری برادری نیٹلی بیکر وی نیوز.
ذریعہ
ذریعہ: WE News
کلیدی لفظ: امریکی ناظم الامور دوطرفہ تجارت سرمایہ کاری سیالکوٹ کا دورہ کاروباری برادری نیٹلی بیکر وی نیوز امریکی ناظم الامور نیٹلی بیکر نے کے ذریعے انہوں نے کو مزید کے لیے
پڑھیں:
حکومت نے نیشنل امیگریشن اینڈ ویلفیئر پالیسی 2026 کا اجرا کر دیا
وفاقی وزیر اوورسیز پاکستانیز چوہدری سالک حسین نے نیشنل امیگریشن اینڈ ویلفیئر پالیسی 2026 کا اجرا کر دیا۔تقریب سے خطاب کرتے ہوئے انہوں نے کہا کہ آج کا دن پاکستان میں لیبر مائیگریشن کے نظم و نسق کو مضبوط بنانے کی جانب ایک اہم سنگ میل ہے۔ یہ پالیسی ہر اس پاکستانی سے کیے گئے قومی عزم کی عکاس ہے جو بہتر مواقع کی تلاش میں اپنا گھر چھوڑتا ہے۔انہوں نے کہا کہ محفوظ اور منظم نقل مکانی، مہارتوں کی ترقی، کارکنوں کا تحفظ، تارکینِ وطن کی شمولیت اور وطن واپس آنے والوں کی بحالی اس پالیسی کے بنیادی ستون ہیں۔ تکنیکی جدت، آبادیاتی تبدیلیاں اور لیبر مارکیٹ کے بدلتے ہوئے تقاضے دنیا بھر کی معیشتوں کو نئی شکل دے رہے ہیں. اس لیے پاکستان کو اپنی افرادی قوت کو آج اور مستقبل دونوں کے مواقع کے لیے تیار کرنا ہوگا۔ ان کا کہنا تھا کہ نیشنل امیگریشن اینڈ ویلفیئر پالیسی 2026 اس سمت میں ایک اہم قدم اور پاکستان کی افرادی قوت کو مستقبل کے تقاضوں سے ہم آہنگ کرنے میں سنگ میل ثابت ہوگی۔چوہدری سالک حسین نے کہا کہ ایک کروڑ 20 لاکھ پاکستانی دنیا بھر میں مقیم ہیں اور اپنی پیشہ ورانہ مہارت، دیانت داری اور محنت کی بدولت پاکستان کے سفیر بن چکے ہیں۔ گزشتہ مالی سال میں سمندر پار پاکستانیوں نے 41 ارب امریکی ڈالر سے زائد کی ترسیلاتِ زر وطن بھیجیں، جو ملکی تاریخ کی بلند ترین رقم ہے۔ انہوں نے کہا کہ بیرون ملک مقیم پاکستانیوں کی کامیابی پاکستان کی کامیابی ہے اور ان کی فلاح و بہبود ہماری قومی ذمہ داری ہے۔انہوں نے کہا کہ یہ پالیسی اداروں، تجربات اور شراکت داریوں کو ایک مشترکہ وژن کے تحت یکجا کرتی ہے تاکہ ہر پاکستانی کارکن نقل مکانی کے پورے سفر کے دوران بہتر طور پر تیار، محفوظ اور معاونت یافتہ ہو۔ اس پالیسی کا محور ہر اس پاکستانی کا سفر ہے جو مواقع کی تلاش میں اپنا گھر چھوڑتا ہے، جبکہ ذمہ داری روانگی سے پہلے ہی شروع ہو جاتی ہے، جہاں نوجوان کارکنوں کو متعلقہ مہارتیں، قابلِ اعتماد معلومات اور اخلاقی بھرتی تک رسائی فراہم کی جائے گی۔وفاقی وزیر نے کہا کہ اس پالیسی کی کامیابی وفاقی اور صوبائی حکومتوں، نفاذ کرنے والے اداروں، آجروں، تربیتی اداروں، ترقیاتی شراکت داروں، نجی شعبے اور سمندر پار پاکستانیوں کے باہمی تعاون سے مشروط ہے۔ انہوں نے صوبائی حکومتوں، آئی سی ایم پی ڈی (ICMPD)، دیگر ترقیاتی شراکت داروں اور تمام اسٹیک ہولڈرز کا مشاورتی عمل میں تعاون پر شکریہ ادا کیا، جبکہ اسپیشل انویسٹمنٹ فیسیلیٹیشن کونسل (SIFC) کی مسلسل معاونت کو بھی سراہا۔انہوں نے کہا کہ ہجرت یا نقل مکانی غیر یقینی کا سفر نہیں بلکہ مواقع، وقار اور قومی ترقی کا راستہ ہونا چاہیے۔ آئیں مل کر ایسا مستقبل بنائیں جہاں ہر پاکستانی اعتماد کے ساتھ بیرون ملک جائے، فخر کے ساتھ وطن واپس آئے اور ہمیشہ ایک ایسی قوم سے جڑا رہے جو اس کی خدمات کی قدر اور عزت کرتی ہو۔ انہوں نے دعا کی کہ اللہ تعالیٰ اس وژن کو عوام کے لیے بامعنی ترقی، پاکستان کے لیے دیرپا خوشحالی اور ہر سمندر پار پاکستانی اور اس کے خاندان کے روشن مستقبل کا ذریعہ بنائے۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار